តារាចម្រៀងសាន់ដេ លោក អ៊ីណូ កំពុងធ្វើឱ្យមហាជនកោតសរសើរនិងចាប់អារម្មណ៍មកលើស្នាដៃផលិត MV ថ្មីរបស់លោកដែលមានចំណងជើងថា« ការពារ » ជាលាយបញ្ចូលគ្នារវាងបុរាណនិងសម័យដែលត្រូវបានគេហៅថា សិល្បៈសហសម័យ។ MV ថ្មីមួយនេះ បានបញ្ចេញជាផ្លូវការនៅថ្ងៃទី ១៩ ខែធ្នូ ឆ្នាំ២០២១ ដែលមានទម្រង់លើកស្ទួយវប្បធម៌ជាតិ ជាពិសេសគឺទម្រង់សម្លៀកបំណាក់នាសម័យអាណាចក្រអង្គរដ៏អស្ចារ្យ។
យ៉ាងណាមិញ ការបញ្ចេញ MV ថ្មីនេះមិនដល់ប៉ុន្មាននាទីផង សន្ទុះនៃការចែកចាយនៅលើបណ្ដាញទាំង TikTok និង Facebook ក៏ផ្ទុះការចាប់អារម្មណ៍ និងកោតសរសើរ ដោយមានអ្នកខ្លះកាត់វីដេអូឈុតឆាកខ្លីៗយកទៅបង្ហោះ។ ដើម្បីផលិត MV ដែលជាសិល្បៈសហសម័យមួយនេះបាន លោក អ៊ីណូ បានចំណាយថវិការផលិតផ្ទាល់ខ្លួនរហូតដល់ជិត ២ម៉ឺនដុល្លារ ក៏ព្រោះតែលោកចង់បន្សល់នូវស្នាដៃបទចម្រៀងដ៏ល្អមួយទុកដល់កូនខ្មែរ និងទុកជាគម្រូក្នុងវិស័យចម្រៀងផងដែរ។ លោក អ៊ីណូ បានបង្ហោះទៀតថា ក្នុងការចំណាយធនធានផ្ទាល់ខ្លួនដើម្បីផលិត គឺនៅទាន់ឱកាសដែលលោកមានលទ្ធភាពចំណាយគ្រប់គ្រាន់។
សូមជម្រាបបញ្ជាក់ថា នៅក្នុង MV បទ « ការពារ » មួយនេះ ក៏មានការចូលរួមសម្ដែងពីតារាប្រុសជើងចាស់ លោក ហម ឆរ៉ា សម្ដែងជាតួអង្គព្រះរាជា។ យ៉ាងណាក៏ដោយ គេកត់សម្គាល់ឃើញថា ស្នាដៃមួយនេះបានរុញឱ្យតារាចម្រៀងសាច់ដេរូបនេះ ទទួលបានការសរសើរមិនដាច់ពីមាត់ តាំងពីដំណាក់កាលដែលលោកទើបតែចេញផលិត ហើយនៅមិនទាន់ចេញជា MV មកម្លេះ។ ហើយស្របពេលដែលហ្វេនអ្នកគាំទ្រកំពុងផ្ទុះការចាប់អារម្មណ៍ខ្លាំងចំពោះសិល្បៈសហសម័យ លោក អ៊ីណូ លើកគំនិតនេះឡើង ផលិត MV មកបំពេញចិត្តមហាជនផងដែរ។
តោះមកទស្សនា MV បទ « ការពារ » ពីតារាចម្រៀងសាន់ដេ លោក អ៊ីណូ៖
