កញ្ញា សុខ ស្រីនាង គឺជាកំពូលតារាចម្រៀង និងជាតារាសម្ដែងប្រចាំផលិតកម្មហង្សមាស និងរស្មីហង្សមាស បានចេញមកទម្លាយពីអារម្មណ៍របស់ខ្លួននៅថ្ងៃទី២០ ខែធ្នូ ឆ្នាំ២០២១ តាមរយៈបណ្ដាញសង្គមហ្វេសប៊ុក ក្រោយសាមីខ្លួនមានឱកាសបានរួមការងារជាមួយនឹងអ្នកនាង ឱក សុគន្ធកញ្ញាជាលើកទីមួយ ទោះជាបានរួមរស់ក្រោមទំនំតែមួយ ជាមួយគ្នារាប់សិបឆ្នាំហើយក្ដី។
រំលឹកពីប្រវត្តិច្រៀងចម្រៀងក្នុងផលិតកម្ម តារាស្រីទាំងពីរដួងនេះ ធ្លាប់ជ្រួសគ្នាម្ដង កាលពីនៅផលិតកម្មសាន់ដេរ ដោយកាលណោះនៅពេលដែលអ្នកនាង ឱក សុគន្ធកញ្ញា ចាកចេញពីផលិតកម្មសាន់ដេរ មកកាន់ផលិតកម្មហង្សមាសវិញនោះ កញ្ញា សុខ ស្រីនាង បានចូលទៅជ្រកក្រោមផលិតកម្មសាន់ដេរ។
យ៉ាងណាមិញនៅពេលដែលទាំងអ្នកនាង ឱក សុគន្ធកញ្ញា និងកញ្ញា សុខ ស្រីនាង បានក្លាយជាតារាចម្រៀងប្រចាំផលិតកម្មហង្សមាសហើយនោះ អ្នកគាំទ្រមិនដែលឃើញតារាទាំងពីរដួងនេះមានឱកាសបានសហការជាមួយគ្នានោះឡើយ រហូតមកដល់ថ្ងៃនេះ នៅពេលដែលអ្នកនាង សុខ ស្រីនាង ចេញមកបង្ហើបឱ្យដឹងពីសមិទ្ធិផលការងាររួមគ្នារបស់ខ្លយនជាមួយនឹងរៀមច្បង ឱក សុគន្ធកញ្ញា ធ្វើឱ្យអ្នកគាំទ្រមានក្ដីរំភើបនិងរីករាយជាខ្លាំង ជាពិសេសអ្នកគាំទ្រក៏សរសើរពីរូបសម្រស់របស់តារាស្រីទាំងពីរដួងនេះដូចគ្នាដែរ។
យោងតាមការរៀបរាប់របស់កញ្ញា សុខ ស្រីនាង បានរៀបរាប់ពីក្ដីរំភើបរបស់ខ្លួនដែលទទួលបានឱកាសធ្វើការជាមួយនឹងរៀមច្បង ឱក សុគន្ធកញ្ញាថា៖ «នេះជាលេីកទីមួយហេីយដែលរួមការងារជាមួយរៀមច្បង Aok Sokunkanha – ឱក សុគន្ធកញ្ញា បេីនិយាយពីអាម្មណ៍គឺរំភេីបនិងរីករាយណាស់ ចាប់ដៃធ្វើការងារលើកទីមួយមែន ប៉ុន្តែធ្វើការបានដោយរលូន ក្រោមការយកចិត្តទុកដាក់ពីបងស្រីផ្ទាល់ និងក្រុមការងារទាំងអស់ផងដែរ Love&respect:)»។ ក្រោមសំណេររបស់កញ្ញា សុខ ស្រីនាង អ្នកនាង ឱក សុគន្ធកញ្ញា បានចូលមកបញ្ជាក់ពីមេត្រីភាពរបស់ខ្លួនដោយពោលថា ដោយក្ដីស្រលាញ់អូន។
ថ្វីត្បិតតែចេញមកបង្ហើបពីក្ដីរំភើបរបស់ខ្លួនចំពោះឱកាសរួមសហការជាមួយនឹងរឿងច្បង ប៉ុន្តែកញ្ញា សុខ ស្រីនាង មិនបានបញ្ជាក់ថាការងារដែលកញ្ញា និងអ្នកម៉ាក់របស់ ឆលី ធ្វើរួមគ្នានោះជាអ្វីឡើយ ដោយទុកឱ្យអ្នកគាំទ្របន្តរង់ចាំតាមដាន និងគាំទ្រស្នាដៃរបស់អ្នកទាំងពីរនៅពេលខាងមុខជាបន្តទៀត៕