លោកស្រី Amy Pascal ផលិតករភាពយន្ត «Spider-Man: No Way Home» បានចេញមកបង្ហើបឱ្យដឹងថាលោកស្រូធ្លាប់ហៅតួ ឯកប្រុសស្រីភាពយន្តនេះមកជួយនិងហាមមិនឱ្យអ្នកទាំងពីរស្រលាញ់ឬសេពគប់គ្នា ក្រោយមានអ្នកលេងបណ្ដាញសង្គមលើកបង្អាប់អ្នកទាំងពីរកំពុងដើរតាមដានជើងរៀមច្បងដែលធ្លាប់សម្ដែងភាពយន្ត Spider កន្លងៗមក។
អាចនិយាយបានថាជាភាពយន្តនេះកំពុងតែមានភាពល្បីល្បាញយ៉ាងខ្លាំង ព្រោះភាពយន្តស្ដែងពី Super Hero របស់ផលិតកម្ម Marvel មួយនេះកំពុងតែបញ្ចាំងនៅតាមរោងភាពយន្តនានា ដូចជានៅក្នុងរោងភាពយន្តរបស់ប្រទេសកម្ពុជាក៏កំពុងតែបញ្ចាំងភាពយន្តដូចគ្នាដែរ។ យ៉ាងណាមិញនៅក្នុងអំឡុងពេលដែលភាពយន្តនេះកំពុងធ្វើយុទ្ធនាការ Promote យ៉ាងខ្លាំងក្លានោះ លោកស្រី Amy Pascal បានផ្ដល់បទសម្ភាសន៍ដល់ New York Times ទាក់ទងនឹងករណីដែលអ្នកគាំទ្ររបស់តួឯកប្រុសស្រីរឿង «Spider-Man: No Way Home» កំពុងតែតាមដានយ៉ាងស្អិតចំពោះទំនាក់ទំនងតួឯកប្រុស Spider Man និងមិត្តស្រី MJ ដែលសម្ដែងដោយ Tom និង Zendaya ព្រោះអ្នកទាំងពីរគឺជាគូស្នេហ៍ទាំងក្នុងភាពយន្តនិងខាងក្រៅឆាក រហូតមានមនុស្សមួយចំនួនលួចបង្ហាញក្ដីបារម្ភថាអ្នកទាំងពីរអាចនឹងដើរតាមដានជើងរៀមច្បងដែលធ្លាប់សម្ដែងភាពយន្ត Spider Man កន្លងមក ឧទាហរណ៍ដូចជា Emma និង Andrew និង Tobey និង Kirsten។
តារាសម្ដែងទាំង២គូខាងលើនេះបានជួបស្គាល់គ្នាពេលសម្ដែងរឿង Spider-Man ហើយបានបែកបាក់គ្នាវិញ ដោយសារព័ត៌មាន NYT បានសាកសួរផលិតករខាងលើពាក់ព័ន្ធនឹងករណីនេះថា៖ «ហេតុអ្វីបានជាតួឯកប្រុសស្រីដែលធ្លាប់សម្ដែងរឿងបុរសពីងពាងគ្រប់គ្នាចេះតែស្រលាញ់គ្នាក្នុងជីវិតពិត?» ពេលនោះលោកស្រី Amy Pascal បានឆ្លើយតបថា «ដំបូងឡើយពេលដែល Cast និងឱ្យសេណារីយ៉ូរឿងទៅអ្នកទាំងពីរនោះ ខ្ញុំធ្លាប់បាននិយាយជាមួយ Tom និង Zendaya រៀងៗខ្លួនដោយដាស់តឿនអ្នកទាំងពីរថាកុំទាក់ទងគ្នា កុំព្យាយាមទៅដល់ចំណុចនោះឱ្យសោះ។ ខ្ញុំក៏ធ្លាប់ផ្ដល់ដំបូន្មានបែបនេះដល់ Andrew និង Emma ព្រោះវាអាចនឹងបង្កើតឱ្យមានបញ្ហាស្មុគស្មាញបាន តែពួកគេព្រងើយកន្តើយហើយមិនស្ដាប់តាមសម្ដីខ្ញុំ»
យោងតាមសម្ដីរបស់ផលិតករខាងលើ អ្នកគាំទ្រមានតែរង់ចាំតាមដានជាបន្តទៀតថាតើ កំលោះ Tom ដែលជាតួអង្គ Spider Man ចុងក្រោយគេរូបនេះនឹងអាចដើរតាមស្នាមជើងចាស់របស់រៀមច្បង ស្រលាញ់គ្នាហើយក៏បែកគ្នាវិញក្រោយរឿងថតនិងបញ្ចាំងចប់ដែរទេ? ប៉ុន្តែអ្នកគាំទ្រដែលស្រលាញ់ចូលចិត្តតារាទាំងពីរខាងលើនេះ បានបន់ស្រន់កុំឱ្យអ្វីដែលលោកស្រី Amy Pascal ខ្លាចថានឹងកើតឡើងដដែលក្លាយមកជាការពិត៕
