នៅពេលថ្មីនេះ តារាចម្រៀងស្រីថៃ Jannine Weigel ឬ Ploy Chompoo បានចេញមុខមកសម្រក់ទឹកភ្នែកនៅមុខអ្នកសារព័ត៌មាន និងអ្នកគាំទ្រ ដោយខ្លួននាងបានប្រកាសថា ដាក់ពាក្យបណ្ដឹងទៅកាន់តុលាការនៅប្រទេសម៉ាឡេស៊ី ដើម្បីប្ដឹងផលិតកម្មចាស់ យកថ្លៃសំណងជំងឺ និងខាតពេលវេលា ដែលខាងគីផលិតកម្មមិនបានគោរពតាមនូវអ្វីដែលបានចុះក្នុងកិច្ចសន្យាកុងត្រា។
តារាចម្រៀងស្រីទាក់ចិត្តយុវវ័យរូបនេះ បានចុះកិច្ចសន្យាកុងត្រាជាមួយផលិតកម្ម RedRecords ជាផលិតកម្មសហផលិតរវាងក្រុមហ៊ុន Air Asia និង Universal Music Group នៅសហរដ្ឋអាមេរិក។ ហើយផលិតកម្ម RedRecords ក៏បានសហផលិតជាមួយផលិតកម្មធំលំដាប់ពិភពលោកមួយទៀត គឺផលិតកម្ម Def Jam Recordings ដែលនៅក្នុងនោះមានកំពូលតារាចម្រៀងពិភពលោកដូចជា Justin Bieber, Kanye West, Alessia Cara ។ យ៉ាងណាមិញ តារាស្រី Jannine Weigel នៅក្នុងអំឡុងពេលពិភពលោកនេះស្ថិតក្នុងស្ថានភាពដ៏លំបាកនៃជំងឺកូវីដ១៩ ប៉ុន្ដែនាងថា ជីវិតរបស់គឺលំបាកខ្លាំងជាងនេះទៅទៀត ដោយសារតែ ភាគីផលិតកម្មខាងលើនេះ មិនបានគោរព និងធ្វើតាមនូវអ្វីដែលបានចុះក្នុងកិច្ចសន្យាចុងក្រោយនាអំឡុងពេលកូវីដនេះឡើយ ពោលគឺ ខាងផលិតកម្មបំពានលើកុងត្រា បណ្ដាលឱ្យជីវិតនាងជួបទុក្ខលំបាកធ្លាក់ដល់បាត។
នាង Jannine Weigel ឬ Ploy Chompoo បានអះអាងនៅមុខអ្នកសារព័ត៌មានថា នាងសម្រេចប្ដឹងភាគីផលិតកម្មចាស់ គឺជាការសម្រេចចិត្តចុងក្រោយដើម្បីបន្តអនាគតរបស់នាងក្នុងវិស័យចម្រៀងនេះ ព្រោះថា ក្ដីស្រម៉ៃ និងបំណងប្រាថ្នារបស់នាងបានត្រូវរលាយអស់ក្នុងរយៈពេល ២ឆ្នាំចុងក្រោយនេះហើយ។ នៅពេលនេះ តុលាការម៉ាឡេស៊ី បានទទួលពាក្យបណ្ដឹងនាងហើយ រង់ចាំតែទទួលដំណឹងបន្ដទៀតតែប៉ុណ្ណោះ។
គួររំលឹកដែរថា បទចម្រៀងចុងក្រោយដែលតារាចម្រៀងស្រីរូបនេះបានបញ្ចេញគឺបទ «Passcode» ដែលបានរួមការងារជាអ្នកសម្រួលតន្ដ្រីល្បី Tommy Brown ជាអ្នកធ្វើឱ្យភ្លេងឱ្យក្រុម BLACKPINK និងAriana Grande។ តែក្រោយមក នាងបានត្រូវបង្កកការងារជិត២ឆ្នាំ បន្ទាប់ពីបានហោះទៅ ម៉ាឡេស៊ី និងសហរដ្ឋអាមេរិក។ កត្តានេះ Jannine Weigel បានអះអាងថា ជាទង្វើឱ្យធ្វើទាល់ច្រក គ្មានបទចម្រៀងបញ្ចេញ គ្មានការងារតាមកម្មវិធីធំៗ គ្មានកម្រៃពីការចេញសម្ដែងរយៈពេលជិត ២ឆ្នាំ។ នៅពេលនេះ នាងបានក្លាយជាតារាចម្រៀងឯករាជ្យ នាងប្រកាសថា នាងអស់ប្រាក់ពីខ្លួនហើយ ព្រមទាំងត្រូវចំណាយថ្លៃមេធាវីការពារក្ដី និងចំណាយធ្វើបទចម្រៀងថ្មី ដើម្បីផ្ដើមជីវិតថ្មីជាបន្ដទៀតផងដែរ៕
