ខេត្តព្រះសីហនុ៖ នៅរសៀលថ្ងៃទី១៩ ខែធ្នូ ឆ្នាំ២០២១ ឯកឧត្តម គួច ចំរើន អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពខេត្តព្រះសីហនុ បាននាំយកប្រេងសាំង ប្រេងម៉ាហ៊្សូត ព្រមទាំងថវិការបស់សម្ដេចតេជោ ឧបត្ថម្ភជូនដល់កងកម្លាំងនៃកងរាជអាវុធហត្ថខេត្តព្រះសីហនុ ដែលបានខិតខំបំពេញការងារទទួលបានលទ្ធផលល្អជាបន្តបន្ទាប់។
ឯកឧត្តមអភិបាលខេត្ត មានប្រសាសន៍សុំកោតសរសើរ និងវាយតម្លៃខ្ពស់ចំពោះកងកម្លាំងរបស់យើង ទាំងថ្នាក់ដឹកនាំកងរាជអាវុធហត្ថ ក៏ដូចជាកងកម្លាំងដែលបានចូលរួមក្នុងបេសកកម្មអនុវត្តដោយផ្ទាល់ ក្នុងរយៈពេលប៉ុន្មានថ្ងៃនេះ ពិតជាមានភាពត្រឹមត្រូវ និងជាមោទនភាពនូវអ្វីដែលយើងបានធ្វើ។ យើងត្រូវបន្តបេសកកម្មនេះបន្តទៀតដូចភ្លៀងរលឹម ដើម្បីគ្រប់គ្រងអ្នកប៉ុនប៉ងប្រព្រឹត្តអំពើមិនគប្បី ដោយការប្រើប្រាស់អាវុធ និងសកម្មភាពចាប់ជម្រិត និងបង្ខាំងមនុស្សនៅទីនេះ ពួកគេនឹងឃ្លបខ្លាចបាក់ស្មារតី ដោយយើងជាអ្នកទទួលខុសត្រូវការពារសន្តិសុខ សណ្តាប់ធ្នាប់ជូនប្រជាពលរដ្ឋ និងភ្ញៀវទេសចរ។
ឯកឧត្តមអភិបាលខេត្ត បានដាក់ចេញនូវបទបញ្ជា៖ បើអ្នកទាំងនោះនៅបន្តប្រើប្រាស់អាវុធ កាន់កាប់អាវុធដោយខុសច្បាប់បន្តទៀត ហើយចង់ឱ្យរួចទោស ត្រូវប្រញាប់ប្រញាល់យកអាវុធប្រគល់ជូនសមត្ថកិច្ច ប្រសិនលាក់ទុកនៅក្នុងផ្ទះ ក្នុងឡានឬនៅជាប់ខ្លួននៅពេលសមត្ថកិច្ច រកឃើញនឹងត្រូវធ្វើការផ្តន្ទាទោសតាមផ្លូវច្បាប់ ។ បើជនបរទេសក្រៅពីជាប់ទោសតាមច្បាប់នៃព្រះរាជាណាចក្រកម្ពុជា និងត្រូវធ្វើការបណ្តេ ញចេញពីកម្ពុជាដោយមិនអនុញ្ញាតឱ្យចូលត្រឡប់មកវិញឡើយ។ យើងត្រូវមានភាពប្រាកដប្រជា ម៉ឺងម៉ាត់ ដោយមិនអនុញ្ញាតឱ្យអ្នកណាយ កទឹកដីរបស់យើងជាការលេងសើចអនាធិតេយ្យ ជាការប្រមាថមាក់ងាយដល់យើងទាំងអស់គ្នា ជាអ្នកមានបេសកកម្មគ្រប់គ្រងសន្តិសុខស ណ្តាប់ធ្នាប់ជូនប្រជាពលរដ្ឋនោះឡើយ។
ក្នុងនោះឯកឧត្តមអភិបាលខេត្តបាននាំយកប្រេងសាំង ២.០០០លីត្រ ប្រេងម៉ាហ៊្សូត ១.០០០លីត្រ និងថវិការបស់សម្តេចតេជោ ហ៊ុន សែន ចំនួន១០លានរៀល ដើម្បីលើកទឹកចិត្តដល់កងកម្លាំងកងរាជអាវុធហត្ថខេត្តព្រះសីហនុផងដែរ៕