ហ្វេនអ្នកស្រឡាញ់វិស័យដើរម៉ូដ និងហ្វេសសិន ច្បាស់ជាស្គាល់តារាម៉ូដែលស្រី មានកម្ពស់ខ្ពស់ សម្បុរខ្មៅស្រអែមជាក់ជាមិនខានគឺ កញ្ញា កេ ចាន់កេសី ជាតារាម៉ូដែលជើងចាស់មានការតស៊ូខ្លាំងក្នុងវិស័យនេះ។ ក្រៅពីអាជីពដើរម៉ូដ កញ្ញាក៏ជាតារាសម្ដែង មួយរូបដែលមានឈ្មោះប៉ោះសំឡេងដូចគ្នា។ ថ្មីៗនេះ សារព័ត៌មានត្រយងបានទទួលដំណឹងមកថា កញ្ញាបានងាកមកបើកថ្នាក់បណ្ដុះបណ្ដាលជំនាញដើរម៉ូដ និងថតរូបបែបហ្វេសសិន ហើយកំពុងទទួលបានការចាប់អារម្មណ៍យ៉ាងខ្លាំងពីសំណាក់ប្អូនៗជំនាន់ក្រោយ។
បើតាមការបង្ហោះជាផ្លូវការលើបណ្តាញសង្គមហ្វេសប៊ុកផ្លូវការរបស់កញ្ញាឱ្យឃើញថា ថ្នាក់បង្រៀនម៉ូឌែលកញ្ញា បានប្រកាសទទួលពាក្យចូលរៀន នឹងបង្រៀនលើផ្នែកសំខាន់ៗក្នុងវិស័យនេះដូចជា ការដើរម៉ូញដបែប High Fashion ការដើរបែបប្រពៃណីបុរាណ ដើរបែប Catwalks និងការដើរបែបបវរកញ្ញា ជាដើម ។ បន្ថែមលើនេះកញ្ញាក៏ភ្ជាប់ការបង្រៀនកាច់ស្ទាយថតរូបបែបហ្វេសសិនគ្រប់ទម្រង់ រួមទាំងការសម្តែងផងដែរ។ តារាស្រី កេ ចាន់កេសី បានប្រាប់អ្នកសារព័ត៌មានត្រយងថា មូលហេតុនៃការងាកមើលបង្រៀនប្អូនៗជំនាន់ក្រោយនេះ ព្រោះតែកញ្ញាចង់ឃើ់ញវិស័យនេះរីកចម្រើនខ្លាំងជាមុន និងចង់ចូលរួមជម្រុញវិស័យបង្ហាញម៉ូដនៅកម្ពុជាឱ្យកាន់តែប្រសើរឡើង នៅពេលវិស័យនេះកំពុងតែពុះកញ្ជ្រោលខ្លាំងរយៈពេលប៉ុន្មានឆ្នាំចុងក្រោយ។
តារាស្រីចាស់វស្សារមែងមានរូបម៉ូឌែលឥតខ្ចោះនៅក្របទស្សនាជាច្រើនរូបនេះ បានបង្ហាញជំហរទៀតថា កញ្ញាក៏ធ្លាប់មានគេរើសអើងរឿង ស្បែកខ្មៅ មុខមាត់មិនស្អាតជាដើម តែកញ្ញានៅតែជំនះពាក្យទាំងនោះបានរហូតបានជោគជ័យមកទល់បច្ចុប្បន្ននេះ។ រហូតមកទល់ពេលនេះ កញ្ញាទទួលបានកូនសិស្សជាច្រើននាក់ហើយ ក្នុងវគ្គបណ្ដុះបណ្ដាលជំនាញអាជីពមួយនេះ។ ក្រោយសិក្សាចប់ កូនសិស្សអាចប្រើជំនាញរបស់ខ្លួនដើម្បីសាងឈ្មោះនៅលើវិថីហ្វេសសិន ឬសិល្បៈ ដែលអាចទទួលបានប្រាក់ចំណូលច្រើន ដើម្បីចិញ្ចឹមជីវិតនាថ្ងៃអានាគត៕
