ប៉ុន្មានឆ្នាំចុងក្រោយនេះ តារាស្រី ថន លក្ខិណា បានបិទទំព័រជាតារាសម្ដែងហើយ និងងាកមកក្តោបបានតំណែងជាពិធីការិនីនៅក្នុងកម្មវិធីធំៗរបស់ស្ថានីយទូរទស្សន៍ហង្សមាស ដែលជាពិសេសកញ្ញាបានចាប់ដៃលោក ជា វិបុល បានច្រើនកម្មវិធី រួមទាំងកម្មវិធីប្រកួតប្រជែងផ្នែកសំនៀងលំដាប់ពិភពលោកទៀតផង ។
ទន្ទឹងនឹងសាងប្រជាប្រិយភាពផ្នែកពិធីការិនីល្បីឈ្មោះហើយ កញ្ញា ថន លក្ខិណា បានធ្វើឱ្យហ្វេនអ្នកគាំទ្រលាន់មាត់ថា ជាតារាស្រីពូកែថែរូបសម្រស់ខ្លាំងណាស់ ព្រោះថា ជិតរយៈពេល១០ឆ្នាំជាងមកនេះ ថន លក្ខិណា នៅតែរក្សារាងតូចច្រលឹង និងទម្រង់មុខតូចស្រួច បានដដែរ មិនប្រែប្រួល។ កញ្ញា ថន លក្ខិណា ក៏ត្រូវបានមហាជនកត់សម្គាល់ថា ជាតារាស្រីហ្វេសសិនមួយរូបដែរ ព្រោះកញ្ញានិយមតែងខ្លួនបែបប្លែកៗ មិនឱ្យជាន់គ្នាឡើយពីមួយឈុតទៅមួយឈុត។ នៅថ្ងៃទី ២២ ខែធ្នូ ឆ្នាំ២០២១នេះ ចំថ្ងៃខួបកំណើត កញ្ញា ថន លក្ខិណា ខណៈតារាស្រីរូបនេះបានតុបតែងខ្លួនជាទេពធីតាមានស្លាបពណ៌សដូចបក្សី និងគ្រងមកុដផ្កាស្មៅ ដែលមើលទៅចែងចាំងស្រស់ស្អាតតែម្ដង។
កញ្ញា ថន លក្ខិណា បានបង្ហោះរូបភាពរបស់ខ្លូនជាច្រើនសន្លឹកនៅហ្វេសប៊ុក ធ្វើឱ្យហ្វេនអ្នកគាំទ្រជាច្រើន ចូលទៅ Comment សរសើរពីសម្រស់របស់កញ្ញា និងជូនពរកញ្ញាក្នុងថ្ងៃខួបកំណើតផងដែរ។ គួររំលឹកដែរថា ក្រៅពីសមត្ថភាពសិល្បៈពុហជំនាញហើយនោះ កញ្ញា ថន លក្ខិណា ក៏បានអាចប្រើប្រាស់និយាយភាព ថៃ និងអង់គ្លេសបានយ៉ាងស្ទាត់ជំនាញ ក្នុងការងារជាពិធីការិនីថែមទៀតផង៕