កាលពីថ្ងៃច័ន្ទ ទី២០ ខែធ្នូ ឆ្នាំ ២០២១ មជ្ឈមណ្ឌលធនធានសោតទស្សន៍បុប្ផាណា បានរៀបចំពិធីសម្ពោធជាផ្លូវការនៃគម្រោង «ក្រឡេកមើលទន្លេមេង្គ៖ ការចូលរួមរបស់យុវជនក្នុងសហគមន៍តាមរយៈភាពយន្តឯកសារ» ក្រោមអធិបតីភាពរបស់ឯកឧត្ដម ហាប់ ទូច រដ្ឋលេខាធិការនៃក្រសួងវប្បធម៌និងវិចិត្រសិល្បៈ ឯកឧត្ដម នេត ភក្ដ្រា រដ្ឋលេខាធិការនៃក្រសួងបរិស្ថាន លោក Markus Bürli ប្រធានទីភ្នាក់ងារស្វីសសម្រាប់ការអភិវឌ្ឍនិងសហប្រតិបត្តិការ(SDC) លោកស្រី Gemma Hayman នាយិកាអង្គការ BBC Media Action ប្រចាំប្រទសកម្ពុជា និងលោក ជា សុភាព នាយកប្រតិបត្តិមជ្ឈមណ្ឌលបុប្ផាណា។
ផ្ដល់បទសម្ភាសន៍ប្រាប់អ្នកសារព័ត៌មានត្រយង លោក ជា សុភាព នាយកប្រតិបត្តិមជ្ឈមណ្ឌលបុប្ផាណា បានប្រាប់ថា គម្រោងនេះទទួលបានមូលនិធិពីទីភ្នាក់ងារអភិវឌ្ឍអន្តរជាតិនៃប្រទេសស៊ុយអែត(SIDA) និងទីភ្នាក់ងារស្វីសសម្រាប់ការអភិវឌ្ឍ(SDC) និងកិច្ចប្រតិបត្តិការ ដោយមានការគាំទ្រពីអង្គការ BBC Media Action ផ្តល់ប្រឹក្សាបច្ចេកទេសដោយ៖ WWF អង្គការអុកស្វាម អច្ឆរិយភាពនៃទន្លេមេគង្គ វេទិកានៃអង្គការមិនមែនរដ្ឋាភិបាល រដ្ឋបាលជលផល ក្រសួងបរិស្ថាន និង ក្រសួងវប្បធម៌និងវិចិត្រសិល្ប:។
លោកបន្ដថា គម្រោងនេះបានផ្តល់អាហារូបករណ៍ដល់យុវជនកម្ពុជាចំនួន១៥នាក់ ដែលមានអាយុចន្លោះពី១៨ឆ្នាំ ដល់៣០ឆ្នាំ ដើម្បីចូលរួមក្នុងវគ្គបណ្តុះបណ្តាលផ្នែកផលិតភាពយន្តឯកសារនិងពហុប្រព័ន្ធផ្សព្វផ្សាយ។ គោលបំណងសំខាន់របស់គម្រោងនេះ គឺផ្តល់ឱកាសឱ្យយុវជនជនកម្ពុជាចូលរួមនៅក្នុងសហគមន៍ តាមរយៈការផលិតភាពយន្តឯកសារ ដើម្បីស្វែងយល់ និងបង្ហាញពីបរិស្ថាន ជីវភាពរស់នៅ និងវប្បធម៌ របស់ប្រជាជនកម្ពុជា ដែលរស់នៅអាស្រ័យផលទៅលើទន្លេមេគង្គ។ គោលបំណងសំខាន់មួយទៀត គឺផ្សព្វផ្សាយភាពយន្តឯកសារដែលផលិតដោយយុវជនជ័យលាភីទាំង១៥រូបនៅក្នុងគម្រោងនេះ ដើម្បីជំរុញនិងបង្កើនការចូលរួមរបស់យុវជនជាច្រើនផ្សេងទៀតនៅក្នុងសហគមន៍របស់ខ្លួន។
មជ្ឈមណ្ឌលបុប្ផាណា នៅតែបន្តបោះជំហានរបស់ខ្លួនទៅមុខប្រកបដោយសុទិដ្ឋិនិយមលើការបណ្តុះបណ្តាលសមត្ថភាព និងជំនាញដល់យុវជនកម្ពុជា ដោយរួមបញ្ចូលទាំងយុវជនជនជាតិដើមភាគតិច នៅលើវិស័យភាពយន្តឯកសារ និងពហុប្រព័ន្ធផ្សព្វផ្សាយ។ នៅក្នុងឆ្នាំ២០២១នេះ បើទោះជាសកលោក ជាពិសេសប្រទេសកម្ពុជាបានទទួលរងនូវផលប៉ះពាល់ខ្លាំងនៃការរីករាលដាលនៃជំងឺកូវីដ-១៩ក៏ដោយ ក៏មជ្ឈមណ្ឌលបុប្ផាណា នៅតែបន្តពុះពារបន្តបេសកកម្មរបស់ខ្លួន ជាពិសេសការកសាងសមត្ថភាពយុវជនលើជំនាញផលិតភាពយន្តឯកសារនិងពហុប្រព័ន្ធផ្សព្វផ្សាយ ប្រកបដោយភាពជោគជ័យនិងស្មារតីទទួលខុសត្រូវ។ មជ្ឈមណ្ឌលបុប្ផាណាបានផ្តល់ជូននូវវិញ្ញាបនបត្របញ្ចប់ការសិក្សាដល់យុវជនកម្ពុជាចំនួន១២នាក់នៅក្នុងគម្រោង«ការអភិរក្សសត្វដំរីនិងបទពិសោធរបស់ជនជាតិដើមភាគតិចនៅកម្ពុជា»៕
រូបភាពពី ៖ មជ្ឈមណ្ឌលបុប្ផាណា