អ្នកនាង Kate Winslet ឬមហាជនពិសេសទស្សនិកជននៅកម្ពុជាហៅជាប់មាត់ថា Rose មិនអាចទប់ទឹកភ្នែកជាប់ ក្រោយអ្នកនាងបានវិលមកជួបមុខដៃគូចាស់និងជាមិត្តជិតស្និទ្ធិ លោក Leonardo DiCaprio វិញ បន្ទាប់ពីបែកខានបានជួបមុខគ្នារយៈពេល៣ឆ្នាំពេញព្រោះតែជំងឺ Covid-19 នេះបើយោងតាមការផ្សាយរបស់សារព័ត៌មាន Bangshowbiz។
តួឯកប្រុសស្រី Titanic បានស្គាល់និងរាប់អានគ្នា ចាប់តាំងពីអ្នកទាំងពីរបានចាប់ដៃគូសម្ដែងជាមួយគ្នាក្នុងរឿង Titanic កាលពីឆ្នាំ១៩៩៧ ដោយកាលណោះអ្នកទាំងពីរទើបតែមានវ័យជាង២០ឆ្នាំប្លាយប៉ុណ្ណោះ។ នៅក្នុងបរិបទជំងឹកូវីដ-១៩ Kate មិនបានជួបជាមួយនឹងមិត្តភក្ដិរបស់ខ្លួនឡើយ ដូច្នេះនៅពេលបានជួបមុខមិត្តសម្លាញ់ Leonardo អ្នកនាង Kate បានទទួលស្គាល់ថាខ្លួនមិនអាចទប់ទឹកភ្នែកជាប់ឡើយពេលបានជួបមុខគ្នាវិញនៅ Los Angeles នេះ។
«ខ្ញុំទប់ទឹកភ្នែកខ្លួនឯងមិនជាប់នោះទេ ពួកខ្ញុំស្គាល់គ្នាពាក់កណ្ដាលជីវិតហើយ។ ខ្ញុំពិបាកនឹងទៅកាន់ទីក្រុងញូវយ៉ក ចំណែកគាត់ក៏មិនងាយនឹងមកក្រុងឡុងដ៏ដែរ ដូច្នេះពិបាកណាស់ដែលពួកយើងអាចរកពេលញ៉ាំបាយល្ងាចឬផឹកកាហ្វេជាមួយគ្នា។ ពួកយើងមិនអាចចាកចេញពីប្រទេសដោយសារ Covid ដូចជាមិត្តភក្ដិផ្សេងៗទៀតដែលបែកគ្នាដែរ។ Leonardo គឺជាមិត្តភក្ដិរបស់ខ្ញុំ គេគឺជាមិត្តពិតប្រាកដរបស់ខ្ញុំ។ មិត្តភាពយើងគឺពេញមួយជីវិត»។
តារាសម្ដែងវ័យ៤៦ឆ្នាំ Kate Winslet បានសម្ដែងជាតួអង្គភ្នាក់ងារប៉ូលិសនៅក្នុងខ្សែភាពយន្តបែបស៊ើបអង្កេតរឿង «Mare of East Town» កាលពីដើមឆ្នាំ២០២១ ប៉ុន្តែអ្នកនាងមិនទាន់ច្បាស់ទេថានឹងសម្ដែងវគ្គទីពីរទៀតឬអត់នោះទេ៕