ដូចមហាជនបានដឹងមកហើយថា អ្នកនាង ទឹម រដ្ឋា គឺជាអតីតតារាបង្ហាញម៉ូដក្រុម Cambodia Super Model និងជាតារាសម្ដែងដ៏មានប្រជាប្រិយភាព។ ស្ថិតនៅក្នុងស្ថានភាពកូវីដ១៩នេះ តារាសម្ដែងស្រី ទឹម រដ្ឋា បានបាត់មុខពីសិល្បៈមួយរយៈ រហូតធ្វើឱ្យហ្វេនអ្នកគាំទ្រនឹករលឹកអ្នកនាងខ្លាំង។ កាត់មុខមួយរយៈនេះ ហ្វេនសង្ស័យថា អ្នកនាងប្រហែលជារៀបការហើយស្ងាត់ៗ និងសម្ញំខ្លួនរស់នៅជាមួយគូស្នេហ៍យ៉ាងសប្បាយចិត្តហើយមើលទៅ ព្រោះគូស្នេហ៍របស់អ្នកនាងលោក Jovany Antonio ក៏ជាម្ចាស់ក្រុមហ៊ុនអចលនទ្រព្យទាំងក្នុងនឹងក្រៅប្រទេស ដែលអាចឱ្យអ្នកនាងរស់នៅបានយ៉ាងសោយសុខ។
ក្នុងថ្ងៃបង្ហាញវត្តមាននៅសារមន្ទីរខ្លែង ក្នុងកម្មវិធីតាំងពិព័រណ៍សិល្បសហសម័យកម្ពុជា អ្នកនាង ទឹម រដ្ឋា បានប្រាប់អ្នកសារព័ត៌មានត្រយងថា ជាការពិតនៅក្នុងឆ្នាំនេះគឺអ្នកនាងពិតជាស្ងាត់ពីសិល្បៈមែន ក៏ប៉ុន្ដែអ្នកនាងបានត្រៀមអ្វីដែលថ្មីប្លែក ដើម្បីទុកជាការពញ្ញ្រាក់អារម្មណ៍ទៅកាន់អ្នកគាំទ្រ។ តែបើថាលួចរៀបការស្ងាត់ៗ មិនឱ្យមហាជនដឹងនោះ អ្នកនាង រដ្ឋា សូមបដិសេធជាដាច់ខាតថា នៅមិនទាន់រៀបការទេ តែក៏មិនរំលងប្រពៃណីដែរ។ អ្នកនាងថា កាលពី៥ឆ្នាំមុន អនាគតស្វាមីធ្លាប់បានរៀបគម្រោងសុំអ្នកនាងរៀបការ តែនៅមិនទាន់សម្រេច។ ដូច្នោះចូលដល់ឆ្នាំទី៦នេះ អាចនឹងអ្នកនាងជាអ្នកសុំស្វាមីរៀបការវិញ ដើម្បីហ្វេនបានភ្ញាក់អារម្មណ៍បន្ដិច។
ទាក់ទងជាមួយការងារសិល្បៈវិញ អ្នកនាង ទឹម រដ្ឋា អះអាថា នៅតែបន្ដរហូតមិនបោះបង់ទេ ទោះស្ថិតនៅក្នុងកាលៈទេសៈណាក៏ដោយ។ អ្នកនាងថា ថ្ងៃក្រោយទៅមុខទៀត អ្នកនាងនឹងអនាគតស្វាមី នឹងរួមគ្នាបោះជំហ៊ានទៅលើវិស័យអចលនៈទ្រព្យ ក៏ប៉ុន្ដែអ្នកនាងនឹងប្រើជំនាញរបស់អ្នកនាង ទាញប្រយោជន៍ពីការងារនោះ មកប្រើឱ្យវិស័យសិល្បៈវិញ ដើម្បីកាន់តែជំរុញ និងលើកកម្ពស់សិល្បៈខ្មែរឱ្យកាន់តែរីកចម្រើនទៀត។ អ្នកនាងថា ក៏ព្រោះតែសិល្បៈនេះហើយ ដែលធ្វើឱ្យមានឈ្មោះរបស់ ទឹម រដ្ឋា ហើយអ្នកនាងដាច់ខាតគឺមិនភ្លេចគុណសិល្បៈនោះទេ។
អំឡុងពេលកូវីដ១៩នេះ អ្នកនាងថា អ្នកនាងរៀនបានពីបទពិសោធន៍ជីវិតជាច្រើនរហូតដល់ពិបាកនឹងប្រាប់ ព្រមទាំងធ្វើអ្វីថ្មីៗជាច្រើនទៀតសម្រាប់សិល្បៈ។ ចំពោះវិស័យហ្វេសសិន និងដើរម៉ូដវិញ នៅឆ្នាំ២០២២នេះ អ្នកនាង និងក្រុម Cambodia Super Model នឹងវិលត្រឡប់មកវិញ ក្នុងការដើរបង្ហាញម៉ូដពេជ្រឱ្យក្រុមហ៊ុនដ៏ធំមួយ៕