បន្ទាប់ពីខាងផលិតកម្មកាឡាក់ស៊ីណាវ៉ាត្រាបានប្រកាសកម្មវិធី «បុណ្យភូមិសៀមរាប » កាលពីថ្ងៃទី២៤ ខែធ្នូ ឆ្នាំ២០២១នេះ តាមរយៈវីដេអូផ្សព្វផ្សាយរបស់ផលិតកម្ម បានធ្វើឱ្យអ្នកលេងបណ្ដាញសង្គម និងមហាជនមួយចំនួន មានការភ័ន្ដច្រឡំជាមួយកម្មវិធីបុណ្យភូមិ ឬឡេឡេបុណ្យភូមិ របស់ភ្លើងគប់ ដែលតែងប្រារព្ធធ្វើឡើងនាអំឡុងខែមេសា មុនរដូវបុណ្យចូលឆ្នាំប្រពៃណីខ្មែរ។ ប្រភពអ្នកលេងបណ្ដាញសង្គមនឹកស្មានថា «បុណ្យភូមិសៀមរាប » ជាការសហការរវាងផលិតកម្មកាឡាក់ស៊ី និងភ្លើងគប់ ជាអ្នករៀបចំកម្មវិធីកម្សាន្ដចុងឆ្នាំនេះឡើង។
បើតាមការប្រកាសរបស់ភាគីក្រុមរៀបចំបុណ្យភូមិដោយភ្លើងគប់បានអះអាងថា គណៈកម្មាធិការប្រារព្ធមហោស្រពបុណ្យភូមិនៃក្រុមភ្លើងគប់ជូនដំណឹងថាកម្មវិធី «ប្រគំតន្ត្រីខាងលើ ពុំមែនស្ថិតនៅក្រោមការដឹកនាំ និងរៀបចំឡើងរបស់ គណៈកម្មាធិការមហោស្រពបុណ្យភូមិនោះទេ និងមិនទទួលខុសត្រូវលើសកម្មភាពនានា គ្រប់រូបភាពនៃកម្មវិធីប្រគំតន្ត្រីខាងលើនេះឡើយ»។ ប្រភពនេះបានបន្ដទៀតថា ខាងភាគីភ្លើងគប់ បានអំពាវនាវឱ្យអ្នកគ្រប់គ្រងកម្មវិធី «បុណ្យភូមិសៀមរាប» ចេញការបកស្រាយពន្យល់ទៅកាន់មហាជនឱ្យបានច្បាស់លាស់ និងចាត់វិធានការជា ប្រញាប់ ដោយលុបចេញរាល់រូបភាព និងវីដេអូ នៃទិដ្ឋភាព ពីមហោស្រពបុណ្យភូមិ ដែលបានផ្សាយចេញ។ ក្នុងករណីដែលមិនមានការឆ្លើយតបនូវសំណើរខាងលើ គណៈកម្មាធិការប្រារព្ធមហោស្រពបុណ្យភូមិ នៃ ក្រុមភ្លើងគប់ នឹងចាត់វិធានការតាមផ្លូវច្បាប់ ដោយចោទប្រកាន់ការរំលោភកម្មសិទ្ធិបញ្ញា និងយកប្រើប្រាស់ជាប្រយោជន៍ ពាណិជ្ជកម្មចំពោះ ក្រុមហ៊ុនខ្លួន។
បន្ទាប់មានការជូនដំណឹងពីខាងភាគីភ្លើងគប់ហើយនោះ លោក យឹម តាស្រង់ ជាអ្នកគ្រប់គ្រងកម្មវិធី «បុណ្យភូមិសៀមរាប» ក៏បានចេញការបកស្រាយថា «គោរពជម្រាបសួរទៅដល់គណៈកម្មការបុណ្យភូមិ ភ្លើងគប់ជាទីគោរព ក្នុងនាមខ្ញុំបាទ យឹមតាស្រង់ ជាអ្នកគ្រប់គ្រងកម្មវិធី “បុណ្យភូមិសៀមរាប” សូមបកស្រាយជម្រាបជូនទៅដល់គណៈកម្មការទាំងអស់ថា “បុណ្យភូមិសៀមរាប” សំដៅទៅលើការធ្វើពិធីបុណ្យនៅក្នុងភូមិ ដែលផ្ដោតទៅលើ បងប្អូនខេត្តសៀមរាបទាំងមូល ដែលមានទាំងវប្បធម៌ និងម្ហូបទាំង១២ក្រុងស្រុកដែលត្រូវយកមកបង្ហាញ។ ហើយពាក្យថា”បុណ្យភូមិសៀមរាប” ពួកយើងមិននឹកស្មានថាមានការបង្ហោះថាជាប់កម្មសិទ្ធិបញ្ញាឡើយ ហើយដោយឡែក”បុណ្យភូមិសៀមរាប” គឺជាការពិតកើតឡើងដោយក្រុមការងារបុណ្យភូមិសៀមរាមទាំងស្រុង ហើយការធ្វើទៅបានដោយមានការជ្រោមជ្រែងពីក្រុមហ៊ុន Galaxy Navatra Group ។ ពាក្យថា (បុណ្យ) គឺជាគុណ គ្រឿងជម្រះសន្ដានចិត្ត កុសលអំពើល្អ សេចក្ដីសុខ ការធ្វើបុណ្យ របស់វចនានុក្រមខ្មែរ សម្ដេចសង្ឃ ជួនណាតដែលប្រជាជនទូទៅមានសិទ្ធិក្នុងការប្រើប្រាស់។ ភូមិ គឺ សំដៅទៅលើ ទីប្រជុំ ផ្ទះ លំនៅ ក្នុងតំបន់នីមួយ។ ឯពាក្យ (សៀមរាប) ជាឈ្មោះខេត្ត ដែលយើងប្រារព្ធធ្វើកម្មវិធី ព័ត៌មានសម្រាប់ អ្នកចូលរួម បានដឹង ថាកម្មវិធីធ្វើទៅក្នុងខេត្តសៀមរាប។ ទើបធ្វើឲ្យក្រុមការងារទាំងអស់ ប្រើពាក្យថា (បុណ្យភូមិសៀមរាប) តែបើពាក្យនេះជាប់កម្មសិទ្ធិបញ្ញា របស់ក្រសួងពាណិជ្ជកម្ម ឬកម្មសិទ្ធិបញ្ញា មែនដែលមិនឲ្យប្រើ ខ្ញុំបាទនិងគោរពតាមច្បាប់ នឹងឲ្យអ្នកច្បាប់សិក្សា ស្រាវជ្រាវលំអិត ពីបញ្ហាផ្លូវច្បាប់ »។
តែយ៉ាងណាមិញ បន្ទាប់ពីលោក យឹម តាស្រង់ បានធ្វើការបកស្រាយចំពោះកម្មវិធី «បុណ្យភូមិសៀមរាប » គេនៅមិនទាន់ឃើញខាងផលិកម្មកាឡាក់ស៊ីណាវ៉ាត្រា ចេញសេចក្ដីជូនដំណឹង ឬលុបវីដេអូផ្សព្វផ្សាយដែលមានទិដ្ឋភាពពីមហោស្រពបុណ្យភូមិរបស់ភ្លើងគប់នៅឡើយទេ។ អ្នកគាំទ្ររំពឹងថា ផលិកម្មកាឡាក់ស៊ីណាវ៉ាត្រានឹងមានចំណាត់ការល្អ។ គួរឱ្យដឹងថា បុណ្យភូមិសៀមរាប នឹងធ្វើឡើងក្នុងទឹកដីស្រុកបន្ទាយស្រី ក្នុងទីតាំងគម្រោងអភិវឌ្ឍន៍ដីឡូតិ៍លំនៅឋានឡេងណាវ៉ាត្រា នៅថ្ងៃទី៣១ ខែធ្នូ ឆ្នាំ២០២១ ក្នុងតម្លៃសំបុត្រ ៥០០០ រៀល៕