ភ្នំពេញ៖ ប្រទេសកម្ពុជានឹងចុះត្រជាក់ លាយឡំជាមួយនឹងខ្យល់រដូវ ក្នុងនោះបណ្ដាខេត្តជាប់ជួរភ្នំដងរែក និងខ្ពង់រាបឦសាន សីតុណ្ហភាពអាចនឹងចុះដល់ ១៦អង្សាសេ ចាប់ពីថ្ងៃទី ២៩ ខែ ធ្នូ ឆ្នាំ ២០២១ រហូតដល់ថ្ងៃទី ០៤ ខែ មករា ឆ្នាំ ២០២២។
យោងតាមសេចក្ដីជូនដំណឹង ស្ដីពីស្ថានភាពអាកាសធាតុ របស់ក្រសួងធនធានទឹក និងឧតុនិយម បានឲ្យដឹងនៅថ្ងៃទី២៨ ខែធ្នូ ២០២១ថា ទ្រនុងសម្ពាធខ្ពស់ពីប្រទេសចិន បាននឹងកំពុងរំកិលចុះមកក្រោមដោយគ្របដណ្ដប់លើកម្ពុជា ជាមួយនឹងខ្យល់មូសុងឦសានបក់ក្នុងកម្រិតពីមធ្យមទៅបង្គួរ ដែលស្ថានភាពបែបនេះនឹងធ្វើឱ្យបណ្ដាខេត្តនៅតំបន់វាលទំនាបកណ្ដាល សីតុណ្ហភាពអប្បបរមា មានពី ១៨-២០ អង្សាសេ និងអតិបរមា មានពី ២៨-៣០ អង្សាសេ, មានអាកាសធាតុត្រជាក់ លាយឡំជាមួយនឹងខ្យល់រដូវបក់ក្នុងកម្រិតពីមធ្យមទៅបង្គួរ ។
ដោយឡែក បណ្ដាខេត្តដាប់ជួរភ្នំដងរែក និងខ្ពង់រាបឦសាន សីតុណ្ហភាពអប្បបរមា មានពី ១៦-១៨ អង្សាសេ និងអតិបរមា មានពី ២៧-២៩ អង្សាសេ, មានអាកាសធាតុត្រជាក់ លាយឡំជាមួយនឹងខ្យល់រដូវបក់ក្នុងកម្រិតពីបង្គួរទៅខ្លាំង ។
ចំណែកតំបន់មាត់សមុទ្រ សីតុណ្ហភាពអប្បបរមា មានពី ១៩-២១ អង្សាសេ និងអតិបរមា មានពី ២៨-៣០ អង្សាសេ, មានអាកាសធាតុត្រជាក់ លាយឡំនឹងខ្យល់រដូវបក់ក្នុងកម្រិតមធ្យម ។ ទន្ទឹមនោះរលកសមុទ្រក៏មានកម្ពស់ជាមធ្យមផងដែរ ៕