រហូតមកទល់ចុងឆ្នាំ២០២១នេះ តារាសម្ដែងទម្រង់មុខកូនកាត់ ផាន់ ផាត់ណា នៅតែមិនទាន់ហ៊ានបញ្ចេញមុខស្វាមីឱ្យមហាជនបានស្គាល់នោះទេ ទោះបីអ្នកនាង និងស្វាមីមានកូនមួយពិតមែនក៏ដោយ។ បើសិនជាមិនរំលឹកដល់ស្វាមីនោះទេ អ្នកនាង ផាន់ ផាត់ណា ច្បាស់ជាធ្វើឱ្យហ្វេនអ្នកគាំទ្រមើលមិនដឹងឡើយថា អ្នកនាងជាតារាស្រីដែលមានប្ដីហើយ ព្រោះថា អ្នកនាងនៅតែលេងខ្លួនស្រស់ស្អាត ដងខ្លួនស្រលូន សាច់សខ្ចី និងបញ្ចេញភាពសិចស៊ី បង្ហាញដើមទ្រូងទ្រលុកទ្រលន់មិនចាញ់ក្រមុំៗឡើយ។
តារាស្រីរូបនេះព្យាយាមមិនបង្ហាញពីសម្ព័ន្ធស្នេហារវាងនាងនឹងស្វាមីទេ សូម្បីតែអ្នកសារព័ត៌មានខំប្រឹងជីគកកាយយ៉ាងណាក៏ដោយ ក៏អ្នកនាងអះអាងថា នៅតែរង់ចាំពេលសមរម្យមកដល់ ទើបបានបង្ហាញ។
ឆ្លើយប្រាប់អ្នកសារព័ត៌មានត្រយង តារាស្រី ផាន់ ផាត់ណា បានរៀបរាប់ថា «មួយរយៈចុងក្រោយនេះ គឺខ្ញុំរវល់ជាមួយការងារសិល្បៈច្រើន ដូចជាការងារស្ពត និងការងារភាពយន្ដតែម្ដង។ នៅក្នុងឆ្នាំថ្មីខាងមុខនេះ គឺនាងខ្ញុំមានរឿងភាគ ១រឿង ដែលទើបតែទទួលបានភ្លាមៗពីអ្នកដឹកនាំរឿង។ នាងខ្ញុំមិនសូវជាទទួលថតរឿងភាគច្រើនទេ ដោយសារតែពេលវេលាមិនសូវមានគ្រប់គ្រាន់។ ហើយនៅក្នុងឆ្នាំថ្មីនេះ នាងខ្ញុំកំពុងព្យាយាមពង្រឹងលើការរកស៊ីផ្ទាល់ខ្លួន និងឆ្លៀតពេលមួយចំនួនដើម្បីមកធ្វើការងារសិល្បៈតែប៉ុណ្ណោះ»។ អ្នកនាងបានបន្ដថា «ចំពោះរឿងស្វាមី គឺមិនអាចនឹងលាក់ពីអ្នកគាំទ្ររហូតបានទេ ប្រសិនបើមានពេលវេលាសមរម្យណាមួយ ដែលនាងខ្ញុំអាចបញ្ចេញបាន នោះនាងខ្ញុំនឹងបង្ហាញមុខស្វាមីឱ្យហ្វេនបានស្គាល់តែម្ដង»។
អ្នកនាង ផាន់ ផាត់ណា អះអាងថា ស្វាមីអ្នកនាងមិនមែនជាជនជាតិខ្មែរនោះទេ ហើយអ្នកនាងក៏មិនមែនជាកូនកាត់ដែរ ក៏ប៉ុន្ដែកូនប្រុសរបស់អ្នកនាងទើបជាកូនកាត់ពិតប្រាកដ។ អ្នកនាងថា កូនប្រុសអ្នកនាងកាន់តែធំធាត់ជាងមុនហើយ ព្រោះពេលនេះមានវ័យ ២ឆ្នាំ ហើយជាពិសេសមុខមាត់កូនប្រុសនាង ពិតជាគួរឱ្យស្រលាញ់ និងស្រស់សង្ហាមិនចាញ់ប៉ាប៉ាឡើយ។ អ្នកនាងថា បើមានពេលទំនេរច្រើន និងមានឱកាសល្អ អ្នកនាងនឹងយកកូនទី ២ ទី៣ បន្ដទៀត ព្រោះអ្នកនាងមិនអាចមានកូនតែម្នាក់បានទេ គឺអ្នកនាងស្រឡាញ់កូនច្រើន។
តារាស្រី ផាន់ ផាត់ណា ក៏បានបញ្ជាក់ដែរថា អ្នកនាងនឹងរៀបចំគម្រោងធ្វើកម្មវិធីជួបជុំជាមួយអ្នកសិល្បៈ ហើយពេលនោះ អ្នកនាងនឹងបើកបង្ហាញមុខស្វាមី ឱ្យមហាជនអ្នកគាំទ្របានស្គាល់តែម្ដង។
តែយ៉ាងណាមិញ តារាស្រី ផាន់ ផាត់ណា មិនទាន់បញ្ជាក់ឱ្យច្បាស់បាននោះទេថា កម្មវិធីនឹងធ្វើឡើងនៅពេលណា ដោយសារតែសព្វថ្ងៃនេះអ្នកនាងកំពុងមមារញឹកនឹងការងារសិល្បៈ និងមុខរបររកស៊ីក្នុងដៃផងដែរ៕
ទស្សនាវីដេអូ Big News៖