Dilraba Dilmurat បានបង្ហើបឱ្យសាធារណជនដឹងថាម្ដាយរបស់កញ្ញាបង្ខំឱ្យកញ្ញាការប្ដី ព្រោះបារម្ភខ្លាចកញ្ញាចាស់ទៅ គ្មានអ្នកណាចង់រៀបការជាមួយកញ្ញា។
នៅក្នុងកម្មវិធីដែលផ្សាយលើ QQ កាលពីចុងសប្ដាហ៍មុន តារាសម្ដែងវ័យ២៩ឆ្នាំ បាននិយាយថាម្ដាយរបស់កញ្ញា ឧស្សាហ៍ទូរស័ព្ទមកកញ្ញាហើយរំលឹករឿងនេះជាញឹកញាប់។ ម្ដាយរបស់តួឯកស្រី «You are my glory» ធ្លាប់ប្រាប់កូនស្រីថាបើចាំពីរទៅបីឆ្នាំទៀត ច្បាស់ជាគ្មានប្រុសណាចង់រៀបការជាមួយនឹងកញ្ញាឡើយ។ មានម្ដងនោះ Dilraba បានឆ្លើយតបទៅម្ដាយរបស់កញ្ញាដោយទំនុកចិត្តថា «ម៉ាក់ មនុស្សដូច Dilraba រឿងអីត្រូវនៅឯកោ?» ប៉ុន្តែម្ដាយកញ្ញាខឹងយ៉ាងខ្លាំងហើយនិយាយថា «បើសិនកូនឯងមិនព្រមរៀបការ ម៉ាក់ក៏មិនត្រូវការកូនដូចគ្នា»។
តួឯកស្រីរូបនេះធ្លាប់បង្ហើបឱ្យដឹងថាកញ្ញាចង់រៀបការនិងមានកូនក្រោយអាយុ៣០ឆ្នាំ។ កញ្ញាក៏ធ្លាប់គិតពីបញ្ហាដែលកញ្ញានឹងបាត់បង់អ្នកគាំទ្របើសិនជាកញ្ញារៀបការផងដែរ ប៉ុន្តែកញ្ញាគិតថាគួរតែដល់ពេលហើយដែលកញ្ញាជ្រើសរើសគ្រួសារជាជាងអាជីពការងារ។ «ខ្ញុំពេញចិត្តណាស់ចំពោះឱកាសការងារក្នុងពេលបច្ចុប្បន្ន ប៉ុន្តែបើថ្ងៃណាមួយខ្ញុំលែងល្បីទៀតហើយនោះ ខ្ញុំធ្វើការងារបែបផ្សេង ហើយរស់នៅក្នុងលក្ខខណ្ឌផ្សេងដូចគ្នា»។ តាមដឹងចាប់ពីឆ្នាំ២០១៣ ឆ្នាំដែលកញ្ញាចូលប្រឡូកក្នុងវិស័យសិល្បៈ កញ្ញាមិនដែលប្រកាសពីរឿងមានមិត្តប្រុសឡើយ។
កាលពីឆ្នាំ២០១៩ កញ្ញាធ្លាប់ប្រាប់ថាកញ្ញាមិនបានទិញផ្តះនោះទេព្រោះកញ្ញាស្នាក់នោះសណ្ឋាគារ ម្យ៉ាងវិញទៀតកញ្ញាក៏គ្មានពេលដើរមើលកន្លែងនិងតុបតែងផ្ទះដែរ។ Dilraba កើតនៅឆ្នាំ១៩៩២ ក្នុងខេត្ត Xinjiang នៅក្នុងគ្រួសារដែលប្រតិបត្តិទំនៀមទំលាប់យ៉ាងតឹងរ៉ឹង។ កញ្ញារៀនព្យ៉ាណូ វីយូឡុង និងរាំ តាំងពីវ័យក្មេង។ នៅឆ្នាំ២០១៣ កញ្ញាបានប្រឡូកចូលការសម្ដែងរឿងភាគជាលើកដំបូង ដោយកាលណោះកញ្ញាត្រូវបានអ្នកទស្សនាសរសើរពីរូបសម្រស់ដ៏ស្អាតនិងទាក់ទាញរបស់កញ្ញា។
ថ្វីត្បិតតែ Dilraba មានរូបស្អាតប៉ុន្តែពេលសម្ដែងរឿងដំបូងៗកញ្ញារងនូវការរិះគន់ច្រើនដោយសារតែសមត្ថភាពសម្ដែងរបស់កញ្ញានៅមិនទាន់ពេញលេញ យ៉ាងណាមិញប៉ុន្មានឆ្នាំចុងក្រោយនេះ Dilraba ទទួលបានការកោតសរសើរច្រើនពីអ្នកជំនាញចំពោះសមត្ថភាពសម្ដែងដែលមានការអភិវឌ្ឍរបស់កញ្ញយ៉ាងខ្លាំង៕
ទស្សនាវីដេអូ Big News៖