ហ្វេនអ្នកគាំទ្រពិតជាកោតសរសើរជាមួយនឹងការចិញ្ចឹមបីបាច់មើលថែកូនភ្លោះទាំងពីររបស់អ្នកម្តាយសម័យថ្មី ព្រមទាំងជាតារាល្បីលំដាប់ប្រទេសថៃ គឺអ្នកនាង Chompoo Araya។ បើទោះបីជាតារាស្រីជួរមុខរបស់ថៃរូបនេះ មិនសូវជាមានពេលទំនេរក៏ដោយចុះ តែអ្នកនាងនៅតែមើលកូនភ្លោះរបស់អ្នកនាងដោយដៃផ្ទាល់តែម្ដង។ ក្នុងវ័យ ៤០ ឆ្នាំរូបនេះ នាងសុខចិត្តផ្អាកការងារក្នុងវិស័យសិល្បៈ ដើម្បីចំណាយពេលចិញ្ចឹមកូនទាំងពីរដោយផ្ទាល់ដៃ និងចំណាយពេលមើលថែរក្សាសុខភាពបន្ថែមទៀត ព្រោះនាងកំពុងតែពពរកូនទី។ យ៉ាងណាមិញហ្វេនអ្នកគាំទ្រច្បាស់ជាចង់ដឹងណាស់ថា តើតារាស្រី Chompoo Araya មានបទពិសោធន៍ចិញ្ចឹមកូនភ្លោះបែបណាខ្លះ?
តារាស្រី Chompoo Araya បានរៀបរាប់ប្រាប់ហ្វេនអ្នកគាំទ្រថា វិធីចិញ្ចឹមកូនរបស់នាងគឺបណ្ដោយតាមធម្មជាតិរបស់ក្មេង ដោយមិននិយាយសម្ដីធ្ងន់ ឬបង្ខំឱ្យកូនធ្វើនេះធ្វើនោះ នោះទេ ព្រោះក្មេងគឺជាប្រៀបដូចក្រដាសសអីចឹង យើងអាចគូររូបភាពល្អៗ សម្ដីល្អ ថ្នាក់ថ្នមគាត់ឱ្យមានភាពកក់ក្ដៅ។ អ្នកនាងថា ក្មេងៗចូលចិត្តរត់លេង ព្រោះក្មេងនៅវ័យនេះ គឺចង់ឱ្យឪពុកម្ដាយចាប់អារម្មណ៍គាត់ សរសើរគាត់ និងស្វែងយល់ពីអ្វីដែលគាត់កំពុងតែចម្រើនវ័យធំឡើង។ អ្នកនាងថា ដូច្នោះក្នុងនាមជាម្ដាយសម័យថ្មី គឺត្រូវសង្កេតនូវអ្វីដែលកូនកំពុងចង់បាន ថាតើគាត់សម ឬមិនស័ក្ដសមជាមួយការចង់បានបែបនោះ។
អ្នកនាង Chompoo Araya បានបន្ដថា កាយវិការរបស់កូនភ្លោះអ្នកនាង គឺមានភាពផ្លាស់ប្ដូររហូតទៅតាមពេលវេលា ហើយបើទោះជាពួកគាត់ជាកូនភ្លោះពិតមែន តែមិនមែនមានន័យថា ពួកគាត់សុទ្ធតែមានអារម្មណ៍ដូចគ្នា កាយវិការ និងការចង់បានដូចគ្នានោះទេ។ ពេលខ្លះគាត់ចាប់អារម្មណ៍របស់តែមួយដូចគ្នា តែដល់ពេលយើងសង្កេតអំពីនិស្ស័យរបស់កូនម្នាក់ៗ គឺការចាប់អារម្មណ៍របស់ពួកគាត់ម្នាក់ៗគឺខុសៗគ្នាទៅវិញ ទៅតាមស្ថានការណ៍ផ្សេង។ នាងថា ពេលខ្លះនាងចំណាយពេលនាំកូនភ្លោះទាំងពីរនាក់ធ្វើកិច្ចការសកម្មភាពសប្បាយៗដូចជា មើលលោកយាយធ្វើម្ហូប លេងទឹកនៅមុខផ្ទះ ចេញទៅជិះកង់ ទៅសួនសត្វនិងបង្រៀនពួកគាត់នូវសកម្មភាពផ្សេងដែលគាត់មិនធ្លាប់ធ្វើពីមុន ឱ្យគាត់សាកល្បងធ្វើវា ដើម្បីបណ្ដុះស្មារតីគាត់ឱ្យរឹងមាំ។ អ្នកនាងថា រាល់ពេលគឺនាងចូលចិត្តនិយាយហេតុផលផ្សេងៗឱ្យកូនស្ដាប់និងឆាប់យល់។
អ្នកនាង Chompoo Araya បានបញ្ជាក់ទៀតថា ក្នុងឋានៈជាម្ដាយមួយរូប បើទោះបីត្រូវចិញ្ចឹមកូនដោយសញ្ជាតិញាណក៏ដោយ តែអ្នកនាងបារម្ភ និងយកចិត្តទុកដាក់ជាងគេបំផុតនោះគឺ សុខភាពរបស់កូន។ អ្នកនាងព្យាយាមផ្ដល់អាហារដល់ពួកគេដែលមានវីតាមីនបង្កើនប្រពន្ធភាពស៊ាំរឹងមាំ និងព្យាយាមឱ្យពួកគេចេញមកស្រូបខ្យល់អាកាសនៅក្រៅផ្ទះ មិនមែនសម្ងំតែក្នុងបន្ទប់ឡើយ។ អ្នកនាងថា ប្រយ័ត្នបំផុតគឺរឿងអនាម័យរបស់កូន ព្រោះក្មេងៗងាយឆ្លងជំងឺដែលបណ្ដាលពីបាក់តេរី និងវីរុស ដែលមើលមិនឃើញក្នុងភាពកខ្វក់៕
