តារាចម្រៀង និងជាអ្នកនិពន្ធវ័យក្មេង លោក ម៉ុង ម៉ានិត ថ្មីៗនេះបានផ្ញើសារលើកទឹកចិត្តទៅកាន់អ្នកគាំទ្ររបស់លោក ដោយលោកទម្លាយថា កាលពីមុនលោកជាមនុស្សរស់នៅក្នុងភាពអៀនខ្មាស ហើយត្រូវមនុស្សជាច្រើនយករូបរាងរបស់លោក មកលេងសើច។
ដោយសារតែលោកធាត់លើសខ្លាញ់ និងជាតិអាស៊ីតច្រើន ទើបលោកសម្រេចចិត្តហាត់ប្រាណ តែមិនមែនដើម្បីអ្នកណានោះឡើយ គឺដើម្បីសុខភាពដែលលោកចង់បានតែប៉ុណ្ណោះ។ នៅក្នុងវីដេអូ Tik Tok របស់លោក ម៉ានិត លោកបានដាក់ចំណងជើងថា «សារលើកទឹកចិត្តសាមញ្ញ ពីខ្ញុំ » វាពិតជាធ្វើឱ្យអ្នកស្ដាប់ និងទស្សនាហើយ មានកម្លាំងចិត្ត និងលែងខ្វល់ពីសម្ដីប្រមាថរបស់អ្នកដទៃ ពោលគឺលើកទឹកចិត្តឱ្យគ្រប់គ្នាស្រឡាញ់ភាពជាខ្លួន។
លោកម៉ានិត បានរៀបរាប់ថា កាលលោកកាលពីក្មេងលោកមានក្ដីសម្រៃចង់ក្លាយជាតារាចម្រៀង អ្នកនិពន្ធ និងនិពន្ធបទភ្លេង តែលោកមិនបានដឹងថា ក្ដីស្រម៉ៃរបស់លោកនឹងធ្វើឱ្យលោកឈឺចាប់នៅថ្ងៃណាមួយនេះទេ។ លោកថា គ្រប់កម្មវិធីទូរទស្សន៍ គ្រប់ឆាកតន្ត្រី គ្រប់ទីកន្លែង ពួកគេតែងតែលេងសើច និងបង្អាប់លើរូបរាងរបស់លោក ព្រោះតែលោកធាត់។ គេថាលោកមិនស័ក្ដសមធ្វើជាតារាចម្រៀងនោះទេ គឺសមតែនៅផ្ទះបុកគ្រឿងទៅល្អជាង។ នៅដែលលោកញ៉ាំអាហារ ពួកគេតែងតែលួចថតលោក រួចយកទៅបង្ហោះលេងសើច។ នៅពេលដែលលោកដើរ ពួកគេថា លោកមិនគួរដើរឱ្យគេឃើញនោះទេ។
លោក ម៉ានិត តែងតែគិតក្នុងចិត្តថាខ្លួនឯងអន់ខ្លាំងណាស់ តែលោកនៅតែប្រឹងដើរទៅមុខមិនឈប់។ លោកសម្រេចចិត្តចូលហាត់ប្រាណ ហើយលោកថា មិនមែនព្រោះតែសម្ដីអ្នកដទៃ ឬដើម្បីអ្នកណានោះទេ លោកថា ដើម្បីខ្លួនលោក និងសុខភាពរបស់លោក។ នៅពេលដែលលោកទទួលបានរូបរាងថ្មី ធ្វើឱ្យអ្នកគាំទ្រជាច្រើនកោតសរសើរគ្រប់គ្នាថា រូបរាងរបស់ម៉ានិតមានភាពខុសប្លែកពីមុនដាច់ឆ្ងាយតែម្តង។ លោកថា លោកមិនបានស្គមខ្លាំងនោះទេ តែរូបរាងលោកស្រស់សង្ហាតែបែបរបស់លោក។
លោកបញ្ជាក់ថា សព្វថ្ងៃនេះលោកបានក្លាយតារាចម្រៀង និងជាអ្នកនិពន្ធល្បីឈ្មោះមួយរូប តែមិនមែនដោយសាររូបរាងលោកស្គម ឬសង្ហានោះទេ តែដោយសារតែសមត្ថភាពរបស់លោកពិតប្រាកដ។ លោកថា មិនមែនទាល់តែស្គមទើបអ្នកអាចក្លាយជាតារាបានទេ មិនមែនទាល់តែស្អាត ទើបអ្នកអាចសម្រេចគោលដៅបាននោះទេ ហើយក៏មិនមែនទាល់តែស ទើបអ្នកអាចក្លាយជាមនុស្សម្នាក់ដ៏អច្ចារ្យបាននោះទេ។ លោកថា លោកអាចធ្វើបានគ្រប់យ៉ាង ព្រោះលោកស្គាល់ថា ខ្លួនឯងជានរណា។ លោកលើកទឹកចិត្តឱ្យអ្នកគាំទ្រអស់ ស្គាល់ខ្លួនឯងឱ្យច្បាស់ នោះទើបសម្រេចគោលដៅដែលខ្លួនប្រាថ្នា និងសម្រៃចង់បាន៕
ទស្សនាវីដេអូ៖
@thisismanith សារលើកទឹកចិត្តសាមញ្ញ ពីខ្ញុំ
♬ original sound – manith_j
