តារាចម្រៀង LISA សមាជិកក្រុមចម្រៀង Blackpink ទើបតែត្រូវបានជ្រើសរើសដោយ TC Candler ជានារីដែលមានមុខមាត់ស្អាតជាងគេបំផុតចំណាត់ថ្នាក់លេខ១ក្នុងចំណោមនារី ដែលមានមុខមាត់ស្អាតទាំង១០០នាក់ ដូច្នេះហើយមិនចម្លែកនោះទេដែលមាននារីៗជាច្រើនប្រាថ្នាចង់មានមុខមាត់ដូចជានារីស្អាតរូបនេះ។
ក្នុងចំណោមអ្នកគាំទ្រដែលចង់មានមុខមាត់ដូចជា LISA នោះ មានអ្នកគាំទ្រជនជាតិវៀតណាមម្នាក់ ដែលសុខចិត្តចំណាយប្រាក់រហូតដល់ ១៥០លានដុង (ប្រមាណជាង៦ពាន់ដុល្លារ) ដើម្បីវះកាត់កែសម្ផស្សផ្ទៃមុខរបស់ខ្លួនដូចគ្នាទៅនឹង Lisa Blackpink។
យោងតាមសារព័ត៌មានក្នុងប្រទេសវៀតណាមបានផ្សាយថា នារីម្នាក់ដែលហ៊ានចំណាយប្រាក់ដើម្បីកែសម្ផស្សមុខរបស់ខ្លួននេះគឺជាអ្នកគាំទ្រម្នាក់របស់ LISA។ នារីម្នាក់នេះស្រលាញ់ LISA ខ្លាំងណាស់រហូតចង់ផ្លាស់ប្ដូរមុខមាត់ខ្លួនឯងតឱ្យដូចនឹងកញ្ញា LISA ហើយក្រោយពេលដែលខ្លួនកែសម្ផស្សរួចកញ្ញាបានចែករំលែករូបសម្រស់ថ្មីរបស់ខ្លួននៅលើ Social Media ធ្វើឱ្យគេសង្កេតឃើញថាមុខមាត់របស់នារីរូបនេះពិតជាស្រដៀងទៅនឹងតារាសំណព្វចិត្តរបស់កញ្ញាពិតប្រាកដមែន។
អ្នកគាំទ្រម្នាក់នោះមានត្របកភ្នែកពីរជាន់ ភ្នែកធំ ច្រមុះតូចស្ដើង និងបបូរមាត់ក្រាស់ ដែលសុទ្ធសឹងជាលក្ខណៈពិសេសរបស់ LISA។ សាមីខ្លួនបានបង្ហាញអារម្មណ៍ពេញចិត្តយ៉ាងខ្លាំងចំពោះលទ្ធផលក្រោយការវះកាត់កែសម្ផស្សលើកនេះ ទោះជាតម្លៃរាងថ្លៃបន្តិចក្ដី៕
