លោក Scott O’Donell អតីតគ្រូបង្វឹកក្រុមជម្រើសជាតិកម្ពុជា ចន្លោះឆ្នាំ២០០៥ដល់២០១០ ទទួលតំណែងថ្មីជានាយកបច្ចេកទេសរបស់សហព័ន្ធកីឡាបាល់ទាត់ម៉ាឡេស៊ី នៅដើមឆ្នាំ២០២២។ នេះបើតាមការជូនដំណឹងពីព័ត៌មានក្នុងស្រុករបស់ម៉ាឡេស៊ី ក្នុងសន្និសិទសារព័ត៌មាននៅថ្ងៃអង្គារ ទី៤ ខែមករា ឆ្នាំ២០២២។
នេះជាលើកទី២ហើយដែលបុរសវ័យ៥៤ឆ្នាំរូបនេះ ត្រឡប់ទៅកាន់ប្រទេសម៉ាឡេស៊ី ខណៈការធ្វើដំណើរទៅជាលើកដំបូងនៅចន្លោះឆ្នាំ១៩៩៤-១៩៩៥ ក្នុងនាមជាកីឡាកររបស់ក្រុម Kuala Lumpur FA។
លោក Scott O’Donell ធ្លាប់ជួយក្រុមជម្រើសជាតិកម្ពុជា ឈ្នះពាន BIDC Cup 2009 មុនលោកចេញទៅបន្តការងារជានាយកបច្ចេកទេសរបស់សហព័ន្ធកីឡាបាល់ទាត់ឥណ្ឌា ចន្លោះឆ្នាំ២០១១ដល់២០១៤។
បុរសអូស្ត្រាលី រូបនេះធ្លាប់ដឹកនាំក្រុមបាល់ទាត់ Geylang United ក្នុងលីគកំពូលសិង្ហបុរី ចន្លោះឆ្នាំ២០០៣-២០០៥ រហូតឈ្នះពានរង្វាន់គ្រូបង្វឹកល្អ S.League Coach of the Year 2003 បន្ទាប់ពីព្យួរស្បែកជើងពីកីឡាករជាមួយក្រុម Tampines Roversនៅឆ្នាំ២០០០។ នៅឆ្នាំ២០០៥ដល់២០០៧ លោកចូលរួមដឹកនាំក្រុមជម្រើសជាតិកម្ពុជា លើកទី១ ហើយបន្តចូលដឹកនាំលើកទី២វិញចន្លោះឆ្នាំ២០០៩-២០១០៕