កូនចិញ្ចឹមជនជាតិខ្មែរ Maddox គឺជាកូនប្រុសតែម្នាក់គត់ដែលនឹងទទួលបានទ្រព្យសម្បត្តិពី Angelina Jolie ខណៈដែលកូនៗទាំង ៥នាក់ផ្សេងទៀតនឹងត្រូវដកឈ្មោះចេញពីបញ្ជីមរតក។ តើ Angelina Jolie មានទ្រព្យសម្បត្តិទាំងអស់ប៉ុណ្ណា?
កំពូលតារាហូលីវូដរូបនេះបានដកឈ្មោះកូនចំនួន៥នាក់ផ្សេងទៀតចេញពីបញ្ជីមរតក ដោយសារតែកូនៗទាំងអស់របស់អ្នកស្រីបានបដិសេធមិនឱ្យអ្នកស្រីបែកគ្នាពីឪពុករបស់ពួកគេគឺកំពូលតារាសម្ដែងហូលីវូដដូចគ្នាគឺលោក Brad Pitt។
អ្នកម្ដាយកូនប្រាំមួយនេះបានលើកឡើងថា ទ្រព្យសម្បត្តិទាំងអស់របស់អ្នកស្រីនឹងប្រគល់ទៅឱ្យកូនប្រុសច្បងរបស់ខ្លួនគឺ Maddox ដែលមានវ័យ១៧ឆ្នាំ នេះបើយោងតាមការផ្សាយរបស់ «Business Times»។ ទ្រព្យសម្បត្តិរបស់អ្នកស្រីរួមមានលុយសុទ្ធ និងអចលនទ្រព្យ ដែលប៉ាន់ប្រមាណមានតម្លៃសរុបចំនួន ១២០លានដុល្លារ។
អចលទ្រព្យដែលអ្នកស្រី Angelina Jolie ជាម្ចាស់កម្មសិទ្ធិរួមនឹង Brad Pitt មានតម្លៃ ៦០លានដុល្លារ។ យោងតាមទស្សនាវដ្ដី Forbes បានប្រកាសឱ្យដឹងថា Angelina Jolie ស្ថិតក្នុងលំដាប់ទី៧៤នាក់ជាតារាសម្ដែងដែលមានតម្លៃខ្លួនខ្ពស់ជាងគេបំផុតកាលពីឆ្នាំ២០១៤៕
