បន្ទាប់ពីសហព័ន្ធកីឡាបាល់ទាត់កម្ពុជា ក៏ដូចជាក្រុមហ៊ុនលីគបាល់ទាត់កម្ពុជា រួមទាំងក្លិបពាក់ព័ន្ធបានប្រជុំសម្រេចនៅល្ងាចថ្ងៃទី៥ ខែមករា ឆ្នាំ២០២២ ថ្មីៗនេះបានឲ្យដឹងថាក្លិបចំនួន៨ នឹងបន្តលេងនៅលីគកំពូលកម្ពុជា ខណ:ក្លិប៥ផ្សេងទៀតត្រូវកាត់ទៅលីគទី២។
បើតាមប្រភពជាក់លាក់មួយបញ្ជាក់ថាលោក Satoshi Saito នាយកប្រតិបត្តិថ្មីនៃក្រុមហ៊ុនលីគបាល់ទាត់កម្ពុជាបានគោរពតាមលក្ខណៈវិនិច្ឆ័យសំខាន់ៗចំនួន ៥ ដើម្បីវាយតម្លៃក្លិបដែលអាចលីគកំពូលកម្ពុជា បានដូចជា៖
១) ហិរញ្ញវត្ថុ
២) ហេដ្ឋារចនាសម្ព័ន្ធ
៣) រដ្ឋបាល
៤) ច្បាប់
៥) បច្ចេកវិទ្យា
ក្លិបដែលមានឈ្មោះបន្តនៅលីគកំពូលកម្ពុជា មានភ្នំពេញក្រោន, វិសាខា, បឹងកេត, ព្រះខ័នរាជស្វាយរៀង, អង្គរថាយហ្គឺរ, ណាហ្គាវើល, កងយោធពលខេមរភូមិន្ទ, គីរីវង់សុខសែនជ័យ។ ចំណែកក្លិបចំនួន៥ ដែលត្រូវបានកាត់ចេញទៅកាន់លីគទី២មានដូចជា អគ្គិសនីកម្ពុជា, សូលទីឡូអង្គរ, អាស៊ីអឺរ៉ុប, ព្រៃវែង, អគ្គស្នងការដ្ឋាននគរបាលជាតិ។
ចម្ងល់សួរថា តើក្រុមទាំង៥ ដែលកាត់ចេញ ពេញចិត្ត ឬ អត់?
ទោះបីចង់ឬមិនចង់ ក៏មានការសម្រេចរួចរាល់ហើយ ថាក្រុមទាំង៥ ត្រូវតែកាត់ទៅលេងលីគទី២ ក្នុងឆ្នាំ២០២២ នេះ។ ពេលនេះសារព័ត៌មានត្រយង សូមលើកយកត្រួសៗពីក្រុមទាំង៥ មកវែកញែក៖
១. អគ្គស្នងការដ្ឋាននគរបាលជាតិ ជាក្រុមលេខ៩ ឆ្នាំចាស់ ខណៈក្រុមនេះបានប្រមូលផ្ដុំកីឡាករនិងប្រកួតមិត្តភាពកម្ដៅសាច់ដុំមួយរយៈហើយ ប៉ុន្តែមិនសូវមានព័ត៌មានធ្លាយចេញក្រៅច្រើនទេ ទាំងការដោះដូរកីឡាករ ឬគ្រូបង្វឹក ព្រមទាំងឈុតយុវជន អ្វីឡើយក្រៅពីចែកផ្លូវគ្នាជាមួយខ្សែបម្រើជប៉ុន Soma Otani។
បើប្រៀបធៀបក្នុងចំណោមក្រុមទាំង៥ នេះ ក្រុមអគ្គស្នងការដ្ឋាននគរបាលជាតិ ជាក្រុមមួយដែលមិនទាន់មានកីឡដ្ឋានផ្ទាល់ខ្លួនជាផ្លូវការនៅឡើង ស្របពេលនៅចុងរដូវកាល២០២១ កន្លងទៅបានប្រើប្រាស់ទីលាន 7NG ម្ដុំវិហារសួគ៌។
អ្វីជាសំនួរនោះគឺថាតើក្រុមអគ្គស្នងការដ្ឋាននគរបាលជាតិ មានអំណះអំណាងអ្វីខ្លះដើម្បីបញ្ជាក់ពីការទទួលបានកៅអីលីគកំពូលកម្ពុជា ឡើងវិញបាន?
២. អាស៊ីអឺរ៉ុប យូណាយធីត មានលោក សុក វាសនា ជាគ្រូបង្គោល ហាក់មិនសូវសប្បាយចិត្តឡើយចំពោះការសម្រេចរបស់លោក Satoshi Saito ប្រធានក្រុមហ៊ុនលីគបាល់ទាត់កម្ពុជា។ ក្រុមនេះបានបញ្ចប់រដូវកាលចាស់ឆ្នាំ២០២១ កន្លងទៅឈរលេខទី១០ ក្រោយប្រកួតបាន១៦ប្រកួត ឈ្នះ៤លើក ស្មើ២លើក និងចាញ់១០លើក។
ប៉ុន្តែមួយរយ:ចុងក្រោយ ក្លិបអាស៊ីអឺរ៉ុប បានបង្ហាញឯកសណ្ឋានថ្មី ជាមួយដៃគូសហការផ្សព្វផ្សាយពាណិជ្ជកម្មថ្មី ព្រមទាំងប្រកាសបញ្ជឺឈ្មោះកីឡាករ៩រូប ដែលជាប់ការតេស្តដំណាក់កាលទី៣ ព្រមទាំងប្រកាសតែងតាំង លោក ពេជ្រ សុភារ៉ា ជាគ្រូជំនួស និងបន្តកិច្ចសន្យាថ្មីជូនកីឡាករជនជាតិជប៉ុន Kanta Asami ដើម្បីត្រៀមខ្លួនសម្រាប់រដូវកាល២០២២ ខាងមុខនេះ។
ក្រុមបាល់ទាត់អាស៊ីអឺរ៉ុប ជាក្លិប១ក្នុងចំណោម៤ ដែលមានកីឡដ្ឋានដោយវិនិយោគថវិការផ្ទាល់ខ្លួន (ដោយមិនគិតពីកីឡដ្ឋានដែលមានពាក់ព័ន្ធនឹងទ្រព្យសម្បត្តិរដ្ឋ ឬ ជួលកីឡដ្ឋានគេ) បូកជាមួយក្លិបភ្នំពេញក្រោន ប្រើប្រាស់កីឡដ្ឋាន Smart RSN Stadium, វិសាខា ប្រើប្រាស់កីឡដ្ឋាន Prince Stadium, កីឡដ្ឋាន Cambodia Airway Stadium របស់បឹងកេត។
៣. អគ្គិសនីកម្ពុជា គឺជាក្លិបដែលសំបូរទៅដោយកីឡាករខ្មែរសុទ្ធ និងកំពុងលេចធ្លោច្រើនគួរជាទីចាប់អារម្មណ៍សម្រាប់ក្រុមធំៗនៅលីគកំពូលកម្ពុជា ព្រមទាំងមានកីឡដ្ឋាននៅម្តុំទួលសង្កែ។ មុនចប់រដូវកាលចាស់ក្រុមនេះឈរលេខរៀងទី១១ ក្នុងចំណោមក្រុមទាំង១៣ ជាសមាជិកលីគកំពូលកម្ពុជា ក្រោយប្រកួតបាន១៦លើក ឈ្នះ៣ ស្មើ៤ និងចាញ់ដល់ទៅ៩លើក។
ជាពិសេសថ្មីនេះអគ្គិសនីកម្ពុជា ទើបតែប្រកាសជ្រើសរើសយុវជនអាយុក្រោម១៥ឆ្នាំ និងបានចែកផ្លូវគ្នាជាមួយគ្រូបង្គោលលោក មាស សំអឿន។ អ្នកគាំទ្របាល់ទាត់ខ្មែរភាគច្រើន ប្រាកដជាដឹងច្បាស់ថាគោលដៅរបស់ក្លិប អគ្គិសនីកម្ពុជា គឺពានសម្តេចតេជោ ហ៊ុន សែន បើក្នុងលីគកំពូលកម្ពុជា ក្រុមនេះមានធ្លាប់មានពិន្ទុឈរកំពូលតារាងប្រជែងយកជើងឯកនោះទេ។
ការប្រើប្រាស់កីឡាករខ្មែរសុទ្ធដើម្បីប្រកួតជាអត្តសញ្ញាណមួយរបស់ក្រុមអគ្គីសនីកម្ពុជា ដែលក្លិបជាច្រើនមិនអាចធ្វើទៅបាន។
៤. ព្រៃវែង គឺជាក្លិបដែលសំបូរទៅដោយយុវជនជម្រើសជាតិល្អៗជាច្រើន ទើបតែប្រកាសចែកផ្លូវជាមួយ លោក Thongchai Rungreangles គ្រូបង្វឹកសញ្ជាតិថៃ កាន់សញ្ញាប័ត្រគ្រូបង្វឹកបាល់ទាត់ UEFA Pro Licence ដែលជាកម្រិតសិក្សាខ្ពស់ជាងគេក្នុងពិភពបាល់ទាត់ បន្ទាប់ពីធ្វើមិនសូវបានល្អទាំងក្នុងលីគ និងពានសម្តេចតេជោ ហ៊ុន សែន។
ក្រុមនេះជាក្រុម១ក្នុងចំណោម ៦ ដែលមានទីតាំងនៅតាមខេត្ត ស្របពេលក្រុមនេះបានធ្វើព្យុះធ្វើភ្លៀងជាច្រើនក្នុងរដូវកាលឆ្នាំ២០២១ កន្លងទៅក្រោយឈ្នះពានរង្វាន់លីគទី២ក្នុងឆ្នាំ២០២០ កន្លងទៅ។ រដូវកាលចាស់ក្រុមព្រៃវែង ឈរលេខរៀងទី១២ ក្រោយប្រកួតបាន១៦ លើកឈ្នះ២ ស្មើ៥និងចាញ់៩លើក។
បើតាមការលេចឮមកថាក្រុមខេត្តព្រៃវែង គ្រោងរៀបចំកែតម្រូហេដ្ឋរចនាសម្ព័ន្ធកីឡដ្ឋានខេត្តរបស់ខ្លួនឱ្យត្រូវតាមស្ដង់ដារ ដូចជាបន្ថែមភ្លើង ឬ ចំណុចមួយចំនួនទៀត។
២. សូលទីឡូអង្គរ ជាក្រុមបាតតារាងឆ្នាំចាស់ ក្រោយប្រកួត១៦ លើកឈ្នះបាន១លើក ស្មើ៥លើក និងចាញ់១០លើក។ បច្ចុប្បន្នពុំទាន់មានកីឡដ្ឋាផ្ទាល់ខ្លួននៅឡើយទេ ប៉ុន្តែក្លិបដែលមានមូលដ្ឋានទៅទឹកដីសៀមរាបមួយនេះ បានប្រើប្រាស់កីឡដ្ឋានខេត្តសៀមរាប ពេលបង្កើតឡើងដំបូង ក្រោយមកប្តូរមកកីឡដ្ឋាន SRU វិញ។
ក្លិបបានប្រកាសពីការចាកចេញរបស់កីឡាករចាស់ៗមួយចំនួន តែមិនទាន់ប្រកាសបន្ថែមសមាជិកថ្មីនៅឡើយ ខណៈក្រុមដែលដឹកនាំដោយលោក អ៊ុក សុធី ជាគ្រូបង្វឹកនេះជាក្រុមទាត់ចូលទីគូប្រកួតតិចគ្រាប់ជាងគេប្រចាំរដូវកាលគឺបានត្រឹម១២គ្រាប់ប៉ុណ្ណោះ ហើយរបូតវិញ៣៩គ្រាប់។
ចុះមតិរបស់ប្រិយមិត្ត មានទស្សនៈបែបណាចំពោះក្រុមទាំង៥ខាងលើ ចំពោះការវាយតម្លៃរបស់ក្រុមហ៊ុនលីគកំពូលកម្ពុជា?