ពិធីការិនីពូកែវោហារស័ព្ទប្រចាំស្ថានីយទូរទស្សន៍ហង្សមាស អ្នកនាង ចាន់ កែវនិមល ទើបតែចុះកុងត្រាជាមួយធនាគារ ជេត្រាស់ រ៉ូយ៉ាល់ ក្នុងនាមជាទូតសុច្ឆន្ទៈ(BA) ដោយមុខងារនេះ អ្នកនាងត្រូវបំពេញការងារចំនួន១ឆ្នាំពេញតែម្ដង។ ពិធីការិនីមានវោហារស័ព្ទពូកែរូបនេះ មានកេរ្តិ៍ឈ្មោះល្បីល្បាញ គួរឱ្យកត់សម្គាល់ និងទទួលបានការគោរពនៅក្នុងអាជីពជាពិធីការិនីមួយនៅក្នុងព្រះរាជាណាចក្រកម្ពុជា ។
ក្រៅពីមហាជនទទួលស្គាល់ អ្នកនាង ចាន់ កែវនិមល ជាពិធីការិនីក្នុងដួងចិត្តហើយនោះ អ្នកនាងក៏ជាភរិយានិងជាម្តាយម្នាក់ដែលតែងតែគិតគូររៀបចំផែនការហិរញ្ញវត្ថុសម្រាប់គ្រួសារ ទើបជាហេតុធ្វើឱ្យអ្នកនាងស័ក្តិសមជាទូតសុច្ឆន្ទៈរបស់ធនាគារ ។
ឆ្លើយប្រាប់អ្នកសារព័ត៌មានត្រយង អ្នកនាង ចាន់ កែវនិមល ប្រាប់ហេតុផលថា ការងារជាទូតសុច្ឆន្ទៈរបស់ធនាគារ គឺជាការងារដំបូងដែលអ្នកនាងបានជ្រើសរើស និងមិនស្ទាក់ស្ទើក្នុងការសម្រេចចិត្ត។ អ្នកនាងថា៖ «ជារឿងល្អមួយដែរ ដោយខាងធនាគារបានជ្រើសរើសយករូបនាងខ្ញុំ។ ដោយសារយើងមើលឃើញហើយថា សម្រាប់ផលិតផល ឬហាងផ្សេងៗមួយចំនួន គឺមានភាពងាយស្រួលក្នុងការជ្រើសរើសទូតសុច្ឆន្ទៈ(BA) ក៏ប៉ុន្ដែសម្រាប់ធនាគារវិញ គឺជាអ្វីដែលថ្មីមែនទែនសម្រាប់យើង និងបានផ្ដល់ឱ្យនូវក្រេឌីតល្អថែមទៀត»។
យ៉ាងណាមិញ អ្នកនាង បង្ហាញអារម្មណ៍ដែរថា អ្នកនាងពិតជារីករាយ ដែលខាងធនាគារ ទុកចិត្តនិងជ្រើសរើសរូបគាត់ជាទូតសុច្ឆន្ទៈដំបូងសម្រាប់ធនាគារ ។ អ្នកនាងថាអាចជាការផ្សារភ្ជាប់ជាមួយធនាគារនេះបាន ដោយសារតែតួនាទីគោលរបស់អ្នកនាងគឺជាពិធីការិនីស្ថានីយ៍ទូរទស្សន៍ ហើយមានឥទ្ធិពលខ្លាំងក្នុងការផ្សព្វផ្សាយពីសេវាកម្មរបស់ធនាគារ ទៅកាន់មហាជនជាអតិថិជនគោលដៅ។ អ្នកនាងឆ្លើយថា «ធាតុពិតទៅមានការងារជាច្រើនដែលបានទាក់ទងមកក្នុងតំណែងជាទូតសុច្ឆន្ទៈ(BA) ក៏ប៉ុន្ដែមិនអាចទទួលបាន។ ប្រសិនបើជាតារាចម្រៀង តារាសម្ដែង ឬអ្នកសិល្បៈដទៃ នាងខ្ញុំជឿថាគេអាចទទួលយកបាន ក៏ប៉ុន្ដែនាងខ្ញុំជាពិធីការិនី អាចនឹងមានការងារច្រើនដែលត្រូវបំពេញ។ ដូច្នោះហើយរាល់ការផ្សព្វផ្សាយពីផលិតផល និងហាងមួយចំនួនគឺយើងធ្វើអត់បាន ដែលនាំឱ្យមានផលប៉ះពាល់ជាការងារគោលរបស់នាងខ្ញុំ។ នៅពេលខ្លះពិធីការិនីមិនអាចនឹងនិយាយ ឬផ្សព្វផ្សាយពីផលិតផ្សេងបានក្រៅពីផលិតផលដែលជាម្ចាស់ឧបត្ថមកម្មវិធីតែប៉ុណ្ណោះ»។
ពិធីការិនី ចាន់ កែវនិមល បានបញ្ជាក់បន្ថែមថា ចំពោះការងាររបស់ធនាគារគឺមានច្រើន សម្រាប់អ្នកនាងជាមនុស្សម្នាក់ដើរតួនារទីសំខាន់ទៅលើការផ្សព្វផ្សាយ និងជំរុញឱ្យសេវាកម្មរបស់ធនាគារឱ្យមានសភាពរលូន ងាយដល់ដៃអតិថិជន។ រយៈពេល១ឆ្នាំពេញនេះ អ្នកនាងត្រូវបំពេញមួយចំនួនដូចជាការថតជាវីដេអូ និងរូបភាពផ្សព្វផ្សាយពីសេវាកម្មរបស់ធនាគារ ហើយអ្នកនាងអាចនឹងបន្ដកិច្ចកុងត្រាបន្ថែមទៀត នៅពេលដែលមានការចចារជាថ្មីបានសម្រេចឡើង។
ក្រៅពីទទួលការងារជាទូតសុច្ឆន្ទៈ(BA)ដំបូងសម្រាប់ធនាគារហើយនោះ ឆ្នាំ២០២២នេះ អ្នកនាងក៏ត្រៀមខ្លួនជាស្រេចសម្រាប់ទទួលការងារធំៗបន្ថែមទៀត ប៉ុន្ដែសុំមិនទាន់បញ្ចេញឱ្យមហាជនដឹងមុននោះឡើយ៕