កាលពីថ្ងៃអង្គារកន្លងទៅនេះ Britney បានបញ្ចេញអារម្មណ៍ពិតរបស់ខ្លួនចំពោះម្ដាយ (Lynne) និងប្អូនស្រី (Jamie Lynn Spears) ម្ដងទៀតនៅលើបណ្ដាញទំនាក់ទំនងសង្គម Instagram ប៉ុន្តែក្រោយមកបានលុបចេញវិញ នេះបើយោងតាមការផ្សាយរបស់កាសែត the New York Post ។
«សុំទោស Jamie Lynn ដែលកាលណោះខ្ញុំមិនរឹងមាំគ្រប់គ្រាន់ធ្វើអ្វីមួយដែលខ្ញុំគួរធ្វើ នោះគឺទះកំផ្លៀងឯងនិងម៉ាក់ឱ្យចំកណ្ដាលមុខតែម្ដង» នេះគឺជាអ្វីដែលតារារាជិនីចម្រៀងប៉ុបរូបនេះបានសរសេរភ្ជាប់ជាមួយនឹងរូបថតការ៉េមសូកូឡានិងភេសជ្ជៈ។
មុននេះ Britney ធ្លាប់បានបញ្ចេញសំណេរបញ្ជាក់រឿងពិតថាសម្រាប់ការយល់ឃើញរបស់ខ្លួនប្អូនស្រី Jamie Lynn រីករាយនឹងជីវិតក្នុងវ័យកុមារដ៏សែនសុខស្រួល ខណៈដែលអ្នកនាងវិញត្រូវរវល់ដើរ Tour Concert និងច្រៀងបទចម្រៀងដាក់ក្នុងអាល់ប៊ុមដើម្បីផ្គត់ផ្គង់គ្រួសារ Spears។
អ្នកចម្រៀងរូបនេះបានសរសេរទៀតថា «ខ្ញុំបានហោះទៅផ្ទះ ពេលទៅដល់ខ្ញុំបានឃើញ Jamie អង្គុយលើសាឡុងមើល TV ក្រោយពេលដែលខ្ញុំបែកគ្នាពី Justin Timberlake។ខ្ញុំបានខិតខំធ្វើការស្ទើរពេញមួយជីវិតប៉ុន្តែខ្ញុំមិនដែលដឹងថាខ្ញុំត្រូវម៉ាក់បំរើខ្ញុំយ៉ាងម៉េចនោះទេ ប៉ុន្តែខុសគ្នាប្អូនស្រីខ្ញុំអង្កុយលេង ហើយម៉ាក់លើកសូកូឡាក្រឡុកឱ្យផឹកនិងលើកការ៉េមឱ្យញ៉ាំ។ប្អូនស្រីវ័យ១២ឆ្នាំរបស់ខ្ញុំបែរជាអាចអង្គុយមើលកម្មវិធី មានសូកូឡានិងការ៉េមយកមកឱ្យដល់កន្លែង»។
Britney ថែមទាំងបានលើកឡើងដែរថាកាលណោះអ្វីដែលអ្នកនាងចាំបានគឺនិយាយពាក្យថា «ចង្រៃយក!ក្មេងស្រីអាយុ១២ឆ្នាំមើលកម្មវិធីមនុស្សធំ?»
យ៉ាងណាមិញសំណេរដែលតារាចម្រៀងប៉ុបល្បីបានសរសេររៀបរាប់ទាំងអស់ខាងលើនេះ ត្រូវបានសាមីខ្លួនលុបចេញពីក្នុងគណនីវិញ៕
ប្រភព៖ hollywoodunlocked
