យុវជន ហ៊ុន ប៊ុនរ៉ូត តារាចម្រៀងទើបនឹងរះថ្មីលើវិថីសិល្បៈនៃផលិតកម្ម PS Media កំពុងតែទទួលបានការចាប់អារម្មណ៍ច្រើនពីសំណាក់សាធារណជនតាមរយៈបទចម្រៀង «ប្ដីប្រឡាំងកាស»។ តើមានមនុស្សប៉ុន្មាននាក់បានដឹងថាខ្សែជីវិតពិតរបស់តារាចម្រៀងវ័យក្មេងរូបនេះតស៊ូលំបាកយ៉ាងណាខ្លះទម្រាំនឹងមានថ្ងៃនេះ?
ហ៊ុន ប៊ុនរ៉ូត មានស្រុកកំណើតនៅខេត្តកំពង់ស្ពឺគឺជាកូនប្រុសច្បងនៅក្នុងគ្រួសារដែលមានបងប្អូន៤នាក់។ ថ្វីត្បិតតែគ្រួសារមិនមានប្រវត្តិជាអ្នកសិល្បៈក្ដី ប៉ុន្តែដោយក្ដីស្រលាញ់និងដុងពីកំណើត ទើបបណ្ដាលឱ្យយុវជនរូបនេះសម្រេចចិត្តបោះជំហានលើវិថីសិល្បៈ។
តារាចម្រៀងវ័យក្មេងដែលកំពុងតែត្រូវបានអ្នកគាំទ្រខ្លះចាប់អារម្មណ៍ខ្លាំង បានចែករំលែកប្រាប់អ្នកសារព័ត៌មានត្រយង ពីជីវិតពិតរបស់ខ្លួនដែលមិនមានមនុស្សច្រើនឡើយបានដឹង។ ករណីដែល ហ៊ុន ប៊ុនរ៉ូត ជានិស្សិតច្បាប់ឆ្នាំទីពីរត្រូវសម្រេចចិត្តព្យួរការសិក្សាដោយសារតែបញ្ហាជីវភាពមានការលំបាកនិងខ្វះខាត។ បញ្ហាសុខភាពធ្លាក់ចុះទ្រុឌទ្រោម ដោយសារប្អូនប្រុសត្រូវធ្វើការងារផងរៀនផង ទើបប្អូនសម្រេចចិត្តព្យួរការសិក្សាមកផ្ដោតលើការងារសិល្បៈវិញ ដើម្បីសន្សំប្រាក់កាសយកទៅផ្គត់ផ្គង់ចំណាយសម្រាប់ការសិក្សានាពេលអនាគត។
ម្ចាស់បទចម្រៀងរូបនេះបានឱ្យដឹងដែរថាបទចម្រៀង «ប្ដីប្រឡាំងកាស» នេះមានអត្ថន័យដាស់តឿនចំពោះប្រុសៗដែលនិយមចូលចិត្តភ្លើតភ្លើន ស្រី ស្រា ល្បែង ភ្លេចប្រពន្ធភ្លេចកូន រហូតទីបំផុតគ្រួសារត្រូវបែកបាក់គ្នា។
បច្ចុប្បន្នតារាចម្រៀងរូបនេះនៅមិនទាន់មានការគាំទ្រនិងស្គាល់ច្រើនពីសាធារណជននៅឡើយទេប៉ុន្តែសាមីខ្លួននៅតែមានសុទិដ្ឋិនិយមចំពោះអនាគតខ្លួនលើវិថីមួយនេះ ព្រោះប្អូនជឿថាប្អូនគឺជាអ្នកចម្រៀងថ្មីរមែងត្រូវការពេលវេលាយូរ ទម្រាំអាចឆក់យកបេះដូងអ្នកស្ដាប់និងអ្នកទស្សនា។
សម្រាប់ប្រិយមិត្តសារព័ត៌មានត្រយង អាចចូលទៅស្ដាប់និងទស្សនាបទចម្រៀង «ប្ដីប្រឡាំងកាស» នៅលើឆាណែល (Channel) ផលិតកម្ម PS Media ដូចខាងក្រោមនេះ៖