សមាជិកក្រុម BIGBANG លោក T.O.P គឺជាសមាជិកដែលសកម្មនៅលើ Instagram។ អ្នកគាំទ្រជាច្រើនយល់ឃើញថា Content ដែលលោកចែករំលែកនៅលើបណ្ដាញសង្គមមួយនេះគួរឱ្យចាប់អារម្មណ៍និងផ្ដល់នូវអារម្មណ៍កម្សាន្តរីករាយ។ ប៉ុន្តែមួយផុសចុងក្រោយរបស់លោកនៅលើ Platform ខាងលើបែរជាធ្វើឱ្យអ្នកគាំទ្រមួយចំនួនមិនពេញចិត្តទៅវិញ។
កាលពីថ្ងៃម្សិលមិញ (១៩ មករា ២០២២) T.O.P បានផុសរូបភាពក្រុមរបស់ខ្លួនបង្ហាញវត្តមានសមាជិកដែលនៅសល់រួម G-Dragon, Daesung, Taeyang និងរូបលោកផ្ទាល់ តែមិនមានរូបភាពរបស់ Seungri។ ការពិតនេះមិនមែនជាលើកទីមួយឡើយដែល Rapper រូបនេះបានបង្ហោះរូបភាពដែលមានតែសមាជិក៤នាក់ ប៉ុន្តែរាល់លើកលោកមិនដែលយករូបភាពចាស់ដែលជារូបភាពក្រុមមានសមាជិក៥នាក់មកកាត់សល់ត្រឹមតែ៤នាក់ហើយយកមកបង្ហោះនោះទេ។ ហ្វេនដែលជាអ្នកគាំទ្រក្រុម Bigbang ក៏ដូចជាអ្នកគាំទ្រ Sengri ដោយចំពោះ បានសម្ដែងអារម្មណ៍មិនពេញចិត្តចំពោះទង្វើរបស់ T.O.P នេះ។
រូបភាពនោះលោកបានភ្ជាប់ជាមួយនឹង hashtags ខ្លីថា #ilovemyband and #ilovemyfans
Seungri បានដើរចេញពីក្រុម BIGBANG កាលពីឆ្នាំ២០១៩ នៅពេលដែលរឿងអាស្រូវក្នុងប្រអប់សារ Sex បានបែកធ្លាយចេញមកជាសាធារណៈ។ ប្រអប់សារក្រុមដែលជជែកពីរឿងពេស្យាចារការជជែកចរចា ទិញលក់ផ្លូវភេទ និងរឿងរ៉ាវផ្សេងៗទៀត ធ្វើឱ្យលោកត្រូវកាត់ទោសឱ្យជាប់ពន្ធនាគារចំនួន៣ឆ្នាំ។ ចំពោះបញ្ហានេះសមាជិកផ្សេងៗក្នុងក្រុម BIGBANG មិនមានអ្នកណាម្នាក់បញ្ចេញនូវមតិយោបល់ឬការយល់ឃើញអ្វីទាំងអស់។
ងាកមក T.O.P វិញលោកបានព្យាយាមប្រើប្រាស់បណ្ដាញសង្គមទំនាក់ទំនងជាមួយនឹងអ្នកគាំទ្រ ចំពោះការយល់ឃើញរបស់លោកចំពោះស្ថានភាពបច្ចុប្បន្នរបស់ក្រុម BIGBANG។ ថ្វីត្បិតតែមិនមានសញ្ញាណវិជ្ជមានណាមួយបង្ហាញឱ្យឃើញថា BB នឹងត្រលប់មកចេញអាល់ប៊ុមចម្រៀងឆាប់ៗនេះវិញ។
បន្ទាប់ពីបទចម្រៀងចុងក្រុ «Flower Road» របស់ពួកគេបានចេញតាំងពីឆ្នាំ២០១៨ ប៉ុន្តែអ្នកគាំទ្រនៅតែសង្ឃឹមថាក្រុមចម្រៀងបុរសដ៏ល្បីល្បាញជំនាន់ទីពីររបស់កូរ៉េខាងត្បូងនឹងរួមគ្នាសារជាថ្មីហើយចេញបទចម្រៀងឱ្យអ្នកគាំទ្របានស្ដាប់និងទស្សនាទៀត៕