កម្មវិធីរដូវវប្បធម៌ឆ្នាំ ២០២២របស់អង្គការសិល្បៈខ្មែរអមតៈបានផ្ដោតលើគោលគំនិត «ទង្វើថ្ងៃនេះ ផលតបស្នងថ្ងៃស្អែក» និងបានរកឃើញម្ចាស់ជ័យលាភី ២ស្នាដៃសម្រាប់សម្តែងផ្ទាល់ និង ២ស្នាដៃសម្រាប់ការសម្តែងបែបឌីជីថល។ លោក ង៉ែត រ៉ាឌី ជាម្ចាស់ជ័យលាភីមូលនិធិដំឡើងថ្មីរបស់អង្គការសិល្បៈខ្មែរអមតៈ បង្ហាញស្នាដៃដំឡើងថ្មីរបាំសហសម័យបែបឌីជីថល ដោយបង្ហាញទម្រង់ល្ខោនខោលជាល្ខោនអានមានឈ្មោះថា «សកេរ»។ តើអ្វីជាជា «សកេរ» ហេតុអ្វីជំរុញឱ្យមានការដំឡើងស្នាដៃថ្មីនេះឡើង?
លោក ង៉ែត រ៉ាឌី ជាមន្ត្រីនៅសកលវិទ្យាល័យភូមិវិចិត្រសិល្បៈនៃមហាវិទ្យាល័យសិល្បៈនុសាស្ត្រ ហើយលោកក៏ជាប្រធានក្រុម «ក្រោមដំបូល» ផងដែរ។ លោកជាបេក្ខជាម្នាក់ដែលទទួលបានមូលនិធិដំឡើងស្នាដៃថ្មីនៃកម្មវិធីរដូវវប្បធម៌ឆ្នាំ ២០២២ដែលរៀបចំឡើងដោយអង្គការសិល្បៈខ្មែរអមតៈ។ សម្រាប់ស្នាដៃដែលលោកបានស្នើសុំដំឡើងនិធិដំឡើងថ្មីគឺមានចំណងជើងថា «សកេរ» ដែលគេអាចនិយាយបានជាស្នាដៃទម្រង់ល្ខោនខោលបែបល្ខោនអាន។
នៅក្នុងស្នាដៃថ្មីនេះ លោកមានគោលបំណងបង្ហាញអំពីសកម្មភាព ការហាត់សម និងលើកទឹកចិត្តសិល្បករឱ្យគេមានការស្វែងយល់អំពីសាច់រឿងមុននឹងសម្ដែង ដោយយកវិធីនៃការហាត់សមជាគោលភ្ជាប់ទៅនឹងការសម្ដែង។ សម្រាប់ស្នាដៃថ្មីនេះជាផ្នែកមួយនៃការជំរុញឱ្យសិល្បករសិក្សាពីក្រោយនៃស្នាដៃមួយនេះ។ លោកថា ស្នាដៃនេះជាគឺស្នាដៃដែលគួរឱ្យផ្ដល់ឱ្យសិល្បករ ព្រោះអ្វីដែលលោកមានបំណងចង់ធ្វើឡើងដើម្បីបង្ហាញពីផលសម្រេចដែលលោកចង់ធ្វើដើម្បីអនាគត ជាពិសេសស្របតាមប្រធានបទ «ទង្វើថ្ងៃនេះ ផលតបស្នងថ្ងៃស្អែក» និងផ្ដល់ឱ្យក្មេងៗជំនានក្រោយ ដែលពួកគេជាអ្នកជំនាញបានសិក្សាស្វែងយល់ពីគោលបំណងនៅក្នុងស្នាដៃ «សកេរ» នេះ ថាតើមានមូលហេតុអ្វីបានជាលោកធ្វើស្នាដៃមួយនេះឡើង?
អ៊ីចឹងហើយមានចំនុចជាច្រើនដែលគេបានឃើញអំពីគុណតម្លៃនៃស្នាដៃមួយនេះ និងចំនុចចំបងបំផុតគឺ ការស្វែងយល់ដោយខ្លួនឯងផ្ទាល់ តាមរយៈរឿងរ៉ាវសាមញ្ញៗ។ ជួនកាលការអានក្រដាសរឿងមួយដែលសិល្បករភាគច្រើនតែងគិតថា ត្រូវមានអ្នកពោលម្នាក់ទើបដំណើរការសម្ដែងបាន។ ក៏ប៉ុន្តែសិល្បករខ្លួនឯងបានភ្លេចគិតថា ខ្លួនឯងមិនបានប្រើប្រាស់ឱកាសក្នុងការពោល ឬអាន ឱ្យបានដឹងអំពីដំណើរសាច់រឿងដែលខ្លួនឯងបានសម្ដែងឱ្យបានកាន់តែស៊ីជម្រៅមុនសម្ដែង។ នៅពេលមានដែលសិល្បករបានដឹងពីសាច់រឿងមុនសម្ដែងហើយនោះ នៅពេលមានអ្នកពោលដំណើររឿង សិល្បករនឹងសម្ដែងចេញមកពោលពេញដោយថាមពលនៃអត្តចរិតតួអង្គពិតៗ។ ទស្សនៈនៃស្នាដៃថ្មីក៏បានបង្ហាញអំពីគោលគំនិតផ្សេងនៃទម្រង់ល្ខោនខោលបែបល្ខោនអាន។
បើតាមទំព័រហ្វេសប៊ុកផ្លូវការអង្គការសិល្បៈខ្មែរអមតៈ ស្នាដៃ«សកេរ» របាំសហសម័យជាល្ខោនអានត្រូវបានដកស្រង់ត្រង់ឈុត «ថ្វាយព្រះទម្រង់» ដើម្បីបកស្រាយអំពីដំណើររឿងរាមកេរ្តិ៍។ ស្នាដៃនេះនឹងដាក់បញ្ចាំងបែបឌីជីថលដោយរួមបញ្ចូលនូវការពោល ស្មូត ភ្លេងពិណពាទ្យ និងសំឡេងអេឡិចត្រូនិក។ ការសម្ដែង «សកេរ» នឹងប្រព្រឹត្តិឡើងនៅថ្ងៃទី ២២ និង ២៣ ខែ មករា ឆ្នាំ២០២២ នៅហាងកាហ្វេ Java សាខាទួលទំពូង តម្លៃសំបុត្រ ២ ដុល្លារ៕
