ឯកឧត្តម ស សុខា អនុប្រធានសហព័ន្ធកីឡាបាល់ទះកម្ពុជា បានស្នើសុំមហាសន្និបាតរបស់សហព័ន្ធ ដែលមានការចូលរួមពីអភិបាលរងរាជធានីខេត្តនិងស្នងការនិងស្នងការរងរាជធានីខេត្តនីមួយៗ ឱ្យមានការបង្កើតក្រុមបាល់ទះតំណាងខេត្តរបស់ខ្លួន ដើម្បីបំផុសបំផុលចលនាកីឡាមួយនេះ។
ឯកឧត្តមបន្ថែមថា ការស្នើសុំឱ្យមានការបង្កើតក្រុមបាល់ទះតំណាងរាជធានីខេត្តនេះ គឺដើម្បីស្វែងរកកីឡាករមានទេពកោសល្យផង និងបំផុសចលនាកីឡានៅតាមបណ្តារាជធានីខេត្តផង។ ការបង្កើតក្រុមនេះត្រូវមានចុះឈ្មោះនៅសហព័ន្ធកីឡាបាល់ទះកម្ពុជា ឱ្យបានត្រឹមត្រូវផងដែរ។
ការស្នើសុំឱ្យមានក្រុមបាល់ទះតាមរាជធានីខេត្តនេះ គឺស្របនឹងផែនការរបស់សហព័ន្ធកីឡាបាល់ទះកម្ពុជា ដែលមានគម្រោងរៀបចំផែនការប្រកួតពានរង្វាន់ក្នុងស្រុកជាច្រើនដូចជាពានរង្វាន់បាល់ទះសម្ដេចក្រឡាហោម ស ខេង ពានរង្វាន់បាល់ទះសម្តេចអគ្គមហាសេនាបតីតេជោ ហ៊ុន សែន និងពានរង្វាន់ជើងឯកថ្នាក់ជាតិ ក្នុងឆ្នាំ២០២២នេះ ខណៈផែនការពានរង្វាន់ទាំងអស់នេះត្រូវបានយាយីដោយសារជំងឺកូវីដ-១៩ ក្នុងឆ្នាំ២០២១ កន្លងទៅ។
បន្ថែមពីលើការស្នើសុំរបស់ឯកឧត្តម ស សុខា ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិប្រធានសហព័ន្ធកីឡាបាល់ទះកម្ពុជា បានសង្កត់ធ្ងន់ដល់ថ្នាក់ដឹកនាំខេត្តនិងស្នងការដ្ឋាននគរបាលរាជធានីខេត្តថា ការបង្កើតក្រុមបាល់ទះនេះត្រូវកំណត់ឱ្យស្នងការរាជធានីខេត្តជាសេនាធិការ ហើយត្រូវចុះបញ្ជីឱ្យបានក្នុងខែកុម្ភៈ ឆ្នាំ២០២២ ខណៈនៅខែមីនា តទៅអាចនឹងដំណើរការប្រកួតពានរង្វាន់ក្នុងស្រុកមួយចំនួនហើយ។
ផ្នែកការប្រកួតនេះជាការពង្រឹងបច្ចេកទេសដល់មន្រ្តីអាជ្ញាកណ្ដាល ចៅក្រម និងជ្រើសរើសកីឡាករមានសមត្ថភាពដល់ក្រុមក្រុមជម្រើសជាតិបាល់ទះបន្ថែម មុនពេលកម្ពុជា ទទួលរៀបចំព្រឹត្តិការណ៍កីឡាស៊ីហ្គេមឆ្នាំ២០២៣ ខាងមុខ៕