ទីបំផុតរកឃើញអ្នកឡើងវគ្គផ្ដាច់ព្រ័ត្រកម្មវិធី ONE Featherweight Kickboxing World Grand Prix ហើយ ពោល អ្នកលេងឃីកបុកសីងសញ្ជាតិថៃ Sitthichai Sitsongpeenong ឡើងជួប Chingiz Allazov នៅព្រឹត្តិការណ៍អស្ចារ្យ ONE: ONE X។
នៅទឹកទី១ មិនមាននរណាមានប្រៀបជាងទេសម្រាប់ Sitthichai និង Davit។ កីឡាករហ្សកហ្សីខំដើរចូលតិចៗដើម្បីប្រើកណ្ដាប់ដៃដ៏ជំនាញរបស់ខ្លួន ខណៈដែល កីឡាករថៃមិនដកថយ ប៉ុន្តែ ចេញក្បាច់ប្រកបដោយទំនុកចិត្ត ទោះមិនធ្វើឲ្យគូប្រជែងរបួសក្ដី។ អ្នកទាំងពីរប្រកួតគ្នានៅកណ្ដាលរេញយ៉ាងល្អមើល។
នៅទឹកទី២ Sitthichai នៅតែរក្សាជំហរដើម្បីចេញកណ្ដាប់ដៃ , ទាត់ជើង និងជង្គង់ជារឿយៗ។ មុនបញ្ចប់ទឹកនេះ កីឡាករថៃបានទាត់ខ្ពស់ធ្វើឲ្យ Davit ដួលជ្រប់ទៅក្ដាររេញ រហូតអាជ្ញាកណ្ដាលរាប់ដល់ ៨ ប៉ុន្តែ ពេលរាប់ចប់ក៏ចប់ទឹកល្មម។ នៅទឹកចុងក្រោយ Sitthichai នៅតែមានប្រៀបលើ តារាហ្សកហ្សីដដែល និងព្យាយាមទាត់ខ្ពស់ហូរហែចំកញ្ចឹងក ប៉ុន្តែ ស្រាលៗ។ ការដើរចូល របស់ Davit ដើម្បីស្ដារដើមមិនអាចដូចបំណងទេ ព្រោះចូលទៅត្រូវកណ្ដាប់ដៃ និងការទាត់កាត់របស់កីឡាកររហស្សនាម “Killer Kid” ទៅវិញ។ ទីបំផុត កីឡាករថៃឈ្នះពិន្ទុជាឯកច្ឆន្ទ និងជាការឈ្នះលើកទី៣ លើគូប្រជែងរូបនេះ។
ក្រោយឈ្នះការប្រកួត Sitthichai បានថ្លែងថា៖«ខ្ញុំពិតពិតរំភើបដែលឈ្នះក្នុងការប្រកួតនេះ ព្រោះ Davitមានការអភិវឌ្ឍខ្លួនល្អ។ Kiria មានភាពរីកចម្រើនច្រើនណាស់។ ខ្ញុំមានសម្ពាធក្នុងការប្រកួត ប៉ុន្តែ ខ្ញុំអាចដោះស្រាយបញ្ហាបាន។ ចំពោះការជួប Chingiz Allazov គឺជាការប្រកួតដ៏ល្អមើល។ គេជាកីឡាករល្អម្នាក់។ ខ្ញុំនឹងរៀបចំដើម្បីតតាំងរូបគេ។ សូមរៀបចំខ្លួនឲ្យល្អទាំងអស់គ្នា»។
ចំណែក មួយគូទៀត កីឡាករអាស៊ែបៃហ្សង់-បេឡារូស Chingiz Allazov បានប្រើថិរវេលាត្រឹមតែ ១ នាទី និង ៥៥ វិនាទីដើម្បីផ្ដួលជើងខ្លាំងឃីកបុកសីងសញ្ជាតិថា Jo Nattawut ឲ្យសន្លប់ត្រឹមទឹកទី១ ដើម្បីកក់កៅអីឡើងទៅវគ្គផ្ដាច់ព្រ័ត្រកម្មវិធី ONE Featherweight Kickboxing World Grand Prix ដូចគ្នា។
Chingiz បានប្រើស្នៀតអុបប៉េគូបឆ្វេងស្ដាំញាប់ៗ មុនឡើងជង្គង់ចំផ្ទៃមុខ លើ Nattawut ឲ្យដួលផ្ងាច្រងាង។ ទោះកីឡាករថៃ ងើបរួច ប៉ុន្តែ កីឡាករមកពីហ្សកហ្សី បានប្រើក្បាច់ប្រដាល់របស់គេយ៉ាងល្អ រហូតធ្វើឲ្យគូប្រជែងដួលសន្លប់អុកគូថម្ដងទៀត មិនអាចបន្តការប្រកួតបានទៀតទេ៕
