ភាពយន្តខ្មោច Zombie បែបភ័យរន្ធត់ «All of Us Are Dead» កំពុងតែល្បីល្បាញខ្លាំងកម្រិតពិភពលោកដោយសារតែសាច់រឿងប្លែកថ្មី។ភាពយន្តភាគកូរ៉េនេះបានយកឈ្នះដៃគូប្រជែងដែលបញ្ចាំងលើ Platform ដូចគ្នាជាច្រើនរឿង។
មិនត្រឹមតែភាពយន្តនោះទេដែលល្បីល្បាញសូម្បីតែតារាវ័យក្មេងដែលសម្ដែងក្នុងភាពយន្តនេះក៏មានប្រជាប្រិយភាពនិងល្បីល្បាញខ្លាំងជាងកាលពីមុនដែរ។ ក្នុងនោះមើលឃើញថាតារាសម្ដែងស្រីរូបស្រស់មួយរូបដែលលេចធ្លោខ្លាំងតាមរយៈការសម្ដែងក្នុងរឿងនេះគឺកញ្ញា Cho Yi Hyun ដែលសម្ដែងជាតួអង្គ Choi Nam Ra ដែលអាចឆក់យកការស្រលាញ់ និងពេញចិត្តយ៉ាងខ្លាំងពីសំណាក់អ្នកទស្សនា។
ដោយសារតែអត្តចរិតតួអង្គ Choi Nam Ra ដែលមើលទៅត្រជាក់ប្រៀបដូចទឹកកកពិសេសគឺជាប្រធានថ្នាក់ ដែលខ្វល់តែការសិក្សានិងចំណាត់ថ្នាក់ ធ្វើឱ្យចាប់ផ្ដើមសាច់រឿងតួអង្គមយយនេះមើលទៅជាមនុស្សអាត្មានិយមនិងឈាមត្រជាក់គិតតែខ្លួនឯង ប៉ុន្តែក្រោយពីផ្ទុះរឿង Zombie នៅក្នុងសាលាធ្វើឱ្យតួអង្គនេះចាប់ផ្ដើមបើកចិត្តហើយជួយដល់មិត្តរួមថ្នាក់របស់ខ្លួន។
ទោះជាក្នុងរឿងនេះ Cho Yi Hyun សម្ដែងត្រឹមតែជាតួអង្គរងតួឯកប៉ុន្តែថ្វីដៃសម្ដែងរបស់កញ្ញាបានធ្វើឱ្យផ្ទុះនូវការសរសើរខ្លាំងពីក្រុមអ្នកនិយមទស្សនារឿងភាគមួយនេះ។ មិនតែប៉ុណ្ណោះអ្នកទស្សនាថែមទាំងទាមទារឱ្យតារាស្រីរូបនេះត្រូវតែមានវត្តមានក្នុងវគ្គថ្មី។
តារាសម្ដែងវ័យ២២ឆ្នាំរូបនេះបានចាប់ផ្ដើមប្រឡូកចូលក្នុងសិល្បៈកាលពីឆ្នាំ២០១៧ តាមរយៈការសម្ដែងភាពយន្តភាគ «Sweet Revenge» ក្រោយពីរឿងនេះកញ្ញាបានបង្ហាញវត្តមានសម្ដែងរឿងជាច្រើនទៀតដូចជា «Bad Papa» «Hospital Playlist 1&2» និងរឿង «School 2021» ជាដើម៕
