តាមការចេញផ្សាយរបស់ TMZ នៅថ្ងៃ២ ខែកុម្ភៈ ឆ្នាំ២០២២នេះ បានឱ្យដឹងថា លោក Simon Cowell ដែលជាគណៈកម្មការកម្មវិធីប្រកួតសមត្ថភាពលំដាប់ពិភពលោក America’s Got Talent បានជួបគ្រោះថ្នាក់អំឡុងពេលជិះកង់អេឡិចត្រូនិច e-bike កាលពីសប្ដាហ៍មុននៅទីក្រុងឡុងដ៍។ លោកត្រូវបានបញ្ជូនទៅមន្ទីរពេទ្យភ្លាម ក្រោយកើតហេតុ ហើយគ្រូពេទ្យបានបញ្ជាក់ថា លោកបាក់ដៃខាងឆ្វេង និងមានរបួសមុខធ្ងន់ធ្ងរ។
តាមការអះអាងរបស់ប្រភពខាងលើ បានឱ្យដឹងទៀតថា នៅអំឡុងពេលជិះកង់ លោក Simon Cowell មិនបានពាក់មួកការពារជាប់នឹងក្បាលឡើយ។ លោកបានព្យាយាមទប់ក្បាលកង់ នៅពេលជិះដល់ចំនុចផ្លូវសើម។ តែជាអកុសល ផ្ទៃផ្លូវមានសភាពរអិលពេក ទើបធ្វើឱ្យលោកពិបាកទប់ល្បឿនកង់ រហូតធ្វើឱ្យជ្រុលក្រឡាច់ដួលនឹងដីតែម្ដង។
យ៉ាងណាមិញ នេះជាលើកទី២ហើយ ដែលលោក Simon Cowell ត្រូវបានបញ្ចូនទៅកាន់មន្ទីរពេទ្យ និងទទួលការវះកាត់ជាបន្ទាន់ បន្ទាប់ពីជួបគ្រោះថ្នាក់ បង្កមកពីការធ្លាក់ពីលើកង់អេឡិចត្រូនិច កាលពីអំឡុងខែសីហា ឆ្នាំ២០២០។ កាលនោះ លោកបានស៊ូទ្រាំអស់រយៈពេល៦ម៉ោង ក្នុងការវះកាត់ឆ្អឹងខ្នងរបស់លោក។
លោក Simon Cowell ក្រៅពីធ្វើជាគណៈកម្មការក្នុងកម្មវិធី «America’s Got Telent» លោកក៏ធ្វើជាគ្រូបង្វឹកក្នុងកម្មវិធីលំដាប់ពិភពលោកជាច្រើនដូចជា កម្មវិធី «Britain’s Got Talent», កម្មវិធី «The X Factor» និងកម្មវិធី «American Idol» ជាដើម៕