ក្រុមបាល់ទាត់នារីជម្រើសជាតិចិន បានក្លាយជាម្ចាស់ជើងឯកប្រចាំទ្វីបអាស៊ី 2022 AFC Women’s Asian Cup ក្រោយយកឈ្នះលើក្រុមកូរ៉េខាងត្បូង ក្នុងវគ្គផ្ដាច់ព្រ័ត្រ នៅប្រទេសឥណ្ឌា ខណៈការរៀបចំព្រឹត្តិការណ៍នេះដែរគឺជាការប្រកួតស្វែងរកក្រុមខ្លាំងតំណាងឱ្យទ្វីបអាស៊ី ចេញទៅចូលរួមប្រកួតក្នុងពានរង្វាន់ 2023 FIFA Women’s World Cup ដែលមានអូស្ត្រាលីនិងនូវែលហ្សេឡង់ ជាសហម្ចាស់ផ្ទះ។
ក្រុមចិន ឈ្នះជើងឯកពានរង្វាន់នេះចំនួន៩លើក និងបន្តជាក្រុមឈ្នះជើងឯកបានច្រើនជាងគេផងដែរ គឺនៅឆ្នាំ១៩៨៦,១៩៨៩,១៩៩១,១៩៩៣,១៩៩៥,១៩៩៧,១៩៩៩,២០០៦និង២០២២។
ងាកមកមើលក្រុមដែលទទួលបានកៅអីឡើងទៅលេងពានរង្វាន់ 2023 FIFA Women’s World Cupតំណាងអោយទ្វីបអាស៊ី មានចំនួន៥កៅអីមានជប៉ុន, កូរ៉េខាងត្បូង,ចិន,ហ្វីលីពីន និងវៀតណាម ស្របពេលដែលក្រុមអូស្រ្តាលី មានឈ្មោះឡើងដោយស្វ័យប្រវត្តិក្នុងនាមជាម្ចាស់ផ្ទះ។
សម្រាប់ប្រទេសជាសមាជិកអាស៊ាន វិញ នេះជាលើកទី៣ហើយដែលមានក្រុមនារី ក្នុងតំបន់ដណ្តើមបានឱកាសឡើងទៅប្រកួតជើងឯកពិភពលោក តែសុទ្ធសឹងជាក្រុមថ្មី មានហ្វីលីពីន និងវៀតណាម បើងាកទៅមើលប្រវត្តិ២លើកកន្លងមកគឺមានតែក្រុមថៃ ប៉ុណ្ណោះដែលធ្លាប់បង្ហាញមុខមុនគេទាំង២លើក គឺនៅឆ្នាំ២០១៥ និង២០១៩ តែធ្លាក់ត្រឹមវគ្គជម្រុះតាមពូល។
ចំណែកក្រុមថៃ និងតៃវ៉ាន់ មិនទាន់អស់ឱកាសនៅឡើយទេ ក្នុងការឡើងទៅប្រកួត 2023 FIFA Women’s World Cup ដោយត្រូវដឹកដៃតៃវ៉ាន់ ប្រកួតវគ្គជម្រុះឆ្លងទ្វីប Inter-confederation play-offs ជាមួយក្រុមមកពីទ្វីបនានា ទៀតសិន។
ត្រឡប់មកមើលលទ្ធផលម្ចាស់ជ័យលាភីក្នុងពានរង្វាន់ 2022 AFC Women’s Asian Cup គឺ៖
-ម្ចាស់ជើងឯក៖ ចិន
-ជើងឯករង៖ កូរ៉េខាងត្បូង
-ម្ចាស់ស្បែកជើងមាស៖ San Kerr (អូស្ត្រាលី) រកបាន៧គ្រាប់ច្រើនជាងគេ
-កីឡាការិនីល្អជាងគេ៖ Wang Shanshan (ចិន)
-អ្នកចាំទីល្អជាងគេ៖ Zhu Yu (ចិន)
-ក្រុម Fair Play៖ កូរ៉េខាងត្បូង
ចំណែកឯក្រុមដែលមានឈ្មោះចូលរួមប្រកួតក្នុងពានរង្វាន់ 2023 FIFA Women’s World Cup ទាំង៣២ក្រុមមាន៖
-ទ្វីបអាស៊ីជ្រើសចេញពីពាន 2022 AFC Women’s Asian Cup ចំនួន៥ក្រុម (បូកម្ចាស់ផ្ទះ១ក្រុម)
-ទ្វីបអាហ្វ្រិក ជ្រើសចេញពីពាន 2022 Africa Women Cup of Nations ចំនួន៤ក្រុម
-ទ្វីបអាមេរិកខាងជើង ជ្រើសចេញពីពាន 2022 CONCACAF W Championship ចំនួន៤ក្រុម
-ទ្វីបអាមេរិកខាងត្បូង ជ្រសចេញពីពាន 2022 Copa América Femenina ចំនួន៣ក្រុម
-ទ្វីបអូសេអានី ជ្រើសចេញពីពាន 2022 OFC Women’s Nations Cup មាន១ក្រុម (ម្ចាស់ផ្ទះនូវែលហ្សេឡង់)
-ទ្វីបអឺរ៉ុប ជ្រើសចេញពីវគ្គជម្រុះប្រចាំទ្វីប 2023 FIFA Women’s World Cup qualification មាន១១ក្រុម
-វគ្គជម្រុះឆ្លងទ្វីប Inter-confederation play-offs មានចំនួន៣ក្រុម