សូមចូលរួមអបអរសាទរបេក្ខនារីតំណាងខេត្តកំពង់ឆ្នាំង កញ្ញា ហេង រិនសុម៉ាលីតា បានឈ្នះជាជ័យលាភីធីតាឯកសង្ក្រាន្តរដូវកាលទី៣ ដែលនឹងក្លាយជាតួអង្គតំណាងឱ្យទេធីតាសង្ក្រាន្តប្រចាំឆ្នាំខាល គឺព្រះនាង «កិរិណីទេវី»។
កម្មវិធីប្រកួតធីតាឯកសង្ក្រាន្តបានប្រារព្ធឡើងចំនួន៣លើកប្រកបដោយជោគជ័យតាមរយៈការរៀបចំរបស់ Fun Entertainment ដើម្បីសម្រិតសម្រាំងរកឱ្យបាននារីរូបស្អាតមកដើរតួអង្គជាបុត្រីរបស់កុបិលមហាព្រហ្ម ឬហៅឱ្យសាមញ្ញគឺធីតាសង្ក្រាន្តប្រចាំឆ្នាំនីមួយៗដែលនឹងចុះមកមើលថែរក្សាជម្ពូទ្វីប។
ឆ្នាំនេះម្ចាស់តំណែងធីតាឯកសង្ក្រាន្តបានធ្លាក់ទៅលើកញ្ញាដ៏ស្រស់ស្អាតគឺ ហេង រិនសុម៉ាលី ដែលកញ្ញាអាចចាត់ទុកថាមានបទពិសោធច្រើនក្នុងរង្វង់សិល្បៈព្រោះកញ្ញាមិនត្រឹមតែជាតារាសម្ដែង កញ្ញាថែមទាំងជាតារាចម្រៀងថែមទៀតផង។ នេះបើយោងតាមការស្រាវជ្រាវលើ Profile ដែលកញ្ញាបានសរសេររៀបរាប់នៅលើ Account របស់កញ្ញាផ្ទាល់។ ម្ចាស់ជ័យលាភីចំណាត់ថ្នាក់លេខមួយទទួលបានមកុដមួយ ពានមួយ និងប្រាក់រង្វាន់ចំនួន១២លានរៀល (ប្រមាណ៣ពាន់ដុល្លារអាមេរិក)។
នារីដែលមានតួនាទីជា Cabin Crew ឬខ្មែរយើងនិយមហៅថានារីអាកាសចរណ៍រូបនេះនឹងក្លាយជាតួអង្គទេពធីតាសង្ក្រាន្ត ព្រះនាង កិរីណីទេវី ជាបុត្រីទី៣ របស់កបិលមហាព្រហ្ម ប្រចាំឆ្នាំថ្មីឆ្នាំខាល ចត្វាស័ក ពុទ្ធសករាជ ២៥៦៦ នេះ៕