កន្លងមកថ្មីៗនេះ នៅលើបណ្ដាញសង្គម TikTok មហាជនអ្នកលេងបណ្ដាញសង្គមនៅតែបែងចែកមិនដាច់ពីវីដេអូដែលឃើញ កូនកំឡោះវ៉ៃសង្សាចាស់កូនក្រមុំនៅក្នុងពេលសំពះផ្ទឹម ថាជាព្រឹត្តិការណ៍កើតពិតនៅក្នុងសង្គម ឬជាការសម្ដែងរឿង។
មហាជនភាគច្រើនយល់ឃើញថា ឃ្លីបនេះគឺជាព្រឹត្តិការណ៍សង្គមពិត ថែមទាំងប្រតិកម្មខ្លាំងចំពោះកូនកំឡោះ និងចង់វែកមុខរកពិតថែមទៀតផង។ ថ្ងៃនេះសារព័ត៌មានត្រយង សូមនាំអារម្មណ៍មហាជនទាំងអស់គ្នា មកដឹងពីឈុតឆាកមួយប្លង់ក្នុងបទចម្រៀង «ព្រមឱ្យអូនការ» ដែលជាការច្រៀង Cover របស់លោក សុវណ្ណ សីហា។
អ្វីដែលសារព័ត៌មានត្រយងបានដឹងថា ការពិតទៅប្លង់កូនកំឡោះវ៉ៃសង្សារចាស់របស់កូនក្រមុំនោះ តួកូនកំឡោះត្រូវបានសម្ដែងដោយលោក ហាស់ សំអាត ដែលជាតារាចម្រៀង និងសម្ដែង ហើយសង្សារចាស់កូនក្រមុំ សម្ដែងដោយលោក សុវណ្ណ សីហា។ តែយ៉ាងណាមិញ មុនពេលបញ្ចេញវីដេអូ MV Cover នោះ ឈុតក្រៅឆាកនៃការសម្ដែង ត្រូវបានបង្ហោះមុនជាស្រេច ដើម្បីទាក់ទាញការចាប់អារម្មណ៍ពីមហាជន ដែលជាយុទ្ធសាស្ត្រនៃការប្រម៉ូតបទចម្រៀង។ យុទ្ធសាស្ត្រមួយនេះ ត្រូវបានគេឃើញថាមានការប្រើប្រាស់ច្រើននៅលើបណ្ដាញសង្គមអនឡាញន៍។
បទចម្រៀង«ព្រមឱ្យអូនការ» ជាការបកស្រាយសំនៀងដើមដោយលោក ជុំ លីណូ នៅក្នុងផលិតកម្មសាន់ដេ កាលពី៥ឆ្នាំមុន។ ហើយបទមួយនេះត្រូវបានលោក សុវណ្ណ សីហា យកមកច្រៀង Cover ឡើងវិញ នឹងមានអ្នកទស្សនានៅលើយូធូបតែ 15K តែប៉ុណ្ណោះ ក៏ប៉ុន្ដែមកល្បីនូវឃ្លីបកូនកំឡោះវ៉ៃសង្សារចាស់របស់កូនក្រមុំ រហូតដល់ចំនួនខ្ទង់រាប់លានដងនៃចំនួនអ្នកចូលទស្សនា។
ចង់ដឹងសាច់រឿងពិតយ៉ាងណានោះ តោះមកទស្សនាវីដេអូខាងក្រោមនេះ៖
