ថ្មីៗនេះ អ្នកដឹកនាំលោក នាង កាវិច បានដកស្រង់ប្រវត្តិពិតរបស់លោកក្នុងអំឡុងពេលស្នាក់នៅក្នុងអាគារប៊ូឌីង ដែលជាសំណង់ចាស់មួយក្នុងរាជធានីភ្នំពេញ មកផលិតជាខ្សែភាពយន្ដមានចំណងជើងថា «ប៊ូឌីញស» ឬ White Building ។ បន្ទាប់មកភាពយន្ដនេះបានធ្វើដំណើរទៅបញ្ចាំងនៅក្នុងមហោស្រពភាពយន្ដអន្ដរជាតិជាច្រើនប្រទេស និងបានដណ្ដើមពានរង្វាន់ជាច្រើនថែមទៀត។
ភាពយន្ដមួយនេះ បានចូលទៅដណ្ដើមពានរង្វាន់ នៅក្នុងមហោស្រពភាពយន្ត ក្រុងVenice លើកទី ៧៨ នៅប្រទេសអ៊ីតាលី កាលដើមខែកញ្ញា និងបាននាំមោទកភាពជូនកូនខ្មែរគ្រប់រូប។ សម្រាប់ផលិតករខ្មែរ លោក នាង កាវិច ជាកូនខ្មែរ និងផលិតករខ្មែរទី១ ដែលបាននាំយកខ្សែភាពយន្តទៅប្រកួតប្រជែងក្នុងមហោស្រពអន្តរជាតិ ក្រុង Venice ដែលជាមហោស្រពខ្សែភាពយន្តអន្តរជាតិចំណាស់ជាងគេបង្អស់ក្នុងពិភពលោក។ ខ្សែភាពយន្តនេះ កំពុងតែទទួលបានការចាប់អារម្មណ៍ខ្លាំង នៅរោងភាពយន្តប្រទេសបារាំង និងបានធ្វើដំណើរទៅកាន់ទីក្រុងបែលស៊ីក មហោស្រពភាពយន្ដ Namur International French Language Film Festival ទីក្រុងឡុងដ៍ ក្នុងមហោស្រព BFI London Film Festival ទីក្រុងប៊ូសាន មហោស្រព Busan International Film Festival និងទីក្រុងឈីកាហ្គូ Chicago Film Festival។
យ៉ាងណាមិញ បើតាមការបង្ហោះរបស់ហ្វេសប៊ុកផេក Major Cineplex បានអះអាងថា ភាពយន្ដ «បូឌីញស» បានត្រឡប់មកចាក់បញ្ចាំងនៅក្នុងរោងភាពយន្ដប្រទេសកម្ពុជា នឹងមានចាក់បញ្ចាំងនៅរោងភាពយន្ត Major Cineplex by Smart នៅថ្ងៃទី ៧ មេសា ខាងមុខនេះ។ អគារសត្រូវបានសាងសង់ក្នុងឆ្នាំ ១៩៦៣ ដោយស្ថាបត្យករខ្មែរ លុយ បានហាប់ និងស្ថាបត្យកររុស្សី វ្ល៉ាឌីមៀ បូឌៀនស្គី ក្រោមការត្រួតពិនិត្យដោយស្ថាបត្យកររដ្ឋខ្មែរ លោក វណ្ណ ម៉ូលីវណ្ណ។ អគារនេះ ត្រូវបានបោះបង់ចោល នៅពេលដែលខ្មែរក្រហមឡើងកាន៉អំណាច និងជម្លៀសប្រជាពលរដ្ឋចេញពីរាជធានីភ្នំពេញនៅថ្ងៃទី ១៧ ខែមេសា ឆ្នាំ១៩៧៥៕