សហព័ន្ធកីឡាបាល់ទាត់ម៉ាឡេស៊ី បានប្រកាសសមាសភាគគ្រូបង្វឹកថ្មីសម្រាប់ក្រុមជម្រើសជាតិខ្លួន ជាអតីតអនុប្រធានសហព័ន្ធកីឡាបាល់ទាត់កូរ៉េខាងត្បូង នៅថ្ងៃព្រហស្បត្តិ៍ សប្ដាហ៍នេះ ក្រោយចែកផ្លូវជាមួយលោកTan Cheng Hoe ក្រោយចប់ព្រឹត្តិការណ៍ AFF Suzuki Cup 2020 កន្លងទៅ។
លោក Kim Pan-gon វ័យ៥២ឆ្នាំ ជាគ្រូបង្វឹកថ្មីរបស់ក្រុមជម្រើសជាតិម៉ាឡេស៊ី ខណៈលោកធ្លាប់មានបទពិសោធន៍ការងារជាច្រើននៅអាស៊ីខាងកើត ដោយធ្លាប់ដឹកនាំក្រុមកោះហុងកុងផង និងក្លិបមួយចំនួននៅស្រុកកំណើតនិងនៅហុងកុង ផងដែរ។ ចុងក្រោយចន្លោះឆ្នាំ២០១៧ ដល់២០២១ លោកជាប់ឈ្មោះជាអនុប្រធានសហព័ន្ធកីឡាបាល់ទាត់កូរ៉េខាងត្បូង។
លោក Kim Pan-gon បានលើកឡើងក្រោយចាប់ការងារនៅតំបន់អាស៊ីអាគ្នេយ៍ថា៖«មនុស្សជាង៣២លាននាក់ កំពុងតែផ្តោតអារម្មណ៍មកលើយើង។ ខ្ញុំនឹងព្យាយាមឱ្យអស់ពីសមត្ថភាពរបស់ខ្ញុំ ដើម្បីឱ្យពួកគេរីករាយ និងមានមោទនភាព។ ខ្ញុំនឹងប្រយុទ្ធក្នុងនាមជាម៉ាឡេស៊ី។ ខ្ញុំសង្ឃឹមថាខ្ញុំអាចនាំម៉ាឡេស៊ី ឡើងទៅកាន់កម្រិតខ្ពស់មួយទៀត»។
ក្រោយចូលដឹកនាំក្រុមជម្រើសជាតិម៉ាឡេស៊ី លោក Kim រៀបចំផែនការប្រកួតមិត្តភាពអន្តរជាតិនៅខែមីនា ខាងមុខ ដោយត្រូវជួបហ្វីលីពីន នៅថ្ងៃទី២៣ មីនា ២០២២ និងបន្តជួបសិង្ហបុរី នៅថ្ងៃទី២៦ មីនា ២០២២៕
