អាមេរិក-តារាចម្រៀងនាង Nightbirde ដែលឈ្នះប៊ូតុងមាសពីលោក Simond Cowell ក្នុងកម្មវិធី America’s Got Talent បានស្លា.ប់នៅត្រឹមវ័យ៣១ឆ្នាំដោយសារជំងឺមហារីក។
កាលពីថ្ងៃទី២១ ខែកុម្ភៈ ឆ្នាំ២០២២ ពិធីករ Terry Crews បាននិយាយថា «ពួកយើងពិតជាមានទុក្ខយ៉ាងក្រៀមក្រំដែលបានដឹងដំណឹងនេះ។ខ្ញុំសូមចូលរួមរំលែកទុក្ខចំពោះមិត្តភក្ដិនិងក្រុមគ្រួសារសព»
ចំណែកគណៈកម្មការមួយរូបនៃកម្មវិធី AGT Howie Mandelក៏បានចេញមកនិយាយដែរថារូបខ្លួនពិតជាមានសំណាងដែលបានស្គាល់និងធ្វើការជាមួយនឹង Nightbirde មួយរយៈពេលខ្លី។ «យើងនឹងបន្តរស់ហើយរៀនសូត្រពីបទចម្រៀងរបស់អ្នក»។ នេះគឺជាអ្វីដែលតារាកំប្លែងរូបនេះបានសរសេរឡើងនៅលើផេករបស់លោក។
កញ្ញា Jane Marczewski ជាអ្នករដ្ឋ Ohio បានចូលប្រកួត AGT កាលពីខែមិថុនាឆ្នាំ២០២១ ដោយលើកយកបទចម្រៀងផ្ទាល់ខ្លួន (original song) មានចំណងជើង «It’s OK» ដែលអត្ថន័យសាច់រឿងនិយាយពីការព្យាបាលជំងឺមហារីករបស់ខ្លួនមួយរយៈកន្លងមក។
ងាកមកផលិតករល្បីលោក Simon Cowell ធ្លាប់បានលើកសរសើរពីសំឡេងរបស់ Nightbirde ហើយថែមទាំងចុច ប៊ូតុងមាសឱ្យនាងឆ្លងទៅដល់វគ្គ Finalថែមទៀតផង។ ការសម្ដែងរបស់នាងមិនត្រឹមតែមានការទទួលស្គាល់ពីគណៈកម្មការនោះទេ សូម្បីតែនៅលើបណ្ដាញ Social Media ពិសេស Youtube មានចំនួនទស្សនារហូត៣៩លានដង។ យ៉ាងណាមិញបេក្ខនារីរូបនេះបានដាច់ចិត្តដកខ្លួនពីការប្រកួតដោយសារជំងឺមហារីកធ្វើទុក្ខខ្លាំង។
កម្មវិធី America’s Got Talent គឺជាកម្មវិធីផ្សាយលើទូរទស្សន៍ NBC មានគណៈកម្មការ៤រូបជាកាត់សេចក្ដីមាន Howie Mandel, Heidi Klum, Sofia Vergara និង Simon Cowell។ កម្មវិធីនេះមានតារាកំប្លែង Terry Crews ដើរតួនាទីជាពិធីករ៕
