ប្រជាជនអ៊ុយក្រែនដែលរស់នៅក្នុងទីក្រុងធំៗជុំវិញពិភពលោក កំពុងតវ៉ាប្រឆាំងនឹងសង្រ្គាម ទាមទារឱ្យ លោកពូទីន បញ្ចប់ការវាយប្រហារ។
ដោយសារតែព្រឹត្តិការណ៍នៃការវាយប្រហាររបស់រុស្ស៊ីលើអ៊ុយក្រែន ជាលទ្ធផលមានមនុស្ស ១៣៧នាក់បាត់បង់ជីវិត និងមនុស្ស ៣១៦នាក់បានទទួលរងរបួស។ ប្រជាជនអ៊ុយក្រែននៅក្នុងទីក្រុងធំៗជុំវិញពិភពលោកបានធ្វើការតវ៉ាប្រឆាំងនឹងសង្គ្រាមនេះ។
បាតុករអ៊ុយក្រែនរាប់រយនាក់បានប្រមូលផ្តុំគ្នានៅផ្លូវ Downing Street ក្នុងទីក្រុងឡុងដ៍ ដែលជាតំបន់ការិយាល័យ និងផ្ទះរបស់នាយករដ្ឋមន្ត្រីអង់គ្លេស Boris Johnson ស្ថិតនៅ ដើម្បីអំពាវនាវដល់ចក្រភពអង់គ្លេស និងអង្គការដទៃទៀត រារាំងការវាយប្រហារឈ្លានពានរបស់រុស្ស៊ីមកលើអ៊ុយក្រែន។
នៅសហរដ្ឋអាមេរិកឯនោះវិញ ក៏ក្រុមបាតុករអ៊ុយក្រែនបានប្រមូលផ្តុំគ្នានៅក្នុងទីក្រុងធំៗជាច្រើនដូចជាទីក្រុងញូវយ៉ក ក្រុមអ្នកតវ៉ាគ្រវីទង់ជាតិអ៊ុយក្រែន នៅមុខការិយាល័យរដ្ឋាភិបាលរុស្ស៊ី និងអំពាវនាវឱ្យលោកប្រធានាធិបតីរុស្ស៊ី វ៉្លាឌីមៀ ពូទីន បញ្ចប់ការវាយប្រហារលើអ៊ុយក្រែន។ ក្រៅពីក៏មានពលរដ្ឋអ៊ុយក្រែនធ្វើបាតុកម្មនៅទីក្រុងធំៗជុំវិញពិភពលោកដូចជាទីក្រុងប៉ារីស ប្រទេសបារាំងនិងទីក្រុង Lisbon ប្រទេសព័រទុយហ្គាល់។ ក្រុមបាតុករមានគោលដៅដូចគ្នាគឺអំពាវនាវឱ្យរុស្ស៊ីបញ្ចប់ការឈ្លានពានអ៊ុយក្រែន។
ប្រធានាធិបតីអ៊ុយក្រែន លោក Volodymyr Zelensky បាននិយាយថា ទោះបីជារុស្ស៊ីអះអាងថានឹងកំណត់គោលដៅតែលើកងទ័ពអ៊ុយក្រែន ប៉ុន្តែគេបានរកឃើញថាអគារស៊ីវិលត្រូវបានវាយប្រហារនិងខូចខាត ទាហាននិងជនស៊ីវិលយ៉ាងហោច១៣៧នាក់បានស្លាប់ និងជាង៣១៦នាក់រងរបួស ។ បើតាមរបាយការណ៍បឋមពីអាជ្ញាធរអ៊ុយក្រែន ប្រជាជនយ៉ាងហោចណាស់ ១០០,០០០នាក់បានរត់ភៀសខ្លួន ខណៈមួយចំនួនបានសម្ងំស្នាក់នៅ ក្នុងផ្លូវរថភ្លើងក្រោមដី៕
ប្រភព៖ Thairath
