យោងតាមសារព័ត៌មាន Mailonline នៅពេលថ្មីនេះៗបានឱ្យដឹងថា កងកម្លាំងអ៊ុយក្រែនបានអះអាងថា ក្នុងរយៈពេលមួយថ្ងៃខ្លួនបានធ្វើឱ្យកងទាហានរុស្ស៊ីបាត់បង់ជីវិតជាង១០០០នាក់។
មានកងកម្លាំងរបស់ប្រធានាធិបតី វ្ល៉ាឌីមៀ ពូទីន បានបាត់បង់ទាហានប្រមាណ២៨០០នាក់ រថក្រោះ៨០ គ្រឿង រថពាសដែក៥១៦គ្រឿង យន្តហោះ១០គ្រឿងនិងឧទ្ធម្ភាគចក្រ ៧គ្រឿង នេះបើតាមរបាយការណ៍សរុបរបស់ក្រសួងការពារជាតិអ៊ុយក្រែន។ មន្ត្រីរុស្ស៊ីបានធ្វើការអះអាងស្រដៀងគ្នាដែរថា ទីក្រុងម៉ូស្គូបានចាប់ទាហានអ៊ុនក្រែនជាង ១៦០នាក់ បំផ្លាញទីតាំងទ័ពជើងគោកអ៊ុយក្រែន៧៤ កំទេចស្ថានីយរ៉ាដាចំនួន១៨ បាញ់ទម្លាក់យន្តហោះ៥គ្រឿងនិងឧទ្ធម្ភាគចក្រមួយគ្រឿង បំផ្លាញរថក្រោះ១៨គ្រឿង និងរថពាសដែកមួយចំនួនទៀត។
កងម្លាំងអ៊ុយក្រែនក៏បានអះអាងដែរថា ខ្លួនបានវាយប្រហារចំអាកាសយានដ្ឋានមួយនៅទីក្រុង Millerovo នៅរុស្ស៊ីខាងត្បូងដោយបំផ្លាញយន្តហោះ Su-30SM យ៉ាងតិចមួយគ្រឿង។ យ៉ាងហោចណាស់ ជនជាតិអ៊ុយក្រែន ៣៧នាក់ និងជនស៊ីវិលជាច្រើននាក់បានបាត់បង់ជីវិតនិងរាប់រយនាក់ទៀតរងរបួស នៅក្នុងការប្រយុទ្ធគ្នារយៈពេល ២៤ម៉ោងតែប៉ុណ្ណោះ។ កងទ័ពអ៊ុយក្រែនដែលមានភារកិច្ចការពារទីក្រុងបានចាប់ផ្តើមដំឡើងទីតាំងការពារនៅទូទាំងផ្លូវហាយវេ លើស្ពាន និងនៅកាច់ជ្រុងផ្លូវ ដើម្បីរៀបចំសម្រាប់អ្វីដែលហាក់ដូចជាការប្រយុទ្ធបង្ហូរឈាមពីផ្លូវមួយទៅផ្លូវនៅចុងសប្តាហ៍នេះ។ កងកម្លាំងអ៊ុយក្រែនក៏អះអាងថាបានបាញ់ទម្លាក់យន្តហោះរុស្ស៊ីចំនួនប្រាំមួយគ្រឿងលើតំបន់ Donbassនិងមួយគ្រឿងទៀតធ្លាក់ជិតរដ្ឋធានីកៀវ។
យោធារដ្ឋធានីកៀវ ត្រូវទុកឱ្យប្រឈមមុខការតាំងជាមួយទាហានរបស់រុស្ស៊ីតែម្នាក់ឯង បន្ទាប់ពីអង្គការណាតូនិងសហរដ្ឋអាមេរិក បានបញ្ជាក់ថា ពួកគេនឹងមិនលូកដៃក្នុងរឿងនេះ។ មានការព្យាករណ៍រំពឹងទុកថាអ៊ុយក្រែនមានសង្ឃឹមតិចនឹងទទួលបានជ័យជំនះក្នុងសង្គ្រាមនេះ បើទោះក្នុងចិត្តថារំពឹងថាសង្រ្គាមនឹងអូសបន្លាយ ហើយបង្ហូរឈាមយ៉ាងកាចសាហាវ ប៉ុន្តែរហូតមកដល់ថ្ងៃនេះ កងកម្លាំងនៅរដ្ឋធានីកៀវ ក៏បានខាតបង់យ៉ាងធ្ងន់ធ្ងរលើកងទ័ពរបស់លោកពូទីនផងដែរ៕