ក្រុមបាល់ទាត់ភ្នំពេញក្រោន បានក្លាយជាម្ចាស់ជើងឯកពានរង្វាន់បាល់ទាត់ Cambodian Super Cup 2022 ដែលរៀបចំឡើងដោយក្រុមហ៊ុន Cambodian Premier League ក្រោយយកឈ្នះលើក្រុមវិសាខា ដោយលទ្ធផល ២ទល់១ លើទីលានកីឡដ្ឋានកងយោធពលខេមរភូមិន្ទ នៅរាត្រីថ្ងៃអង្គារ ទី១ ខែមីនា ឆ្នាំ២០២២ នេះ។
ភ្លាមៗនោះអ្នកគាំទ្រវិសាខាម្នាក់មិនបញ្ចេញឈ្មោះបានលើកឡើងថា៖«កីឡាមានចាញ់មានឈ្នះជារឿងធម្មតាទេ តែសុំផ្តាំទៅកីឡាករវិសាខាផងអោយតម្លៃអ្នកគាំទ្រផង ពួកយើងទៅ Cheer គ្មានបានប្រាក់ខែទេឈរស្រែកចង់ដាច់បំពង់ក លេងចប់គ្រាន់តែមកអរគុណបន្តិចក៏គ្មានដែរ មិនមែនម្តងទេច្រើនដងហើយ។ ពួកយើងមកនេះដើម្បីចង់ឃើញ ការប្រកួតប្រជែងមួយដែលល្អប្រសើឡើង មិនមែនលទ្ធផលបែបនិង ហើយចរិកកីឡាករបែបនិងទេ, កុំដោយសារតែជំងឺតួឯករបស់អ្នក ធ្វើអោយបាត់បង់អ្នកគាំទ្រក្លិបពិតប្រាកដ, ពួកអ្នកបើអត់មានប្រាក់ខែមកលេងបាល់អោយវិសាខាទេ? (គ្មានទេ) ហើយតិចច្រលំពួកខ្ញុំមានប្រាក់ខែដូចអ្នកទៅ ពួកយើងនិយាយនេះដើម្បីក្លិបព្រោះថ្នាក់ដឹកនាំលះបង់ច្រើនណាស់ ចុងក្រោយលទ្ធផល និងការប្រកួតប្រជែងមិនទៅមុខសោះ!»។
លោក មាស ចាន់ណា អ្នកចាត់ការទូទៅក្លិបបាល់ទាត់ វិសាខា ក៏បានបង្ហោះសារសំុទោសជាសាធារណៈទៅកាន់អ្នកគាំទ្រដូច្នេះថា៖«ក្នុងនាមជាអ្នកចាត់ការទូទៅ និង តំណាងអោយកីឡាករក្លិបបាល់ទាត់ វិសាខាទាំងអស់ ខ្ញុំសូមអភ័យទោសដល់អ្នកគាំទ្រទាំងអស់ចំពោះការឆ្គាំឆ្គងកាលពីប្រកួតម្សិលមិញ ហើយយើងខ្ញុំនឹងប្តេជ្ញាមិនអោយមានទង្វើបែបនេះម្តងទៀតឡើយ»៕
