ឥណ្ឌា – កាលពីដើមសប្ដាហ៍កន្លងមកនេះតារាសម្ដែងនិងតារាចម្រៀងជួរមុខរបស់ Bollywood លោក Tiger Shroff បានបញ្ចេញបទចម្រៀងថ្មីមានចំណងជើងថា «Poori Gal Baat» ប៉ុន្តែបទចម្រៀងនេះបែរជាទទួលរងនូវការរិះគន់យ៉ាងចាស់ដៃទៅវិញ។
អ្នកគាំទ្រដែលចូលទៅទស្សនាបទនោះភាគច្រើនមិនមែនដោយសារតែពេញចិត្តនិងគាំទ្រឡើយប៉ុន្តែដោយហេតុផលមួយផ្សេងទៅវិញ។ អ្នកគាំទ្របានសម្គាល់ឃើញចំណុចដូចគ្នាច្រើនរវាងបទចម្រៀងថ្មីនេះនិងបទចម្រៀងចាស់របស់សមាជិកក្រុម EXO បានចេញកាលពីឆ្នាំ២០២១ មានចំណងជើងថា «Peaches» ច្រៀងដោយ Kai។
ហ្វេនបានពន្យល់រៀបរាប់ទៅតាមលក្ខណៈបច្ចេកទេសនៅក្នុងចំណោមចំណុចពន្យល់ពីភាពស្រដៀងរវាងបទទាំងពីរនេះមានច្រើន ដោយក្នុងនោះគេថែមទាំងទាញយកត្រង់ចំណុចប៉ារ៉ូលចម្រៀងមកបង្ហាញទៀតថាបទទាំងពីរនេះក៏មានលក្ខណៈស្រដៀងគ្នាដែរ ដោយបទ «Peaches» បានប្រៀបនារីទៅនឹងផ្លែឈើ ចំណែកឯបទ «Poori Gal Baat» បានប្រៀបនារីទៅនឹងផ្កា។
មិនអស់ត្រឹមនេះគេថែមទាំងលើកពីក្បាច់រាំនៅក្នុងបទចម្រៀងទាំងពីរមកបង្ហាញដែរ ដោយមានការអះអាងថាពីភាពស្រដៀងគ្នារវាងបទទាំងពីរនេះផងដែរ ក្នុងនោះមានទាំងក្បាច់រាំ ក៏ដូចជារូបភាពឈុតសម្ដែងរាំនៅក្នុងទឹកជាដើម។
បទចម្រៀង «Peaches» គឺជាបទចម្រៀងមួយក្នុងចំណោមបទចម្រៀងនៅក្នុង single «Mmmh» ដែល Kai ចេញច្រៀងដាច់ដោយឡែកពីក្រុមជាលើកដំបូងរបស់ខ្លួនកាលពីឆ្នាំ២០២០។
កន្លងមក Shroff តែងតែពោលជាញឹកញាប់ថា Kai គឺជាតារាចម្រៀងមួយរូបដែលគេចូលចិត្ត ហើយគេថែមទាំងធ្លាប់បាន រាំ Cover បទចម្រៀង «Peaches» ដោយផ្ទាល់បង្ហោះលើគណនី Instagram ផងដែរ។ ហ្វេនជាច្រើនបានសុំឱ្យតារាបូលីវូដរូបនិងផលិតកម្មគ្រប់គ្រងលើលោក Zee Music ផ្ដល់ Credit ឱ្យម្ចាស់ដើមដូចជា Kai ក៏ដូចជាផលិតករ និងអ្នកចេញក្បាច់រាំដើមដែលបង្កើតក្បាច់សម្រាប់បទ «Peaches» និង «Mmmh»។
ចំពោះបញ្ហាចោទខាងលើនេះ ផលិតកម្ម SM Town, Zee Music ក៏ដូចជាតារាចម្រៀងទាំងពីរភាគីមិនបានចេញមកឆ្លើយតប ឬបញ្ចេញមតិយោបល់អ្វីនោះឡើយ៕
ប្រភព៖ Rollingstoneindia
