ក្លិបបាល់ទាត់បឹងកេត បានចុះបញ្ជីកីឡាករបរទេសទី៥របស់ខ្លួន មកពីទ្វីបអឺរ៉ុប គឺជាអតីតសមាជិកក្លិប HIFK Fotboll នៅលីគកំពូលនៃប្រទេសហ្វាំងឡង់ ដើម្បីត្រៀមការប្រកួតពានរង្វាន់លីគកំពូលកម្ពុជា Cambodian Premier League 2022។
កីឡាកររូបនោះមានឈ្មោះថា Sakari Tukiainen មានវ័យ៣០ឆ្នាំ មានកម្ពស់ ១,៩០ម៉ែត្រ លេងជាខ្សែប្រយុទ្ធ ដោយចូលរួមជាមួយក្រុម HIFK ចន្លោះឆ្នាំ២០១៩ ដល់២០២១។ នេះជាលើកដំបូងរបស់រូបគេ ដែលធ្វើដំណើរមកកាន់ទ្វីបអាស៊ី ដោយឆ្ពោះមកកាន់ព្រះរាជាណាចក្រកម្ពុជា ខណៈកន្លងមករូបគេធ្លាប់ទៅប្រកបអាជីពនៅប្រទេសអេស្តូនី និងដាណឺម៉ាក ផងដែរ។
កីឡាករ Sakari Tukiainen ពាក់អាវលេខ៤៤ ស្ថិតក្នុងបញ្ជីកីឡាករបម្រុង អំឡុងពេលដែលក្រុមបឹងកេត យកឈ្នះលើក្រុមណាហ្គាវើល ដោយលទ្ធផល ៣-១ ក្នុងប្រកួតបើករដូវកាលឆ្នាំ២០២២ នៅរសៀលថ្ងៃសៅរ៍ ទី៥ មីនា នេះ។
ងាកមកមើលបញ្ជីឈ្មោះកីឡាករបរទេសទាំង៥រូបរបស់បឹងកេត ដែលលោកគ្រូបង្វឹក គឹម ភក្តី ត្រៀមរដូវកាលថ្មីនេះមាន Mustafa Zazai ជនជាតិអាហ្វហ្គានីស្ថាន Alexandre Cardoso ជនជាតិប្រេស៊ីល Sakari Tukiainenជនជាតិហ្វាំងឡង់ Ajayi Opeyemi Korede ជនជាតិនីហ្សេរីយ៉ា Taher Jahanbakhsh ជនជាតិអ៊ីរ៉ង់៕