កូរ៉េខាងត្បូង – ផលិតកម្ម 9ato Entertainment ដែលគ្រប់គ្រងលើតារាសម្ដែងរូបស្រស់ Han So Hee បានចេញលិខិតប្រកាសថាតារាសម្ដែងរបស់ខ្លួនរូបនេះនឹងមិនចេញមុខសងបំណុលជួសម្ដាយរបស់ខ្លួនឡើយ។
ថ្មីៗនេះ មានលេចឮដំណឹងថាម្ដាយរបស់ Han So Hee ត្រូវបានប្ដឹងពាក់ព័ន្ធនឹងករណីបោកប្រាស់ ប៉ុន្តែកូនស្រីដែលជាតារាសម្ដែងល្បីនឹងមិនលូកដៃចូលទៅក្នុងបញ្ហានេះនោះឡើយ។ ខាងក្រោមនេះគឺជាលិខិតដែលផលិតកម្មរបស់កញ្ញាបានចេញមកប្រកាស៖
«ជំរាបសួរ នេះគឺផលិតកម្ម 9ato Entertainment យើងសរសេរលិខិតនេះដើម្បីពន្យល់ពីបញ្ហាម្ដាយរបស់តារាសម្ដែង Han So Hwee។ ម្ដាយតារារូបនេះគឺលោកស្រី Shin បានប្រើឈ្មោះគណនីធនាគារដាក់ឈ្មោះកូនស្រីហើយដំណើរការខ្ចីលុយ។ គណនីនេះបង្កើតឡើងតាំងពី Han So Hee នៅក្មេង ដោយគ្មានការអនុញ្ញាតពីកូនស្រីឡើយ មួយវិញទៀតលោកស្រី Shin បានប្រើឈ្មោះគណនីនេះទៅខ្ចីបំណុលដោយមិនបានឱ្យកូនស្រីដឹង។
នេះមិនមែនជាករណីលើកទីមួយឡើយដែលកើតឡើងព្រោះកន្លងមកក៏ធ្លាប់មានករណីស្រដៀងនេះកើតឡើងដែរ ប៉ុន្តែករណីទាំងអស់នេះត្រូវបានតុលាការបញ្ចាក់ថារឿងរ៉ាវទាំងអស់មិនពាក់ព័ន្ធនឹងតារាស្រីរូបនេះឡើយ។ យោងតាមតុលាការ Ulsan បានប្រកាសកាលពីថ្ងៃទី៨ មេសា ឆ្នាំ២០២១ ជនជាប់ចោទបានប្រើឈ្មោះ Han So Hwee ប៉ុន្តែមិនមានភស្ដុតាងណាមួយច្បាស់លាស់ឬមានទម្ងន់គ្រប់គ្រាន់អាចបញ្ជាក់ថាតារាស្រីរូបនេះបានដឹងឬត្រូវទទួលខុសត្រូវសងបំណុលជាមួយនឹងជនជាប់ចោទ។
តាំងនាមឱ្យផលិតកម្មដែលគ្រប់គ្រងលើតារាស្រី Han So Hwee ផលិតកម្មសុំអភ័យទោសដែលបង្កឱ្យមានការបារម្ភចំពោះជីវិតឯកជនរបស់តារាស្រីរបស់ខ្លួន ម្យ៉ាងទៀតការដែលផលិតកម្មចេញមកទម្លាយភស្ដុតាងនិងពន្យល់ចំពោះរឿងនេះព្រោះមិនចង់ឱ្យមានជនរងគ្រោះបន្តទៀតនាពេលអនាគត។
បន្ថែមលើសពីនេះទៀត Han So Hwee គ្មានផែនការចេញប្រាក់សងបំណុលជួសម្ដាយរបស់ខ្លួនឡើយ ដោយការធ្វើបែបនេះគឺដើម្បីកុំឱ្យម្ដាយរបស់ខ្លួនប្រើប្រាស់ឈ្មោះកូនស្រីទៅខ្ចីបំណុលថែមទៀតនាថ្ងៃអនាគត ជាពិសេសគឺការពារកុំឱ្យក្រុមហ៊ុនក្រៅប្រព័ន្ធច្បាប់ព្យាយាមគំរាមកំហែងម្ដាយកញ្ញា ដោយសារតែមានកូនស្រីជាតារាសម្ដែងល្បី។
«ជាការពិតណាស់ ម្ដាយនិងកូន មិនមែនជារឿងងាយឡើយចង់កាត់ផ្ដាច់ទំនាក់ទំនងនោះ។ យើងខ្ញុំសូមទោសចំពោះជនរងគ្រោះទាំងអស់ ប៉ុន្តែការដែលយើងចេញមកបង្ហាញគោលជំហរបែបនេះ ព្រោះយើងសង្ឃឹមថានឹងមិនមានហេតុការណ៍បែបនេះកើតឡើងទៀតនាពេលអនាគត ដូច្នេះសូមទាំងអស់គ្នាមេត្តាយោគយល់និងអធ្យាស្រ័យ។»
ប្រភព៖ allkpop