ពោធិ៍សាត់ – ដើម្បីអបអរសាទរនូវសមិទ្ធិផលដ៏ធំរបស់ខ្លួនគឺ ដណ្ដើមបានពានកិត្តិយសដ៏ធំសម្បើមពីការប្រកួតចម្រៀង Beat the Best កំលោះពោធិ៍សាត់ សួ វិចិត្រ បានដង្ហែពានរបស់ខ្លួនទៅជុំវិញទីរួមខេត្ត ដោយមានការចូលរួមស្វាគមន៍យ៉ាងកុះករពីសាធារណជននិងបងប្អូនរួមខេត្ត មុននឹងដង្ហែត្រលប់មកកាន់វេទិកាកិត្តិយសវិញ។
យោងតាមការផ្សាយព័ត៌មានរបស់ រដ្ឋបាលខេត្តពោធិ៍សាត់ បានឱ្យដឹងថា រដ្ឋបាលខេត្តពោធិ៍សាត់ សហការជាមួយមន្ទីរវប្បធម៌ និងវិចិត្រសិល្បៈខេត្ត និងអាជ្ញាធរក្រុង កាលពីថ្ងៃទី០៨ ខែមីនា ឆ្នាំ២០២២ បានរៀបចំពីធីដង្ហែពាន ដើម្បីអបអរសាទរម្ចាស់ជ័យលាភី កម្មវិធីប្រឡងចម្រៀងកម្រិតពិភពលោក BEAT THE BEST រដូវកាលទី១ របស់ស្ថានីយ៍ទូរទស្សន៍ ហង្សមាសHDTV ជូនលោក សួ វិចិត្រ ជាអ្នកខេត្តពោធិ៍សាត់ ដែលទើបទទួលបានពាន កាលពីយប់ថ្ងៃទី០៦ ខែមីនា កន្លងទៅ។
កម្មវិធីនោះក៏មានថ្នាក់ដឹកនាំធំៗចូលរួមផងដែរ ក្នុងនោះរួមមាន លោក អភិបាលខេត្តរង លោក អភិបាលក្រុង លោកប្រធានមន្ទីរ និង អនុប្រធានមន្ទីរ អង្គភាពនានា ព្រមទាំងបងប្អូនប្រជាពលរដ្ឋក្នុងខេត្ត ដែលជាអ្នកគាំទ្រ ម្ចាស់ជ័យលាភី សួ វិចិត្រ យ៉ាងច្រើនកុះករផងដែរ។ ពិធីដង្ហែក្បួនបានចេញពីសួន ១៤មករា តាមក្បួនរថយន្ត និងម៉ូតូ ដង្ហែជុំវិញទីប្រជុំជនក្រុងពោធិ៍សាត់ ឆ្ពោះត្រឡប់មកទីតាំងដើមវិញ។
លោក ចេង ឡៃ អភិបាលរងនៃគណៈអភិបាលខេត្តពោធិ៍សាត់ និងជាអភិបាលខេត្តស្តីទី តំណាងដ៏ខ្ពង់ខ្ពស់ ឯកឧត្តម ជាវ តាយ អភិបាលនៃគណៈអភិបាលខេត្ត បានថ្លែងថា «ថ្ងៃនេះជាថ្ងៃដែលយើងមានមោទនភាពដ៏ក្រៃលែង ដែលខេត្តរបស់យើង មានប្អូនប្រុស សួ វិចិត្រ ទទួលបានជ័យលាភី ជាអ្នកចម្រៀង BEAT THE BEST រដូវកាលទី១ របស់ស្ថានីយ៍ទូរទស្សន៍ ហង្សមាសHDTV។ កាលទទួលបាននេះ គឺអាស្រ័យដោយការតស៊ូប្រឹងប្រែងរបស់ប្អូន ចំពោះទេពកោសល្យជាអ្នកសិល្បៈ មានបេះដូងជាអ្នកចម្រៀងពិតប្រាកដ។ ទម្រាំមានថ្ងៃនេះ លោកជឿជាក់ថា ប្អូនប្រុសពិតជាបានជំនះឧបសគ្គដ៏វែងឆ្ងាយ និងបទពិសោធន៍ដ៏សម្បូរបែប ដែលបានជួយជម្រុញឱ្យប្អូនប្រុស ឈានចាប់យកជ័យជំនះ ដ៏ត្រចះត្រចង់នេះបាន។»
លោក អភិបាលខេត្តរង បានបន្ថែមថា «នេះជាលទ្ធផលដ៏គួរឱ្យរីករាយ ដែលប្អូនប្រុសស័ក្តិសមនឹងទទួលបាន ព្រោះប្អូនប្រុសពិតជាមានសមត្ថភាពដែលបានដុសខាត់ សម្រេចមកអស់រយៈពេលយ៉ាងយូរកន្លងមកហើយ។ លោកសង្ឃឹមថា ប្អូនប្រុសនឹងប្រឹងប្រែងកសាងកេរ្តិ៍ឈ្មោះ ឱ្យបានកាន់តែល្អ កាន់តែល្បីល្បាញ ប្រកបដោយកិត្តិយស សម្រាប់អនាគតរបស់ប្អូន គ្រួសារបស់ប្អូន ក៏ដូចជាមុខមាត់របស់ខេត្តយើងផងដែរ។ ហើយភាពជោគជ័យរបស់ប្អូនប្រុស សួ វិចិត្រ ពិតជាបានលើកកិត្តិយសយ៉ាងធំធេង ចំពោះខេត្តពោធិ៍សាត់យើង និងផ្តល់គម្រូដ៏ល្អ ដល់យុវជនជំនាន់ក្រោយ ឱ្យមានការប្រឹងប្រែង ព្រមទាំងរួមគ្នាជួយកសាងជាតិរបស់យើង ឱ្យកាន់តែមានការអភិវឌ្ឍឈានឡើង ស្របតាមគោលនយោបាយដ៏ឈ្លាសវៃ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។» ។ លោក ចេង ឡៃ ក៏បានផ្ដាំផ្ញើដល់យុវជនទាំងអស់ឱ្យខិតខំតស៊ូប្រឹងប្រែងប្រសិនបើចង់សម្រេចបានការងារធំ ហើយត្រូវតែឃ្លាតឆ្ងាយពីអំពើអបាយមុខនិងគ្រឿងញៀន។
ពិធីដង្ហែពាននេះក៏មានការ Live ផ្ទាល់ពីផេករបស់ម្ចាស់ជ័យលាភី សួ វិចិត្រ ផងដែរ ដោយនៅក្នុងពេល Live នោះមានអ្នកគាំទ្រជាច្រើនបានចូលទស្សនា Live ផ្ទាល់រាប់ពាន់គណនី ព្រមទាំងមានអ្នក Comment សរសើរនិងគាំទ្រចំពោះ សួ វិចិត្រយ៉ាងច្រើន ដោយមកដល់ពេលនេះចំនួនទស្សនាមានចំនួនជាង ៣០០K ចំនួនLike ចំនួនជាង ២៥K និង Comment ជិត៥K។
នេះគឺជាលើកទីមួយហើយដែលអ្នកខេត្តពោធិ៍សាត់ សម្រេចបានសមិទ្ធិផលដ៏ធំក្ដោបបានពានរង្វាន់នៅក្នុងការប្រឡងចម្រៀងកម្រិតពិភពលោក ដូច្នេះការរៀបចំកម្មវិធីនេះគឺពិតជាអត្ថន័យយ៉ាងធំធេងនិងជ្រាលជ្រៅណាស់ សម្រាប់បងប្អូនអ្នកខេត្តពោធិ៍សាត់។ មួយវិញទៀតការសម្រេចបានសមិទ្ធិផលដ៏ធំនេះក៏ដោយសារតែមានការឧបត្ថម្ភគាំទ្រគ្រប់សព្វបែបយ៉ាងរបស់ប្រធាន «មជ្ឈមណ្ឌលកម្សាន្តស្លាបមាស» តាំងពីដើមរហូតកំលោះរូបនេះសម្រេចបាននូវសមិទ្ធផលដ៏អស្ចារ្យសម្រាប់ខ្លួន ក៏ដូចជាអ្នកខេត្តពោធិ៍សាត់ទាំងមូល៕
ប្រភព៖ Facebook Sour Vichet , រដ្ឋបាលខេត្តពោធិ៍សាត់
