សហព័ន្ធកីឡាបាល់ទាត់ម៉ាឡេស៊ី បានបញ្ចេញបញ្ជីឈ្មោះក្រុមជម្រើសជាតិរបស់ខ្លួនចំនួន៣០រូប ដើម្បីត្រៀមប្រកួតមិត្តភាពមិត្តភាពអន្តរជាតិ អំឡុងពេល FIFA Day (FIFA International Match Day) ក្នុងខែមីនា នេះ ស្របពេលសមាជិកក្លិបអ្នកមាន Johor Darul Ta’zim (JDT) មានសមាជិករហូតដល់១៤រូបត្រូវបានកោះហៅចូលក្រុមជម្រើសជាតិ។
នេះជាការដឹកនាំដំបូងរបស់លោកគ្រូបង្វឹក Kim Pan Gon ជនជាតិកូរ៉េខាងត្បូង ក្រោយចុះកុងត្រាដឹកនាំក្រុមជម្រើសជាតិម៉ាឡេស៊ី ខណៈក្រុមម៉ាឡេស៊ី ទាំងមូលនឹងធ្វើដំណើរទៅកាន់សិង្ហបុរី ទៅបោះជំរំហ្វឹកហាត់នៅសិង្ហបុរី ចន្លោះថ្ងៃទី២២ ដល់២៩ ខែមីនា ឆ្នាំ២០២២ ត្រៀមប្រកួតជាមួយក្រុមជម្រើសជាតិហ្វីលីពីន និងសិង្ហបុរី លើទឹកដីសិង្ហបុរី។
ក្រៅពីនោះតាមគ្រោងក្រុមជម្រើសជាតិម៉ាឡេស៊ី នឹងប្រកួតមិត្តភាពជាមួយក្លិបបាល់ទាត់ Albirex Niigata Singapore សមាជិកលីគកំពូលសិង្ហបុរី S-League នៅវេលាម៉ោង៨យប់(ម៉ោង៧យប់នៅកម្ពុជា) ថ្ងៃទី២៨ ខែមីនា ឆ្នាំ២០២២ លើទីលានកីឡដ្ឋាន Jalan Besar Stadium ក្នុងប្រទេសសិង្ហបុរី។
នេះជាការត្រៀមខ្លួនរបស់ម៉ាឡេស៊ី ដើម្បីចូលរួមប្រកួតជម្រុះជើងឯកពានរង្វាន់ទ្វីបអាស៊ី 2023 AFC Asian Cup qualificationនៅខែមិថុនា ខាងមុខ ដោយស្ថិតក្នុងពូល E ជាមួយបារ៉ែន, បង់ក្លាដេស និងទួរមេនីស្ថាន៕
