សម្រាប់ប្អូនៗយុវនារីដែលមានរូបសម្រស់ស្រស់ស្អាត កម្ពស់ខ្ពស់ និងមានភាពជឿជាក់លើសមត្ថភាពខ្លួន ហើយចង់ចូលរួមប្រកួតប្រជែងកម្មវិធី Miss Grand Cambodia 2022 ចាំបាច់ត្រូវមានស្បែកកែងចោទចំនួន៣គូ។
យោងតាមសេចក្ដីប្រកាសពីផេកផ្លូវការ Miss Grand Cambodia បានផ្សាយឱ្យដឹងនៅថ្ងៃទី២២ ខែមីនា ឆ្នាំ២០២២ នេះថា កម្មវិធីប្រកួតប្រជែងសម្រស់និងសមត្ថភាព កញ្ញាឯកដ៏អស្ចារ្យនៃកម្ពុជាឆ្នាំ២០២២ ឬ Miss Grand Cambodia 2022 នឹងបើកទទួលពាក្យចាប់ពីថ្ងៃទី០១ ខែមេសា ខាងមុខនេះហើយ។
ចំពោះលក្ខខណ្ឌនៃការដាក់ពាក្យបេក្ខនារីទាំងអស់ត្រូវនៅលីវ មានអាយុចាប់ពី១៨-២៧ឆ្នាំ មានកម្ពស់ចាប់ពី១.៧០ សង់ទីម៉ែត្រ កម្រិតវប្បធម៌ ចប់បាក់ឌុប (ថ្នាក់ទី១២) មានចំណេះដឹងភាសាបរទេស អាចប្រើប្រាស់ភាសាអង់គ្លេសបាន ជាពិសេសត្រូវមានអត្តចរិតស្លូតបូត សុភាពរាបសារ ចេះគោរពពេលវេលាធ្វើការ។
ទន្ទឹមនឹងនេះដែរអ្នករៀបចំកម្មវិធីក៏តម្រូវឱ្យបេក្ខនារីទាំងអស់ត្រូវស្ម័គ្រចិត្តស្លៀកសម្លៀកបំពាក់ទៅតាមការរៀបចំរបស់កម្មវិធីនិងស្របតាមលិខិតអនុញ្ញាតដែលចេញពីក្រសួងវប្បធម៌និងវិចិត្រសិល្បៈ។ នៅក្នុងនោះដែរកម្មវិធីក៏តម្រូវឱ្យបេក្ខនារីដែលចូលរួមប្រកួតទាំងអស់ត្រូវមានស្បែកជើងកែងចំនួន៣គូ កម្ពស់ចាប់ពី១តឹក ១តឹកកន្លះ និង២តឹក។
សូមជម្រាបជូនថាបេក្ខនារីដែលក្លាយជាម្ចាស់ជ័យលាភីចំនួន៥រូបនឹងទទួលបានពាន១ ម្កុដ១ និងឈៀង១ ដូចគ្នា ប៉ុន្តែទឹកប្រាក់រង្វាន់ទទួលបានខុសគ្នា ដោយបេក្ខនារីជ័យលាភី (លេខ១) ទទួលបានទឹកប្រាក់៦លានរៀល បេក្ខនារីរងទី១ (លេខ២) ទទួលបានទឹកប្រាក់៥លាន២សែនរៀល បេក្ខនារីរងទី២ (លេខ៣) ទទួលបានទឹកប្រាក់៤លាន៨សែនរៀល និងបេក្ខនារីរងទី៣ (លេខ៤) ទទួលបានទឹកប្រាក់៤លាន៤សែនរៀល និងបេក្ខនារីរងទី៤ (លេខ៥) ទទួលបានទឹកប្រាក់៤លានរៀល៕
ប្រភព៖ Miss Grand Cambodia