កាលពីថ្ងៃម្សិលមិញ មហាជនមួយចំនួនធំមានការភ្ញាក់ផ្អើលយ៉ាងខ្លាំង ខណៈដែលហ្វេសប៊ុកផេកមួយចំនួន បានដុតដៃគ្នាបង្ហោះពីដំណឹង Fake News ដោយប្រើចំណងជើងថា វីរៈសិល្បករអាយ៉ៃ ព្រហ្មម៉ាញ បានស្លា.ប់បាត់បង់ជីវិតហើយ។ ប៉ុន្ដែដំណឹងនេះមិនមែនជាការពិតឡើយ ហើយបើតាមការអះអាងពីប្រភពអ្នកសិល្បៈ បានចេញមកបញ្ជាក់នៅលើបណ្ដាញសង្គមថា វីរៈសិល្បករអាយ៉ៃ ព្រហ្មម៉ាញ កំពុងសម្រាកព្យាបាលនៅពេទ្យលោកសង្ឃដដែលទេ រីឯសុខភាពលោកបានធូរស្រាលច្រើនហើយ ដូច្នេះហើយសូមសាធារណជនមេត្តាកុំមានការយល់ច្រឡំ។
ជាមួយគ្នានោះដែរ មានមហាជនអ្នកគាំទ្រជាច្រើននាក់ បានប្រតិកម្មចំពោះការបញ្ជូនដំណឹង Fake News នេះ ដោយមានអ្នកខ្លះនិយាយថា៖ «អ្នកណាចិត្តខ្មៅម្ល៉េះ ហ៊ានមកប្រមាថអាយុជីវិតលោកអ៊ំបែបនេះ
សូមឱ្យលោកអ៊ំឆាប់ជាដូចដើមវិញ🙏»។ ខ្លះទៀតថា «ឆ្ងល់ដែលមិនដឹងថាគាត់ធ្វើចឹងបានអី ដល់ថ្នាក់យកជីវិតគេមកលេងសើច បើប៉ះចំគ្រួសារគាត់គេធ្វើចឹងមានអារម្មណ៏ម៉ិចវិញ។ ឬក៏ចង់បានLike បានShare ឬនិយាយឱ្យចំចង់បានលុយដោយមិនខ្វល់ពីអារម្មណ៏អ្នកដទៃ»។ ហើយអ្នកទៀតរិះគន់ថា៖ «ហឺ មនុស្សអើយមនុស្ស មិនពិតក៏និយាយដែល ខ្ញុំឃើញញាត់ពិសាបបរបាន ហើយនិយាយបានតើ»។
តែយ៉ាងណាមិញ អ្នកដែលបង្ហោះពីដំណឹងមិនពិតនោះ បានលុបចោលនូវអ្វីដែលខ្លួនឯងបានបង្ហោះទៅវិញ ដែលជាហេតុធ្វើឱ្យមហាជនយល់ឃើញថា ជាការគេញចំណេញរកភាពទាក់ទាញ។ បើតាមប្រសាសន៍របស់លោក ព្រហ្មម៉ាញ បាននិយាយនៅក្នុងវីដេអូពីគ្រែមន្ទីរពេទ្យប្រាប់ថា៖ «បង្ហោះអ្វីមិនពិត យើងកែវិញទៅ ព្រោះថាយើងអាចកែបានទេតើ។ អ៊ីចឹងខ្ញុំសូមផ្ដាំថា ខ្ញុំមិនទាន់អីទេ ហើយនៅតែមានគំនិតថា នៅបម្រើការងារបង្ហាត់បង្រៀនក្មេងៗជាន់ក្រោយនឹងឱ្យចេះខាងផ្នែកអាយ៉ៃហ្នឹង ដោយសារវាតិចណាស់។ អ៊ីចឹង គួរតែជួយអភិរក្ស»។ លោកបានបន្តទៀតថា៖ «នៅអាស៊ី មានតែខ្មែរទេដែលមានអាយ៉ៃនោះ ក្រៅពីហ្នឹងគ្រាន់តែមានកន្ត្រឹម មានឡាំអ៊ឺន មានឡាំទើយ ឡាំទិត ដែលខាងខ្មែរសុរិន្ទ ឬក៏ជនលាវអី ថៃអី មានអ៊ីចឹង។ ប៉ុន្ដែគ្រាន់តែថា អាយ៉ែនេះ ប៉ុន្មានប្រទេសនៅអាស៊ីគឺថាមិនមានទេ កុំថាតែដល់អឺរ៉ុប ព្រោះអឹរ៉ុបមិនមានអាយ៉ៃទេ ទោះអាស៊ីមានស្រដៀងៗគ្នា តែខ្វះអាយ៉ៃហ្នឹងមួយ ដែលមានតែខ្មែរទេ»។
យ៉ាងណាក្ដីវីរៈសិល្បករអាយ៉ៃ ព្រហ្មម៉ាញ បានបញ្ជាក់ឱ្យមហាជនដឹងពីបំណងចុងក្រោយទៀតថា៖ «ហើយខ្ញុំក៏មានបំណងមួយ មុននឹងអស់ជីវិតទៅគឺខ្ញុំបង្រៀន។ ឥឡូវនេះខ្ញុំបង្រៀន បាន១ឆ្នាំមុនមានរៀបចំប្រឡងឱ្យកូនសិស្សហើយ បានដឹងស្នាដៃកូនសិស្ស ដល់មកកូវីដនេះ យើងរក្សាគម្លាត និងបានធ្វើសាលាថ្មី ហើយចាប់ចូលរៀនតាំងពីថ្ងៃទី ៥ ខែមករា ឆ្នាំ២០២២មកម្ល៉េះ»។
វីរៈសិល្បករអាយ៉ៃ ព្រហ្មម៉ាញ បានបញ្ជាក់ពីស្ថានភាពសុខភាពរបស់លោកនៅពេលនេះថា លោកបាត់អាការវិលមុខហើយ និងអាចដើរទៅបន្ទប់ទឹកដោយខ្លួនឯងបាន។ ក្រោយទទួលដំណឹងអកុសលបែបនេះ លោកថាមានមនុស្សច្រើនណាស់ដែលអន់ចិត្ត ប៉ុន្ដែលោកមិនបានប្រកាន់ទោសអីនោះទេ៕
សូមទស្សនាវីដេអូនេះ៖
សូមទស្សនាវីដេអូ Big News៖
