ហ្វេនមួយចំនួនធំ និងមិត្តសិល្បករសុទ្ធតែដឹងឮពីទំនាក់ទំនងស្នេហារវាងតារាចម្រៀង Original និងបុរសគូស្នេហ៍ជាអ្នកជំនួញធំរបស់អ្នកនាង យ៉ាងណាមិញក្រោយសេពគប់មើលចិត្តមើលថ្លើមគ្នាជាច្រើនឆ្នាំ ទីបំផុតគូស្នេហ៍របស់អ្នកនាងបានលុតជង្គង់សុំអ្នកនាង រៀបការហើយពោលគឺនៅក្រោយពេលបណ្ដើរគ្នាចូលរួមអបអរអ្នកនាង ទឹម រដ្ឋា និងស្វាមីជាជនបរទេសមិនបានប៉ុន្មានផងនោះ។
សូមចុចអាន – ទឹម រដ្ឋា សម្រេចចិត្តចូលរោងជ័យចំពេលគ្រប់ខួប ៦ឆ្នាំនៃថ្ងៃផ្ដើមស្នេហ៍ដំបូងជាមួយស្វាមី
ទំនងជាស្នេហារបស់អ្នកទាំងពីរនេះទុំជោរហើយមើលទៅ ទើបគូស្នេហ៍របស់អ្នកនាង Adda បានដាច់ចិត្តលុតជង្គង់សុំរៀបការប្រើប្រាស់ជីវិតជាប្ដីប្រពន្ធពេញសិទ្ធិ បណ្ដើរគ្នាទៅណាមកណាមិនខ្លាចសម្ដីអ្នកផងសើចនិន្ទា។
នៅថ្ងៃទី៤ ខែមេសា ឆ្នាំ២០២២នេះ អ្នកនាង Adda បានធ្វើឱ្យអ្នកគាំទ្រ និងមិត្តភក្ដិផ្អើលលាយត្រេកអរ ព្រោះអ្នកនាងត្រូវបានមិត្តប្រុសលុតជង្គង់សុំរៀបការនៅសណ្ឋាគារ ព្រមទាំងបំពាក់ចិញ្ចៀនពេជ្របញ្ចាំចិត្តទៀតផង។
យោងតាមការបង្ហោះ Status របស់ Adda បានសរសេររៀបរាប់ថា៖ « All the time he never failed us!» ដែលអាចមានន័យថា «ចាប់តាំងពីដើមមកដល់ពេលនេះ គាត់មិនដែលធ្វើឱ្យយើងខកចិត្តទេ»។
មនុស្សជាច្រើនបានចូលមកអបអរសាទរចំពោះអនាគតកូនកំលោះនិងអនាគតកូនក្រមុំ ហើយទន្ទឹងរង់ចាំអ៊ុតមើលថាតើកាលបរិច្ឆេទរៀបការរបស់អ្នកទាំងពីរនេះនឹងកំណត់យកពេលាល្អណាមួយក្នុងពេលឆាប់ៗនេះឬយ៉ាងណា?
ត្រយងសូមឆ្លៀតឱកាសនេះជូនពរចំពោះ Adda Angel និងគូស្នេហ៍ឱ្យជួបប្រទះតែសេចក្ដីសុខនិងសុភមង្គល ពិសេសស្រលាញ់គ្នាដល់ចាស់កោងខ្នង៕
ប្រភព៖ Facebook Adda Angel
