នៅថ្ងៃទី០៤ ខែមេសា ឆ្នាំ២០២២ លោក ភា សុភ័ក្ត្រា អតីតគ្រូបង្គោលក្រុម Tiffy Army FC បច្ចុប្បន្នគឺជាគ្រូជំនួយឈុតធំរបស់ក្រុមជម្រើសជាតិកម្ពុជា បានលើកឡើងអំពីតួរលេខតំបន់ប្រយុទ្ធ (Attacking Zone) របស់ក្រុមព្រះខ័នរាជស្វាយរៀង ដោយបានបញ្ជាក់ថា(តួរលេខនៃភាគរយគ្រាន់ជាការប៉ាន់ស្មានផ្ទាល់ខ្លួនជឿក៏បានមិនជឿក៏បាន)។
បច្ចុប្បន្នក្រុមព្រះខ័នរាជស្វាយរៀង កំពុងតែឈរកំពូលតារាងនៃពានរង្វាន់ Cambodian Premier League 2022 ក្រោយប្រកួតបាន៥សប្ដាហ៍ឈ្នះ៤លើក និងស្មើ១លើក ខណៈក្រុមមួយនេះជាក្រុមដែលទាត់បញ្ជូលទីគូប្រកួតច្រើនគ្រាប់ជាងគេរហូតដល់១៤គ្រាប់ ហើយរបូតវិញតែ៤គ្រាប់ប៉ុណ្ណោះ។
ភ្លាមៗនោះលោក Conor Nestor គ្រូបង្គោលក្រុមព្រះខ័នរាជស្វាយរៀង ក៏បានចូលមក Comment ដូច្នេះថា៖«ខកចិត្តជាខ្លាំងដែលឃើញការបង្ហាញទម្រង់លេងរបស់កីឡាករខ្មែរយើងដូចជា ភារ៉ាត់ និង រតនៈ អន់ថយដោយសារការវិភាគរបស់សមាជិកនៃក្រុមជម្រើសជាតិ ប្រសិនបើសមាជិកនៃក្រុមជម្រើសជាតិខ្លះទៅលេងកីឡដ្ឋានខេត្តស្វាយរៀងញឹកញាប់ជាងនេះ លទ្ធផលជម្រើសជាតិអាចនឹងប្រសើរឡើង។»
ប៉ុន្តែយ៉ាងណាមិញ លោក ភា សុភ័ក្ត្រា ក៏បានពន្យល់តបទៅវិញថា៖«នេះមិនមែនជាព័ត៌មានពេញលេញ ឬព័ត៌មានលម្អិតរបស់អ្នកវិភាគនោះទេ។ ខ្ញុំគ្រាន់តែចែករំលែកនូវអ្វីដែលខ្ញុំបានមើលឃើញក្នុងនាមជាអ្នកអត្ថាធិប្បាយ ឬអ្នកវិភាគប៉ុណ្ណោះ ខ្ញុំមានន័យថាវាមិនមែនសម្រាប់ក្រុមជម្រើសជាតិទេ។»