ស៊ីណូរ៉ា រ័ត្ន គឺជា Influencer និងជាតារាចម្រៀង Original ដ៏ល្បីតាមរយៈស្នាដៃចម្រៀង «My Boyfriend Is a B*tch» លោកបានផលិតវីដេអូមួយនិយាយពីភេទទី៣ ដោយរឿងគួរឱ្យចាប់អារម្មណ៍នោះគឺវិបត្តិស្មុគស្មាញរឿងចូលបន្ទប់ទឹករបស់បងប្អូនភេទទី៣។
កាលពីពេលថ្មីៗនេះ ស៊ីណូរ៉ា បានបង្ហោះវីដេអូឃ្លីបខ្លីមួយនៅលើបណ្ដាញទំនាក់ទំនងសង្គម ដែលឃ្លីបខ្លីនេះបានរំលេចរឿងរ៉ាវជាច្រើនពិសេសទស្សនៈរបស់លោកជុំវិញរឿងស្រលាញ់ភេទដូចគ្នានិងការរើសអើងផ្សេងៗកន្លងមក។
បុរសដែលហ៊ានបើកចំហរថាខ្លួនជាក្រុមមនុស្សស្រលាញ់ភេទដូចគ្នានេះបានពន្យល់ច្រើនដល់អ្នកដែលនៅមិនទាន់អាចទទួលយកបានចំពោះរឿងស្រលាញ់ភេទដូចគ្នានោះ លោកបានបញ្ជាក់ថាការដែលអ្នកណាម្នាក់គាំទ្រអ្នកស្រលាញ់ភេទដូចគ្នា មិនបានសេចក្ដីថាគេនោះស្រលាញ់ភេទដូចគ្នានោះទេ ដូចជាលោកខ្លួនឯងផ្ទាល់ កាលដែលលោកគាំទ្រស្ត្រី មិនបានសេចក្ដីថាលោកមករដូវដូចស្ត្រីនោះដែរ។
សារជាច្រើននៅក្នុងវីដេអូនោះគឺស្ដែងចេញពីបញ្ហាដែលអ្នកស្រលាញ់ភេទដូចគ្នានៅកម្ពុជាជួបប្រទះក្នុងនោះដែរលោកបានបញ្ជាក់គោលជំហររបស់ខ្លួនជាថ្មីថាលោកមិនចង់កើតជាតិថ្មីឡើយព្រោះលោកអាចនឹងទៅកើតជាអ្វីក៏មិនដឹង ហេតុនេះលោកស៊ូរស់នៅក្នុងជាតិនេះជាខ្លួនឯង ធ្វើអ្វីដែលល្អបំផុតប្រសើរជាង។
យ៉ាងណាមិញបុរសភេទទី៣រូបនេះបានឆ្លើយតបនឹងសំនួរ Sensitive មួយទាក់ទងនឹងរឿងចូលបន្ទប់ទឹក តើលោកចូលបន្ទប់ខាងស្រីឬ ចូលបន្ទប់ទឹកខាងបុរស? ដោយ ស៊ីណូរ៉ា រ័ត្ន បានឆ្លើយថាលោកចូលបន្ទប់ទឹកបុរសព្រោះលោកខ្លាចស្ត្រីដែលមិនទាន់ស្គាល់លោក ខ្លាចនិងមានការយល់ច្រឡំចំពោះខ្លួនលោក ប៉ុន្តែបើថ្ងៃណាដែលលោកស្លៀករ៉ូបនិងផាត់មុខក្រាស់ៗ ហើយស្ងាត់មនុស្ស លោកនឹងចូលបន្ទប់ទឹកស្រី។
ឆ្លៀតក្នុងឱកាសនោះដែរបុរសដ៏លេចធ្លោរលើបណ្ដាញសង្គមរូបនេះបានសំណូមពរចង់ឱ្យថ្ងៃអនាគតប្រទេសកម្ពុជាមានបង្កើតបន្ទប់ទឹក ឬបង្គន់អនាម័យសម្រាប់ក្រុមមនុស្សភេទទី៣ដូចជាប្រទេសគេដទៃទៀត។
ការលើកឡើងរបស់បុគ្គលល្បីលើបណ្ដាញសង្គមនេះទទួលបានការសាទរនិងយល់ស្របច្រើនពីមតិសាធារណៈ ព្រោះបើមើលតាម comments នៅខាងក្រោមផុសនោះមានតែការសរសើរច្រើនចំពោះអ្វីដែលលោកស៊ីណូរ៉ា រ័ត្នបានលើកឡើង ថែមទាំងមានទស្សនៈវិជ្ជមានទៅលើអ្វីលោកបានរៀបរាប់ក្នុងវីដេអូឃ្លីបខាងលើផងដែរ៕
សូមតាមដានទស្សនាវីដេអូពេញរបស់លោក ស៊ីណូរ៉ា រ័ត្ន ខាងក្រោម៖
សូមទស្សនាវីដេអូ Top News ៖
ប្រភព៖ Facebook Sinora Roath