កាលពីព្រឹកថ្ងៃទី០៦ ខែមេសា ឆ្នាំ២០២២ ក្រុមបាល់ទាត់ជម្រើសជាតិកម្ពុជា អាយុក្រោម២៣ឆ្នាំ ត្រូវបានចាប់ឆ្នោតនៅពូល B សម្រាប់ប្រភេទកីឡាបាល់ទាត់ លើវិញ្ញាសាបុរស ក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣១ នៅប្រទេសវៀតណាម។
ភ្លាមៗនោះលោក Keisuke Honda អ្នកចាត់ការទូទៅក្រុមជម្រើសជាតិកម្ពុជាលើកឡើងដូច្នេះថា៖«ខ្ញុំគិតថាពូលទាំង២មិនងាយស្រួលនោះទេ ពួកយើងនឹងធ្វើឱ្យអស់ពីសមត្ថភាព, អរគុណសម្រាប់ការគាំទ្រពួកយើង»។
សម្រាប់បាល់ទាត់លើវិញ្ញាសាបុរសចែកជា២ពូលមាន៖
-ពូល A មានវៀតណាម, ឥណ្ឌូណេស៊ី, មីយ៉ាន់ម៉ា, ហ្វីលីពីន,ទីម័រខាងកើត
-ពូល B មាន ថៃ, ម៉ាឡេស៊ី, កម្ពុជា, សិង្ហបុរី, ឡាវ។
ខាងក្រោមនេះគឺជាកម្មវិធីប្រកួតបាល់ទាត់បុរស ក្នុងការប្រកួតកីឡាសុីហ្គេម លើកទី៣១ នៅប្រទេសវៀតណាម៖
លទ្ធផលឆ្នាំចាស់២០១៩ កន្លងទៅកម្ពុជា បានឡើងទៅវគ្គពាក់កណ្ដាលផ្ដាច់ព្រ័ត្រជាលើកដំបូងរបស់ខ្លួនក្នុងប្រវត្តិសាស្រ្ត ក្រោយឈ្នះវគ្គសន្សំពិន្ទុក្នុងពូល ២លើក ស្មើ១លើក ចាញ់១លើក ឈរលខ២ ប្រចាំពូល A។
ប៉ុន្តែនៅវគ្គពាក់កណ្ដាលផ្ដាច់ព្រ័ត្រកម្ពុជា ចាញ់វៀតណាម ៤-០ និងបន្តចាញ់មីយ៉ាន់ម៉ា ២-២ (Penalty ៥-៤) ក្នុងវគ្គដណ្តើមចំណាត់ថ្នាក់លេខ៣។
សូមបញ្ជាក់ថាព្រឹត្តិការណ៍កីឡាស៊ីហ្គេមលើកទី៣១ឆ្នាំ២០២១ គ្រោងរៀបចំឡើងនៅចន្លោះថ្ងៃទី១២ ដល់២៣ ខែឧសភា ឆ្នាំ២០២២ ដោយមានប្រទេសក្នុងតំបន់ចំនួន១១ ត្រៀមបញ្ជូលអត្តពលិកសរុបប្រមាណជាង៧០០០នាក់ ចូលរួមប្រកួតប្រជែងលើ៤០ប្រភេទកីឡា ដែលសរុបចំនួន៥២៦វិញ្ញាសា៕
