ដូចមហាជនអ្នកគាំទ្រភាពយន្តខ្មែរបានជ្រាបមកហើយថា លោក ហ្វៃ សំអាង ជាអ្នកដឹកនាំរឿងឆ្នើមម្នាក់ និងជាអ្នកជំនាញជើងចាស់លើវិស័យភាពយន្ដខ្មែរ ដោយកន្លងមកលោកធ្លាប់ទទួលបានជោគជ័យ រឿង «កូនពស់កេងកង» រឿង «ទុំទាវ» រឿង «មរណមាតា» រឿង «ចៅពស់កេងកង» រឿង «មន្តមាយា» រឿង «ភ្នំទាបជាងស្មៅ» រឿង «ជាតិស្ត្រី» និងរឿង «ពិសស្នេហ៍» ជាដើម ។
យ៉ាងណាមិញ សម្រាប់រឿងភាគទូរទស្សន៍ហង្សមាស លោកក៏បានបញ្ចេញវណ្ណកម្មធំមួយដែលមានចំណងជើងថា «កូនពស់កេងកង»។ ថ្មីៗនេះ លោក ហ្វៃ សំអាង ក៏បានប្រកាសប្រាប់មហាជនអ្នកគាំទ្ររបស់លោកឱ្យដឹងថា លោកមានគម្រោងថ្មីមួយឱ្យទូរទស្សន៍ហង្សមាស ដែលជាការសហការគ្នារវាងលោក និង លោក យូ សុភា ជាអ្នកនិពន្ធល្បីឈ្មោះ។
លោក ហ្វៃ សំអាង បានរៀបរាប់ថា ៖ «ជម្រាបសួរបងប្អូនដែលជាទស្សនិកជនគាំទ្រផលិតកម្ម ហង្សមាស និងរស្មីហង្សមាស ក៏ដូចជាបងប្អូនដែលនិយមគាំទ្រស្នាដៃ ដឹកនាំសម្ដែងរបស់ខ្ញុំ នៅក្នុងឱកាសថ្ងៃខួបកំណើតរបស់ខ្ញុំ ថ្ងៃទី១០ខែមេសា ឆ្នាំ២០២២នេះ ខ្ញុំមានទឹកចិត្តសប្បាយរីករាយ សូមបង្ហាញជូន នូវវណ្ណកម្មថ្មីដែលជាខ្សែភាពយន្តខ្នាតធំ និពន្ធឡើងដោយអ្នកនិពន្ធពីររួមគ្នា គឺលោក យូ សុភា និងលោក ហ្វៃ សំអាង ជាខ្សែភាពយន្តដែលបង្ហាញពីអត្តសញ្ញាណជាតិ មានទាំងអត្ថរសនិងអត្ថន័យ ក្រុមការងារផលិតកំពុងសម្រិតសម្រាំងតួសម្តែងដែលមានតួអង្គសំខាន់ៗជាង៤០នាក់»។ លោក ហ្វៃ សំអាង បានសួរទៅកាន់អ្នកគាំទ្រទៀតថា ៖ «តើតារាប្រុសស្រីណាខ្លះដែលលោកអ្នកស្រឡាញ់ ពេញចិត្តចង់ឲ្យមានវត្តមាននៅក្នុងខ្សែភាពយន្តខ្នាតធំមួយនេះ? »។
យ៉ាងណាក្ដី លោក ហ្វៃ សំអាង ក៏បានបង្ហើបទៀតថា រឿងភាគដ៏ល្អឯកនាពាក់កណ្ដាលឆ្នាំ២០២២នេះ មានចំណងជើងថា «អប្សរាមហាអង្គរ» ។ ដូច្នោះមានតែហ្វេនអ្នកគាំទ្រ រង់ចាំតាមដានទាំងអស់គ្នា ថាតើតារាដួងណាខ្លះនឹងលេចវត្តមាននៅក្នុងខ្សែភាពយន្តខ្នាតធំរបស់ផលិតកម្មហង្សមាសមួយនេះ?៕